Chara Kitai Iban Mungkal Pendam

Nyadi pemati kitai Iban endang nitih gaya ngintu pemati bansa bukai iya nya ditumbak ke ba tanah ke di kumbai kitai Pendam. Laban asai sepi aku jam ke diatu bedau maioh bansa kitai Iban ke udah di tunu bangkai lalu amau bangkai nya di simpan nitih ke chara bansa bukai ke udah mansang agi ke tegal ti bisi penanggol kebuah bangkai nya enda di tumbak.

Kebuah bangkai kitai mensia tu enda di tumbak iya nya baka tu :
( 1 ) Kitai Iban kelia ti orang benama tampak rita, tauka bujang berani, tauka tuai serang, tauka tuai kayau, tuaka tuai mulau, tauka tuai orang berumpang ke menua, tauka tuai orang ti endang di kira ke patut maia nya kelia nadai ditumbak tang bangkai sida tu di engkah ba lubong. Reti lumbong tu iya nya, lumbong tu selalu iya digaga orang ba tuchong bukit semak menua nya, lalu digaga ke orang langkau ti naka iya tegap serta naka iya pemanah. Lalu ba langkau tu di kumbai orang lumbong. Nyadi bangkai sida ti beberita tu di simpan ba lumbong sampai ke iya buot diri nadai di kachau.

( 2 ) Kebuah ti kedua iya nya laban menua kitai diatu nyau majak sekut lalu orang nyau nadai ka meri tanah nyadi ke tanah pendam nya alai bangkai nya tadi di tunu, lalu amau bangkai nya tadi di simpan orang ba kebok tauka pasu ti manah, udah nya lalu di simpan orang ba siti rumah alai nyimpan amau bangkai kitai mensia nya tadi. Iya ke udah dipeda aku ba Penang bisi siti alai bansa China nyimpan amau bangkai ba siti kuil Budha lalu bayar sida naroh amau nya ba siti alai iya nya RM3,200.00.

( 3 ) Kebuah ti ketiga iya nya bangkai kitai enda olih di tumbak ke ba menua kitai empu iya nya laban munyi ba cherita aku ti dulu ari tu iya nya di intu kitai ngena jako Ngerapoh ketegal pemarai orang nya ba menua orang lalu bangkai nya enda olih dibai pulai lalu di tumbak ke ba menua iya empu nya tadi.

( 4 ) Kebuah ti keempat iya nya enti orang ke nyadi kaban belayan iya ke mati nya enggai kiroh mai bangkai nya pulai tauka ditumbak ke ba menua orang ti alai iya mati nya, sida mega bisi ngena chara bukai iya nya nunu bangkai nya lalu mai amau iya ti mati nya pulai ke menua kitai ambi ke ditumbak ke ba pendam ba menua kitai ditu nitih ke adat kitai menua siti siti.

Nyadi chara kitai Iban rumah panjai mungkal Tanah Pendam iya nya leboh maia sida ti ka nganjong bangkai orang ti mati serta ka mungkal tanah pendam. Sida ti nganjong antu nya ka mai rengka baka chapan, alu, lesong, leka utai tanam, enggau rengka kena miring.

Datai sida ba tanah pendam ti ka dipungkal nya sida lalu miring serta madah ngagai petara pengawa diri ti mungkal tanah pendam nya. Lalu semua utai ti dibai sida nya tadi lalu di tinggal ke maggang ba pendam. Kebuah sida ti bebai ka alu, Chapan, lesong enggau leka utai tanam kena kitai idup nya laban ngelulu ka sida ti udah mati nya bisi utai kena idup tauka diau ba menua sebayan din lalu nadai regau semengat ka ngachau kitai ti agi idup ba dunya tu. tauka ba jako bukai enda ka mai kitai ti agi idup sama mati enggau sida iya.