ADAT NGINTU PEMATI

Nyadi setiap iko kitai mensia ti idup mesti ka mati. Sereta kitai mensia apus seput dia bala kaban belayan iya lalu nyabak sereta tusah ati tegal pemati iya nya tadi. Mulut iya ti mati nya tadi lalu ditanggam bala sida sebilik ke semak bangkai iya nya tadi enggai ke merangap. Mata iya lalu ditambit enggai ka menchelak sereta tau ngasoh orang bukai berasai takut. Jari enggau kaki iya lalu diunjur rapit enggau pangan diri sereta diadu ka manah-manah.

Orang bukai lalu beguai melintang ka alu ba pala tangga sereta nungkup ka lesung ngimbai pala tangga nya. Kebuah baka tu laban enggai ka sebayan datai lalu niki ke rumah sereta ka ngambi bangkai iya ke baru mati nya tadi. Lalu kebuah alai alu nya dipelintang ka ba pala tangga, laban ba peda bala sebayan alu nya tadi nyadi nabau tauka ular tedong. Lalu lesung nya ditungkup ka ngimbai pala tangga, laban ba peda bala sebayan lesung nya tadi nyadi baka remaung tauka babi bandam. Nyadi bala sebayan ke ka niki ngambi bangkai nya tadi lalu enda nyadi.

BANGKAI DIBERI MANDI

Udah meh iya ke mati nya ditanggam orang, dia bangkai iya lalu diberi orang mandi ngena ai pau, tang enti iya ke mati nya indu dia iya lalu diunsut orang ngena entemut. Nyadi kemaia tu hari laban ke nadai alai bulih ai pau tauka entemut dia orang semina ngemasah ka tuboh iya pia aja, enda tak sampai nyau jempok.

Leboh ke meri mandi dia sida lalu nyabun tuboh iya, nguntin buok iya sereta ngeminyak buok iya, lalu disugu enggau manah baka ke nyikap orang ke ka nurun pegi. Nyadi buok ke diguntin nya semina ngambi nama aja, lalu baka nya mega chara sida ke ngeminyak buok iya. Tembu nya sida lalu ngendas tuboh iya nyentuk ka rangkai bendar. Udah tembu nya baru sida ngali ka bangkai nya ba tikai ti beserak-serak. Baka tikai rotan diserak ka ngena tikai bemban bebuah, tauka tikai senggang, tauka tikai empeda, tauka tikai bekuang.

NGARI BANGKAI ORANG MATI

Udah bangkai nya digali ka manah-mana ba atas tikai, nya baru orang masok ka iya gari. Enti orang ka mati nya lelaki, dia iya lalu digari ngena gari lelaki ke pengabis manah ti dikemisi ka iya enda nyalah-nyalah baka orang ke ka nurun ngabang. Lalu baka nya mega gaya orang ngari bangkai orang ka indu. Udah tembu digari, baru orang ngali ka bangkai nya ba atas tikai ke pengabis manah ti lalu dibai ke ungkup iya parai. Pala iya lalu dipanggal ka ngena panggal baka kitai ka tindok. Lalu tuboh iya ke udah diunjor enggau manah lalu dibap ngena pua kumbu tauka pua ke manah agi dipeda ke dikemisi ka sida sebilik. Nyadi semua macham gari bukai iya ke mati nya, baka kain baju ke enda dikena iya lalu ditikal orang manah-manah, lalu ditugong ka orang semak atas pala iya.

Udah tembu nya baru orang ngunsut kening iya ngena kunyit enggau kapu. Nyadi kapu nya lalu diunsut orang ba pisan iya ari sepiak-sepiak sereta kunyit nya lalu diunsut orang ba kening. Tembu orang ngunsut kening ngena kunyit, nya baru orang ngelintum ngeli iya ngena getah kayu ke udah ditunu. Udah nya baru orang nyapi iya ngena ilum pinang. Nyadi sirih ke di ilum nya enda tau enda dulu disampu orang ngena api, awak ka iya layu.

