June 29, 2010

MALAM MANTAR GAWAI DAYAK 2010 BA RUMAH UNDI, BRAYANG KEMUNTANG, ROBAN

Kira pukul enam lemai 31hb.May, 2010 dia semoa kami serumah ba Rh. Undi, Brayang Kemuntang, Roban sigi endang udah bisi ayan ba ruai diri empu nganti jako gerah ari orang ti udah ditudoh ka nyadi tuai Gawai Dayak 2010. Orang ka nyadi tuai Gawai Dayak 2010 iya nya betuai ka Danggat Ak Gundi (Tuai Bilik Lumor 19), Cikgu Jeffery Ak Menggu (Tuai Bilik Lumor 18) enggau Itut Ak Muyang (Tuai Bilik Lumor 17) Video pengerami kami tu tau dipeda kita ba http://www.youtube.com/user/apairosa
Nyadi nitih ka jako aum kami serumah dia kami sama dipinta begulu makai lemai diri sebilik ba ruai diri empu magang kena pukul lapan malam. Kira pukul tujoh malam dia tuai gawai lalu mai manok kena nesau kami serumah sereta di sempulang ngena gendang lalu ditangkan ka bala bukai ti nitih ka setunggol kena nanda Hari Gawai Dayak ka nyadi tengah malam nya.
Kira pukul lapan malam dia semoa kami serumah endang udah begempuru magang ba ruai diri empu nungga meja makai nganti pemakai ti udah ayan nya diberkat ka ngena leka sambiang betuai ka Cikgu Jeffery Ak Menggu (Ari Gereja Roman Catholic). Rindu meda semoa bisi ayan magang lemai nya, laban nyau ka semoa kami serumah bisi pulai ka rumah panjai magang leboh Gawai Dayak taun tu. Lalu aku mega berasai sinu meda bala bukai ka betungga diri melaki bini aja makai ba ruai laban bala anak ti enda ulih mulai ka diri sama enggau berami taun tu.
Udah tembu makai lalu kira ka pukul sembilan setengah malam, dia semoa kami lalu begempuru baru ba ruai tuai gawai tiga pintu nya. Kami serumah sama bebai ka utai empa enggau ai irup kena kami ngerami malam mantar Gawai dayak 2010. Udah kami semoa terenah dudok magang dia tuai gawai lalu dulu bejako ngelalu ka semoa kami serumah, udah nya lalu ditangkan ka tuai rumah Undi Ak Gani, sereta disimpul olih Ex Penghulu Tedong Ak Manggi.
Udah badu orang ti dipadu nya bejako, alai kami serumah lalu dipenggal ngena main rama ti di ungkup ka bala anembiak mit, orang indu enggau orang lelaki. Kami mega bisi mantai ka main asal baka ngajat ngena gendang enggau taboh kitai Iban, lalu pia mega bisi nya ngajat ngena sape.
Kira limabelas minit alai jam nyau ka nyentuk pukul dua belas tengah malam, dia kami serumah lalu dipinta tuai gawai sama bediri magang laban nyau ka nyeradak ka Ai Pengayu. Udah tembu nyeradak Ai Pengayu dia kami lalu sama mulai ka diri ngagai bilik diri empu laban ka ngirup Ai Pengayu ba bilik diri empu.
Kira pukul satu pagi 01hb.June, 2010 dia bala kami serumah lalu sampal datai baru laban ka mantai ka uti sereta main asal kitai Iban. ka bukai. Kami mega diperindang bala ti landik belagu ngena karoake ti ulu ka Cikgu Jeffery Ak Menggu. Lalu leboh orang ti belagu karoake nya mega kami serumah nyau ka sampal magang nguji ka diri enggau betanda Poco Poco.
Bisi bendar utai ngasoh kami serumah ngerindu ka ati laban jarang kami serumah ngemaioh nya baka ka taun tu sama begelumu pulai ngintu Gawai Dayak ka menoa diri empu. Video kami ti rami tu tau dipeda kita ba  http://www.youtube.com/user/apairosa
Lalu kami mega arap ka pengawa ti baka tu ulih dikereja kami serumah belama ninting taun laban nya siti ari chara kena kami serumah begempong enggau pangan diri besaum ngereja semoa pengawa ba rumah panjai.

