Lalu reti jako Ngajat tu iya nya sebengkah ari tanda asal bansa Dayak ti dibantai tauka diayan ka sida leboh maia bisi pengerami kena nanda ka gaya pengaga ati sida nyambut orang tauka temuai ti dipebasa ka datai nemuai tauka baru pulai ngayau datai ngagai rumah panjai sida.
Lalu pengawa Ngajat tu keterubah iya dikerja leboh maia bansa Dayak Iban ke baru pulai ngayau ngalah ka munsoh sida. Lalu reti Ngayau tu dalam jako Iban iya nya ngalah ka munsoh sida ngena chara bebunoh, lalu ngayau tu dikerja leboh sida iya ngasu begiga ka munsoh ti enda begulai sejalai enggau penemu sida ngena chara nyerang munsoh sida lalu mumpong pala munsoh sida nya sereta lalu mai pala munsoh nya pulai ke menoa sida nyadi ke tanda sida iya menang leboh maia ke Ngayau nya tadi.
Lalu ba reti dalam jako Dayak Iban menya, bala pungka lelaki ka pulai ngayau lalu mujor bendar ngalah ka rumah munsoh sereta mega bulih pala munsoh nyadi ka dengah lalu ka dikumbai orang ba menoa nya nyadi Bujang Berani.
Nya alai ketegal nya meh sida iya lalu ngereja pengerami ti alai sida iya bisi ngereja pengawa ngajat rambau nya kelia. Bansa Dayak Iban mega bisi ngembuan pengarap ti madah ka pala mensia tauka munsoh ti udah dipumpong sida leboh ngayau nya mega bisi kuasa ti tau ngasoh sida iya nyadi berani sereta mega dipadah ka sida iya tau nulong sida ba menoa nya.
Nyadi leboh orang ngayau kelia bala sida ke bujang berani mega kelimpah ari ke netak rekong munsoh nya sampai putus mega lalu ngambi pala munsoh nya, lalu di entak ka sida ba bau ari kiba sekali, lalu baka nya mega ba bau ari kanan sekali sereta lalu nyimbang pala munsoh nya laban ka kena ngulih ka untak munsoh sida ke lalu diempa sida iya mata. Nyadi pengawa ke dikerja sida baka tu dikumbai kitai bansa Dayak Iban “Mandi Darah”. Kebuah sida Bujang Berani enda tau enda mandi darah nya laban ko penemu sida kelia nya siti ari chara sida tau ngering ka bulu diri tauka ulih nambah ka pemerani ati sida ti ka nurun ngayau baru ka dudi agi ari nya ila.
Nyadi kebuah bansa Dayak Iban tu ngayau kelia iya nya: Kesatu, ketegal sida ti nan ka temuda rimba diri empu ari kena ambi orang bukai. Kedua, ketegal ngiga diri ka dikumbai orang Bujang Berani. Ketiga, ketegal laban ti ka bebalas ka orang ti buya kala udah ngachau sida dulu agi ari nya. Lalu keempat, ketegal sida ti ka ngalah ka menoa orang bukai ngambi ka sida iya bulih maioh agi temuda rimba alai ngidup ka diri.
Lalu ngayau tu mega bisi dikumbai orang “Kayau Serang” enggau “Kayau Anak”. Nyadi reti Kayau Serang tu iya nya orang ti nurun ngayau ngalah ka menoa munsoh nyerang bebala maioh sereta betesau bebai nurun ngayau nitih ka padah tuai ngena “Bejalai Ka Temuku Tali” enggau “Bungai Jarau”.Nyadi sida ka nurun ngayau tu sigi ka ngalah ka menoa munsoh tauka ngalah ka rumah panjai bala munsoh.
Nyadi reti Kayau Anak tu iya nya orang ti ngipa munsoh sida betuboh mimit ba sebelah umai tauka ba sebelah tanah maia munsoh ti nurun maku nubu tauka mansai nubai. Nyadi sida ke Ngayau Anak tu mega semina ngelari ka diri udah sida iya ulih munoh munsoh sereta naban ka pala munsoh ti udah ulih dibunoh nya tadi.
Udah bala sida ka ngayau tu tadi bulih pala munsoh tauka udah menang ngalah ka rumah panjai munsoh, sida iya enda tau sekali-kali lalu mulai ka diri niki ngagai rumah panjai sida empu tang sida iya dulu diasoh orang nganti ba sebelah pendai tauka ba sebelah tengah laman rumah panjai sida nya tadi. Kebuah sida tu enda diasoh beguai niki laban sida iya mesti ka diasoh orang dulu mangka ka “Selaing” ti kena nanda ka sida udah datai pulai ngayau lalu orang ka diau di rumah pen nyamai ga nyendia ka diri nyambut penatai sida nya ti ka nuntong niki ka rumah panjai.