NGAGA SAPAT

Nyadi leboh orang ngari bangkai nya di bilik munyi ke udah disebut tadi, dia bala lelaki bukai lalu berengkah ngaga sapat. Nyadi sapat tu digaga sida besegi empat sereta betiang empat iti. Kebuah orang enggai enda ngaga sapat laban ngambi ka bangkai enda tak mandang orang maioh ke datai ngulu mantu penusah sida nya sereta mega ngambi ka bangkai nya enda mudah diperaka ukoi tauka mayau. Laban ba penemu kitai Iban enti bangkai nya diperaka mayau tauka ukoi dia bangkai nya tau angkat lalu nyadi antu ngemba lalu ngenakut ka orang ti enggau rabat nya.

Nyadi pemesai sapat ke digaga bala lelaki nya kira ka buka enam kaki lalu pemanjai iya kira ka sembilan kaki sereta lalu peningi iya kira ka lima kaki. Udah meh tembu sapat nya digaga dia orang lalu ngelingi sapat nya ngena tali ke kering agi ngambi ka ulih alai ngeredai pua kumbu tauka pua bukai ti diredai ngelingi iya. Lalu ba atas sapat nya kira ka ba atas alai ngali ka bangkai dia orang lalu nanchang tali ke tau alai sida ngeredai kain lunggi, pua kumbu tauka pua kumbu ti digaga orang ari benang emas ke lalu dikumbai kitai Iban “Baya Pandang”.

NANGGONG BANGKA KA RUAI

Udah tembu pengawa ngaga enggau ngadu ka sapat, nya baru bangkai orang ke parai tadi lalu ditanggong sida ka ruai. Leboh bangkai nya dibai mansa tempuan bilik, dia siko ari bala sida sebilik lalu nabor bangkai nya ngena leka padi. Kebuah ngaga iya baka nya, awak ka iya enda ngerua pengidup enggau pemisi orang ke agi idup di dunya tu ti dikachau iya ari sebayan nyin. Lalu dibai pansut sereta enggau bangkai nya ari bilik ke ruai, iya nya baku sarang pinang ke lalu diengkah orang dalam sapat semak ngimbai bangkai orang ke udah parai nya tadi.   

Leboh bangkai nya udah tama dalam sapat, dia iya lalu digali ka manah-manah, pala iya nunga ngagai pantar lalu kaki iya numpu ngadap ngagai tempuan.. Ba tempuan nya lalu digaga ka orang siti bedilang mit alai sida menyadi ka api. Nyadi api ke dipenyadi ka ba bedilang tu enda tau padam sepemanjai sida serumah nya ke agi nyenggai bangkai nya. Lalu baka nya mega semua macham baiya ke besai agi baka tajau, irun, udat tauka utai bukai lalu diengkah orang ari kaki bangkai semak enggau dinding ba antara tempuan ruai enggau bilik.

Udah bangkai nya digali ka dalam sapat, bala orang ka indu, kalebih agi bala indu sida sebilik lalu baka rauh nyabak baru nungga bangkai nya tadi. Barang bagi sida ke landik agi dia kitai kala ninga leka sabak serabana sida ngenang penusah diri ti di tinggai ka iya ka mati nya tadi.

BAUM KA BAGI DIAMBI NYENGGAI ANTU      

Sereta udah tembu pengawa orang ke nanggong bangkai pansut ari bilik ngagai sapat di ruai, dia orang semoa orang ke lelaki ba rumah panjai nya lalu di tesau orang ka empu pemati baum ngagai ruai iya. Leboh maia baum nya sida serumah berunding ka bagi enggau pemaioh rumah ke semakai enggau sida ti ka di ambi enggau nyenggai antu. Nyadi gaya penyampau rumah ti ka diambi sida nya bisi tiga iti chara baka tu :

1. Nitih ka gaya pemisi puku ti dikeluar ka orang ke empu pemati;
2. Nitih ka gaya atur sempekat sida serumah ba atur leboh maia rabat,
3. Lalu berunding ka bagi penyampau rumah ke ka diambi sida dibai enggau beban santubong. Tang kemaia tu hari pengawa tu nadai agi dikereja laban maioh orang nya ke bisi duit lalu meli santubong ba pasar tauka lalu meli papan ti digaga sida serumah empu nyadi ka rarong.