June 23, 2010

PENEMUAI ENGGAU ORANG NIKAH NGAGAI RUMAH MARTHIN, SUNGAI TUAH, KANOWIT KENA 30 HB.MEI, 2010.

Kira pukul tiga lemai semoa kami serumah ari Rumah Undi, Brayang Kemuntang, Roban sama sampal nurun enggau orang nikah Cikgu John Dickman Nyelang ti ngajar ba SMK Pakan enggau Cikgu Lorita Johnathan Bruno ti ngajar ba SMK Kapit. Nyadi Cikgu John Dickman Nyelang tu iya nya anak iru ipar aku niang Benstien Daud Rajit seduai Agnes Ganti ti ka tuai bendar, iya sama kami serumah ari Brayang Kemuntang, Roban. Nyadi Cikgu Lorita Johnathan Bruno tu iya nya anak Johnathan Bruno ari Rumah Mathin, Sungai Tuah, Kanowit.
Kami serumah ka bisi enggau nikah kin iya nya tiga puloh iko lelaki enggau tiga puloh iko indu lalu ngenatai ka diri ngena lima belas buah kereta ti betangkan tangkan serantu jalai ari Brayang nengah Jalai Kuching / Julau / Durin (KJD). Udah meh kami datai ba Jambatan Batang Rajang (Jambatan Durin), kami lalu mupok baru nengah Jalai Nibong Tada mansa menoa orang Menyan lalu datai ba rumah orang indu kira ka pukul lima setengah lemai.
Penatai kami serumah ba rumah panjai orang tu di sambut sida serumah enggau penuh basa ti besai ba Adat Iban leboh ka ngambat penatai bala temuai, iya nya dianti sida ngena siko “Babi Panjap” ba pala tangga. Udah “Babi Panjap” nya tadi dirurok ka tuai kami ti di ulu ka apai lelaki Tuai Rumah Ranggau ari Tingkat Atas, Roban, kami lalu di tiki ka bala sida ari Tuah ba pala tangga ngena ai basu, iya nya ai arak, ai tuak sereta di anti bala sida ka indu anembiak ngena ngepan Iban ti chukup manah dipeda rambau nya suba. Lalu baka nya mega kami ka niki nya enda sunyi ditaban hari, laban dirami sida ngena gendang ajat ti chukup manah bendar, sereta disempulang ka siko lelaki ti ngereta sida ka begenda g nya ngajat niti rumah, nyentuk ka kami nyau bejalai ngapus ka rumaah panjai lalu nikal baru ngagai ruai sida indu ti ka ditikah nya.
Datai kami ba ruai indu nya, semoa kami lalu sampal duduk, lalu bala sida ka indu lalu diasoh tama ka bilik enda lama. Udah nya baru kami semoa lalu begempuru baru ba ruai lalu ditki ka sida ari Tuah nya ngena jako sambiang nitih ka Gereja Roman Catholic. Udah kami di tiki ka sida, kami lalu ngetu enda lama belelak ba sebelah ruai enggau ba ujong tanju laban ngambi ka bisi awak alai bala keda ke ka mandi mutar ka diri.
Kira ka pukul lapan malam kami lalu begempuru baru ba ruai lalu dibai makai, tang sebedau semoa kami makai, kami dulu dibai sambiang ka semoa pemakai ti ka di enah ka sida ka bala kami ti bsii datai malam nya. Udah tembu makai kami lalu belega enda lama laban nganti seduai ti ka di tikah nya tembu begari.