Nyadi gaya munyi selaing ka dipangka ka sida iya nya baka tu lalu reti jako Selaing tu iya nya leka panjong nyawa bala sida ti datai kena ngerak bala ka bisi diau di rumah. Keterubah; munyi Selaing ti dipanjong ka sida nya bisi tujoh genteran ti kena nanda ka bala bujang berani ti pulai nurun ngayau nya rat bendar lalu menang sereta bulih bendar pala munsoh, reta tengkira enggau ulun. Kedua: munyi Selaing ti dipanjong ka sida bujang berani nya tadi semina naka tiga genteran aja ti nanda ka sida iya menang ngalah ka bala munsoh tang bala sida mega bisi parai ulih di bunoh munsoh. Ketiga: enti munyi Selaing sida ka pulai ngayau nya semina naka segenteran aja, nya nanda ka sida ti nurun ngayau nya nadai bulih pala munsoh tauka utai bukai. Lalu penatai sida ka baka tu nadai dirami sida serumah baka ka nyambut penatai sida ti meruan.
Udah bala sida ke pulai nurun ngayau nya tadi mangka ka Selaing, dia sida iya lalu ngasoh orang ka nyadi seruan sida madah ka orang ti tuai di rumah ngambi ka nyendia ka diri ka nyambut pala munsoh ka udah ulih sida nya tadi. Nyadi leboh sida iya baru ka niki ka rumah dia mega orang indu ke tau jari, tau gar, tau takar, nemu ngembun, nemu betenun lalu diasoh orang beselampai ngena pua kumbu sereta nyambut antu pala (pala munsoh) nya ngena chapak batu tauka chapan. Dia orang indu ka bukai lalu nyangkah nyambut antu pala nya tadi besilih-silih naku antu pala nya niti rumah nyentok ka antu pala nya nyau datai ba bedilang ke ka alai sida nyalai pala munsoh nya tadi.
Nyadi pengawa orang ka nyambut penatai bala sida ka pulai nurun ngayau tu iya nya bisi empat rengat.
Keterubah nya dikumbai orang “Ngiring Bujang Berani”. Nyadi pengawa ka dikumbai orang ngiring bujang berani tu iya nya, sida nyambut penatai bujang berani ngena gendang ajat ke lalu ditangkan ka enggau Gendang Rayah. Udah nya sida iya lalu ka baru pulai ngayau nya ka ditabur ngena beras kuning (beras ti dichampur enggau kunyit). Udah nya lalu ditangkan ka pengawa bebiau kena ngangau ka bala petara enggau utai bukai ngambi ka rumah sida iya ila tau chelap embab, nadai bulih penusah tasah tauka parai.
Lalu bagi ti kedua, iya nya pengawa “Nyimbang Buloh”. Nyadi reti pengawa nyimbang buloh tu iya nya bala sida ti udah nyadi Bujang Berani ka diasoh nyimbang buloh, iya nya siti buloh ka udah dilintang ka orang kena ngempang pejalai sida leboh ka bejalai ka niki niti rumah. Nyadi reti pengawa Nyimbang Buloh tu iya nya kena mandang ka gaya pendiau bala sida ti baru pulai ngayau nya tadi nadai tau bisi utai nekol tauka melintang ngempang pediau sida ka dudi hari ila.
Lalu bagi ti ketiga iya nya “Ngindik Batu Penchelap”. Reti ngindik batu penchelap tu iya nya bala sida bujang berani ka deka tama dalam rumah panjai nya diasoh ngerendam tumbit kaki sida ba batu penchelap ti udah direndam orang dalam ai ba dulang ti diengkah pala tangga kena nanda ka sida iya udah nyadi orang ti dipebasa sereta lalu nyadi bujang berani ba menoa nya. Lalu baka nya mega leboh kaki sida ngindik batu penchelap, dia orang ka tuai lalu nata pala sida bujang berani nya ngena ai penchelap ti ngayu ka bala sida bujang berani nya tau kering sereta enda mudah mantul ngapa ngereja semoa utai dudi hari ila baka gaya batu ti udah alai sida nya tadi berindik.
Lalu ba bagi ti keempat iya nya dikumbai “Ngelalu Ka Bujang Berani”. Reti jako ngelalu ka bujang berani iya nya leboh orang maioh mai sereta ngiring sida iya masuk ngagai rumah panjai udah sida iya ngereja utai ka diatas nya tadi. Udah meh semoa bala bujang berani nya tadi dudok dia sida iya lalu ka diasoh orang ngereja pengawa ka dikumbai “Mulai Ka Semengat”. Nyadi kebuah pengawa tu enda tau enda dikerja iya nya ngambi ka semengat semoa sida ti udah nurun ngayau nya tadi enda liar tauka regau ketegal ti udah baru pulai nurun bebunoh ngelaban munsoh sereta ulih begulai sejalai enggau sida serumah ka bukai baka selama.
Nyadi ba sepemanjai pengawa sida ke nyambut bala bujang berani tu orang ke ngajat tauka begendang sigi nadai ngetu ketegal pengaga ati sida iya udah mujor pulai ngayau ngalah ka munsoh. Nya alai berengkah ari nya pengawa ngajat lalu selalu dikerja bansa Iban nyentuk ka sehari tu leboh sida iya bisi ngintu pengerami ba menoa nya.