Udah putus runding sida ke ka ngambi orang kulu kili, nya baru orang ke empu pemati nya lalu ngasoh orang ngambi lemambang indu ke nyadi “Tukang Sabak” ti ka diasoh sida nyabak bebuah tauka nyabak kelulu ka bangkai nya leboh malam ti kedua tauka malam sida ke nyenggai antu ke pengabis iya. Laban selalu iya kitai Iban nyenggai antu tiga malam nitih ka gaya penyauh enggau penyampat kaban belayan sida ke parai nya datai mantu penusah sida. Lalu kala mega orang ke benama disenggai sampai ka tujoh malam baka orang ba Rumah Nyanggun, Sekundong, Paku, Betong ke nyenggai niang Temenggong Ngelambong Anak Libu menya dalam taun 1972.

Udah putus aum nya tadi, nya baru sida serumah ke udah dipadu ka bepadah, lalu nurun kulu kili, katas kebaruh nitih ka bagi rumah ke diasoh orang padah ka sida enda ngira hari nya ujan, siang tauka malam. Leboh sida ke bepadah tu, sida iya enda tau niki rumah orang ke dipadah nya tauka niki rumah orang bukai ke dipansa sida ba serantu jalai. Enti sida iya niki lalu orang ka empu rumah nya ngenggai, dia sida tau kena ukom tunggu orang ke empu rumah nya sigi jabir, ke pulai ngagai mata duit saringgit, manok siko enggau besi ka kering samengat. Udah sida datai ba rumah orang ke terubah kena padah ka sida, dia orang ke nampong pesan sida nya kulu kili, katas ka baroh, nya baru tau niki rumah orang bukai, nyentuk ka pengabis rumah ke kena ambi enggau nyenggai antu.       

BEBAN SANTUBONG

Nyadi hari siti nangkan ka nya ti dikumbai orang “Hari Beban Santubong”. Nyadi utai diban ka santubong, iya nya sebatang lumpong kayu ke numbas iya pemesai ti tau alai nyimpan bangkai. Enti santubong nya digaga ari papan ke endang udah bisi dirumah tauka dibeli ari pasar, lalu kejang orang deka beban santubong nya, dia sida dulu ngenselan lumpong kayu tauka papan nya ngena darah manok. 

Udah santubong nya tembu di ban lalu di bai pulai ke rumah, dia sebedau sida mai santubong nya tama rumah. Sida lalu dulu agi ngenselan santubong nya baru ngena darah manok dua iko tauka babi siko. Nyadi gaya penyampau rumah ke diambi sida enggau beban nya enda maioh. Reti nya nitih ka penyampau ti endang selalu diambi sida ngelama tu.

NYENDIA KA NYENGGAI ANTU

Nyadi orang bukai ka enda enggau nurun beban santubong nya lalu ngereja pengawa bukai nulong orang serumah nya ngaga raran alai ngelulun asi pulut, bisi nya ngambi kayu api enggau begiga ka upa pantu, bisi nya ngambi ruas, lalu bisi mega sekeda nya nulong orang munoh babi tauka jelu bukai ka lauk. Nyadi orang ke munoh babi tauka jelu bukai nya enda tentu tau tak laun berengkah enggai ka laun tembu dibela. Lalu enda sempat dipandok ka lauk orang ke udah nurun beban makai merarau. Nyadi orang ke ngelulun asi pulut nya berengkah ngereja pengawa sida leboh nyau maia ngalih hari.