Udah seduai ti ka di tikah nya tembu begari dia sida ti bempu rumah lalu madah ka bala apai indai lelaki ngasoh sida ngiga dini alai menantu sida nya tadi begari tauka dikumbai sida “Ngelalai Ka Indu”. Kami serumah lalu mansang ngiga indu ti ka di tikah nya ngena “Gendang Gunggong” niti rumah berengkah ari bilik ka pengabis ujong ari pala tangga setak ulu rumah panjai nya. Bala indu kami serumah ti di ulu ka indai lelaki lalu tama ngagai setiap bilik ba rumah panjai nya tadi. Tang nasib kami serumah ka nandang datai ka Tuah manah bendar, laban semina naka ba bilik ti ka tiga, nya alai sida iya lalu tetemu ka indu nya bisi dia ti lalu diiring kami serumah ngagai ruai sida empu ngena gendang niti rumah.
Udah bala pengabang terenah duduk magang, dia tuai gerah lalu dulu ngepun ka jako ngelalu ka bala temuai sereta ditangkan ka bala pengari ari lelaki enggau indu, sereta bala bukai ti dipadu ka tuai gerah nya. Udah tembu orang bejako dia tuai gerah lalu ngasoh bala sida indai lelaki enggau indai indu sama betungga bebai bala kira lima iko ari sepiak sepiak laban ka ngereja pengawa ka dikumbai sida “Muka Baku”. Leboh ka ngereja pengawa tu dia indai lelaki enggau indai indu lalu diasoh sida iya besua lalu besilih ka baku temaga ti udah di rias sida ngenaa bunga sereta dibungkus ngena kain tauka pua kumbu.
Udah seduai tu tadi besilih ka baku temaga nya dia sida lalu diasoh belaban “Muka Baku”. Laban ka meda sapa bagi sida nya tadi ka jampat ulih muka baku nya nitih ka gaya uti ba menoa Tuah tuaka ba menao Kanowit. Nyadi baku nya tadi pan baka nya mega, sigi udah ditanchang sida iya ngena dawai, dibalut ngean cylotape sereta dibungkus ngena kain ti kemas bendar sereta pedis bendar ka dikusai ka. Tang bala sida tu peda aku sigi udah ngena aum dulu laban sama bisi udah bebai ka anggup (wire cutter) kena netak dawai nya tadi.
Rami bendar kami sebuat leboh meda sida belaban “Muka Baku” nya tadi. Tang bala ari Tuah alah ba penyampat ari bala kami ari Brayang Kemuntang. Nyadi dalam baku nya tadi iya nya disimpan ka sida insap, buah pinang, sireh, kapu enggau duit siling sereta bisi mega roti gula. Nyadi semoa utai dalam baku nya tadi lalu dibagi sida ngagai orang maioh ka ngulu sida nya.
Tembu “Muka Baku” dia seduai ti di tikah lalu diasoh melah kuih tikah, udah nya lalu begambar sereta lalu nyadong ai tikah ngagai semoa orang ka bisi datai ngulu pengerami nikah seduai nya. Benong seduai ka di tikah nya nyadong ai dia bala ari apai indai lelaki enggau apai indai indu lalu begempuru baru sereta lalu ngereja pengawa ti dikumbai “Beambu Isan”. Sida ti beambu isan tu nya sama bebai besilih silih meri pangan diri ngirup arak tauka tuak kena ngelala pangan diri ni ke kena pangkat isan udah bekau anak sida ti begulai sejalai.
Tembu “Beambu Isan” dia semoa pengabang ka bisi datai lalu dirami ngena pengerami rama baka karoake, betanda sereta mega diasoh ngajat kena ngambi ka malam tikah nya tadi rami enggau manah. Orang ka ngirup arak pan rami bendar bebuti enggau pangan diri. Udah hari tekerebak tawas bala kami serumah ari Brayang Kemuntang pan lalu mulai ka diri ka Roban. Nyadi pengerami tu chukup ngerindu ka ati serambau enggau pemulai kami menyanak ka rumah panjai kami di Brayang Kemuntang, Roban leboh Gawai Dayak 2010.