ORANG DATAI RABAT

Nyadi pengawa malam ke penudi nyenggai antu tu dikumbai kitai Iban “Rabat”. Nyadi orang ke udah kena padah ka rabat tu datai ngagai rumah orang ka empu pemati nya leboh maia nyau lemai hari. Leboh sida niki ka rumah, sida enda disambut baka leboh pengawa ngabang gawai tauka rami bukai. Tang sida dilalu sereta diasoh dudok ba ruai orang ka bisi nudok ka sida, tauka sida lalu terus napat ka bilik kaban belayan diri empu tauka nuju orang ke empu pemati nya tadi.

Nyadi lemambang indu ke diambi nyadi “Tukang Sabak” patut enda tau bengat laun datai lalu nuju ngagai bilik orang ka empu pemati. Awak ka iya tau lalu berengkah nyabak leboh maia jam urong pukul lima satengah lemai lalu ngetu nyabak leboh maia orang maioh bertengkah makai asi lemai nya, berengkah ngirup kopi, leboh maia orang ke bejako ngagai orang maioh nusoi pasal pemati enggau leboh tukang sabak tu ngetu makai pinang tauka nginsap ruku, nyentok ka leka sabak iya nya tembu sebedau orang nurun nganjong antu ka pendam.     

MAKAI LEMAI

Kira pukol lapan malam, bala bulu balang lalu berengkah begerah niti rumah tama setiap iti bilik ngasoh orang indu ke ba dapur nya besungkit ka asi. Leboh orang indu besungkit ka asi di dapur dia orang ka lelaki lalu belatur ka penguang nya dudok berintai-rintai ba ruai rumah panjai nya. Ngambi ka semua tuboh penguang nya dibagi sama rata ninting pintu bilik. Udah asi enggau semua lauk nya disungkit sereta disedia ka magang, bala bulu balang lalu betesau begerah baru ngasoh orang ka lelaki nya betanggong ka pemakai ari bilik ke ruai. Udah pemakai tembu ditanggong, nya baru orang ka empu ruai mai bala penguang nya makai sama sereta belubah-lubah ngambi ka kenyang manah. Leboh maia sida makai tu nitih ka gaya pemisi, dia orang ka empu bilik lalu bisi meri bala penguang nya ngirup arak awak ka bisi dikena sida berandau enggau pangan diri. Nyadi pengelama orang maioh makai maia tu iya nya kira ka satengah jam, tauka naka sejam aja.

MIAU SEBAYAN NGENA MANOK

Nyadi kira leboh kejang orang maioh deka berengkah makai, tauka benong makai, tauka nyau udah tembu makai dia tukang sabak lalu bisi nyebut ba leka sabak iya madah ka bala sebayan nyau udah datai ba kaki tangga rumah panjai nya. Nyadi penatai sebayan nya enti sida diasoh niki ka rumah lalu dibiau siko orang tuai ngena manok ba atas pala orang ke parai nya tadi. Tang enti sebayan nya enda diasoh niki, dia orang tuai nya tadi enggau siko lelaki bukai lalu sama nurun ka tanah. Siko ari seduai nya minching baku sereta ngepit tikai lalu siko agi mai manok. Leboh seduai udah datai ba tanah din, dia seduai lalu ngerembai ka tikai nya sereta baku nya tadi lalu diengkah seduai ba atas tikai. Iya ke megai manok lalu miau manok nyampi minta rumah nya chelap embab udah bekau sebayan nya tadi datai. Udah tembu nya seduai lalu mulai kadiri baru ka dalam rumah.

NGIRUP KOPI

Kira pukol sepuloh malam nya, orang lalu begerah baru, lalu tiap pintu rumah panjai nya nanggong ai kopi enggau roti ka ruai. Nya kopi enggau roti tu lalu diempa orang maioh ke bisi betugong ba ruai. Udah tembu sida ngirup kopi nya baru orang ka indu pansut magang ari bilik mansang ngelingi sapat ninga ka “Tukang Sabak” nyabak bebuah. Nyadi sida iya enda engkeretik duduk ngelinggi sapat nya ari sepiak-sepiak.

BAUM BEJAKO

Apin lama udah bekau orang maioh berengkah ngirup kopi, dia orang ke empu pemati lalu mai semua kaban belayan iya ke semak agi begempuru baum ba bilik iya. Utai ke bebatang bendar ka dibai iya aum sida nya tadi bekaul enggau berunding ka jako ti deka dipansut ka sida ngagai orang maioh, lalu ngenang pasal pediau iya ke parai nya, ngenang bagi adat kena masa pemarai iya nya, enggau utai bukai ti bisi bekaul enggau pemati iya tu tadi. Udah semua leka aum sida tu tadi putus, lalu orang ke ka dipadu asoh bejako pan udah mega dipilih, dia semua sida lalu pansut ka ruai magang. 

Datai sida ba ruai, orang ka empu pemati lalu ngasoh orang maioh datai begempuru ngagai ruai iya. Samoa orang ke menuku agi sereta dipebasa, baka bala tuai rumah, tuai ari tiap buah rumah panjai ke kena padah maia rabat nya lalu diator duduk ngalih ari pantar magang betunga moa enggau orang ke bejako ngalih ari baroh. Udah semua orang terenah dudok magang, nya baru ai arak enggau ai bukai nitih ka gaya pemisi orang ka empu pemati lalu ditanggong ari bilik ka ruai. Ai nya dikena orang leboh maia ke bejako ka pemati nya lagi. Nyadi ai tu diengkah orang ba tengah-tengah pantar ba antara orang ke bejako enggau orang ke diasoh ninga ka jako sida. Nyadi orang bukai ke dibai begempuru kia lalu dudok ari ujong setak ngagai ujong setak ngambi ka sama-sama ninga jako orang lemai nya.

Udah utai nya disedia ka magang, nya baru siko pengari ke udah dipadu ka dulu bejako angkat bediri lalu bejako enggau naka penyimat enda ngasoh orang agi ragak laban orang nyau ka berengkah nusoi rita pemati enggau ninga jako ari orang bukai ti diasoh sida nya lagi. Udah orang maioh nyau jenoh nadai ragak agi, nya baru iya ke bejako nya angkat nusoi kebuah pemarai iya ke disenggai bala maioh malam nya, lalu ditangkan ka orang ke nusoi baka ni ko gaya pemesai adat basa ke patut diberi ngagai niang tu tadi, berengkah ari pana, tungkun api lalu ngagai pengelama ulit iya nya ila. Udah abis jako nya, enti sema ka bisi orang bukai minta saut bala maioh, nya baru orang diberi peluang nyaut tanya. Lalu enti nadai minta saut jako, nyadi naka nya meh rita ka dibai orang maioh pulai enggau rabat ngagai rumah tauka menoa diri empu.

Baka nya mega lemambang ke nyabak ngetu nyabak leboh orang ke bejako ka pemati, enggai ka orang enda tentu ninga leka jako ka ditusoi orang leboh nya. Sereta udah tembu orang bejako, dia bala lelaki ka biak agi lalu belaboh nyibor arak enggau ai irup bukai ngagai samoa orang ke bisi datai enggau begulu dia. Udah tembu tu dia orang ka enda ati ka ninga ka leka sabak lemambang lalu ngangkat kadiri ngagai ruai bukai ke ngejang jauh agi ari ruai orang ka empu pemati nya. Lalu orang ka endang ka ninga ka leka sabak, nya baru enda mindah, lalu meruan duduk ba ruai nya berandau enggau pangn diri enda inggar. 

MAKAI DINI HARI

Nyadi makai asi diator ba antara pukol dua enggau pukol tiga dini hari. Udah orang ka indu tembu nyungkit asi enggau lauk di bilik, orang ke lelaki lalu nanggong pemakai nya ka ruai. Ator orang makai sekali tu sebaka bendar enggau ator makai ba pun lemai tu tadi.

NGIRUP KOPI

Nyadi kira pukol empat dini hari, nya baru orang ngirup kopi. Nyadi gaya ator nya pan sama sebaka enggau chara ator ngirup kopi ka dulu tadi.    

NGANJONG ANTU

Leboh maia hari tekerebak tawas, dia antu lalu diberi makai asi enggau ngirup ai. Papong unggat ke agi empa api dipegai orang ti meri iya makai enggau jari iya. Udah tembu meri antu makai, nya baru samoa perengka ke dikena meri iya makai, baka chapak, chawan tauka mangkok lalu dipechah ka orang. Udah nya lalu dipurok buai ka lubang. Api ba papong unggat pan mega sama lalu dipurok ka baroh rumah. Nya lalu dipanjah enggau teda ai ba labu ai ke dikena meri antu ngirup tadi.

Udah tembu meri antu makai, bangkai nya lalu disimpan orang dalam santubong begulai enggau baiya, baka kain baju, chapak mangkok chawan enggau maioh macham leman utai bukai ke rumpas. Udah samoa baiya nya disimpan dalam santubong, nya baru santubong dipantik ngena paku lawang. Udah nya dia sida lalu map atas santubong nya ngena pua pandang ke diredai ba atas bangkai iya ke parai nya tadi. Udah tembu nya, baru orang maioh nanchang santubong nya ngagai payan ke kena orang ngaling nganjong iya ka pendam.

Nyadi chara orang nyan santubong, enti ruai orang nya semak agi ngagai puting rumah ari ulu, kulu ka ga tunga orang mupok nurun mai iya. Enti iya semak agi muak ngagai putting ari ili, tunga kili ga orang nurun nyan iya. Lalu bisi mega rumah panjai orang semina ngemendar ka orang ke nurun nyan antu nya mupok ari ujong ramu. Reti nya muak ka ili rumah panjai nya. Lalu bisi mega nya nengah ujong tanju diri empu nitih ka jako pekat ba rumah panjai nya ba adat pemati.

Semua baiya ke udah diengkah ba tempuan ruai lalu dibai magang ka pendam nyereta entudi orang ke nyan antu nya tadi. Dulu agi ari orang ke nyan santubong, dia siko lelaki lalu dulu bejalai mai api ke dipenyadi ka ari bedilang semak kaki orang ke parai ti disengai ba rumah nya tadi. Udah orang ke nganjong antu mupok, dia bala orang ke indu ti tinggal dirumah lalu ngesai ka semua tikai ti udah dianchau ba ruai orang ka empu pemati. Bedilang ke endor menyadi ka api sekumbang ka nyenggai antu nya lalu dibuai ka ujong tanju. Lalu baka nya mega rengka ke dikena ngaga sapat lalu dikemas magang    

NUMBAK KA ANTU

Leboh sida udah datai ba pendam, sebedau sida numbak lubang, dia tanah ke ka endor ngaga lubang nya dulu digenselan ngena darah manok. Pia mega beras lalu ditabor ka ba atas tanah nya. Udah nya baru sapa bagi orang ke tuai ba sida sebilik ka empu antu nya diasoh dulu mantap tanah tauka berengkah mantap ka changkul ba endor lubang ke ka ditumbak nya. Udah nya semoa orang ke enggau numbak ka antu lalu ngenselan diri empu ngena darah ke lekat ba pala manok nya enggai ka mamau.

Udah tembu nya dia sida lalu berengkah numbak lubang pendam. Penalam lubang ke ka alai numbak ka bangkai nya kira ka empat kaki pemesai, tujoh kaki pemanjai sereta enam kaki penalam. Orang ke enggau numbak tu besilih-silih numbak ngambi ka pengawa jampat tembu. Udah tembu pengawa numbak lubang pendam tu, dia sida lalu ngaga tangga mit dua iti ke diulor dalam lubang pendam. Semua orang ke enggau numbak lubang pendam nya tadi lalu ngaga pengait mit sereta diasoh tejun ka dalam lubang pendam nya nengah tangga dau iti ke diulor nya tadi. Kebuah ka terjun mai pengait nya laban ngambi ka samengat sida enggau pulai ari pendam.

Sebedau santubong nya diulor ka dalam lubang pendam dia sida ka dulu agi meresi lubang pendam nya enggai ka bisi buya laboh daun idup tauka utai bukai ke enda manah dalam lubang pendam nya. Laban nitih ka penemu tuai enti bisi buya laboh daun idup ba baroh santubong orang ke mati nya tadi ka beduan lalu ka ngasoh utai nyelai nyadi ti ngenakut ka semoa orang ti nganjong antu nya tadi. Udah nya baru santubong diulor dalam lubang ngena tali, lalu samoa baiya iya lalu disimpan orang ka dalam lubang ngimbai tauka diengkah ba atas santubong.

Lalu ditambun ngena tanah enggau naka pengerapit enggai ka pendam tau ngebong.

Laban ba penemu tuai enti pendam nya runtuh, dia iya ngelulu ka pendiau orang ke nampong bilik iya ke parai nya pan deka runtuh sereta nemu pemerinsa ngidup kadiri. Tambah mega nangi enggai ka iya nya tau dikerumbak bandau tauka jelu bukai ti ka makai bout.  Lalu baka nya mega batang payan ke udah dikena nyan antu ka dilumpong tiga ngambi ka enda ngelulu ka orang ke diau ba rumah panjai ke empu pemati nya ka bulih penusah pemati baru. Leboh orang ke nyimpan antu ka dalam lubang pendam, enti orang ke mati nya ukai manang dia pala iya ka diator ngili ka ai. Enti orang nya manang nya baru pala iya ka diator ngulu ka ai. Nya kena ngayu ka iya nangga riam pulai ka tuchong Bukit Rabong,
 

BERAPI BA PEDARA / PESARAN

Leboh orang numbak ka orang parai, dia orang ke berapi ba pedara pan lalu mandok asi enggau manok ke udah dibunoh kena ngenselan pendam nya tadi., lalu ditambah ka enggau lauk bukai sereta digulai enggau upa pantu tauka upa bukai. Apin asi mansau dia siko ari bala sida nya lalu mansang niki ngagai pendam ngitong kelakar kena niap tuboh orang ke bisi enggau datai ngagai pendam ngambi ka sida nyamai nyendia ka pemakai ka semua sida. Nyadi utai ke kelakar tu iya nya pating kayu, daun, batu tauka utai bukai ti ditikau ka tiap iko orang ngagai baka tauka raga ke dibai orang ke ngambi kelakar nya tadi. Datai orang ke ngambi kelakar nya di pedara, dia genap iti kelakar nya lalu diengkah ka iya ba atas genap iti daun ke dikena orang magi pemakai.

PULAI ARI PENDAM

Udah lubang tembu tambun, orang maioh lalu bela mulai kadiri ngagai pedara. Tang orang ke pemadu penudi mulai kadiri, iya deka ngentak ka tiga iti munti tunsang ke udah ditangkal tiga iti kena mebal arong jalai. Kebuah iya ngaga baka nya laban ngambi ka kena nanda penusang orang diau di sebayan, ngambi ka enda tau angkat ngemba kitai ke diau di meenua tu agi jemah ila.

MAKAI DI PEDARA

Udah samoa orang datai dipedara, nya baru orang belaboh makai. Tang sebedau orang maioh tau nyeput pemakai nya dia orang lalu ngasoh orang ke dikarap ka ti empu pemati nyeput pemakai nya dulu. Udah iya nyeput pemakai nya baru orang bukai tau belaboh. Udah tembu makai dia orang lalu sama-sama mulai kadiri ka rumah magang. Nyadi orang ka penudi bendar mulai kadiri ari pedara nya, dia iya ka ngerebah tauka muka semua ringong kayu tauka batu tunku ba pedara nya. Laban enti enda pia, dia nya ka ngelulu ka orang ba rumah panjai ke empu pemati nya agi ka datai baru bulih penusah baka ke udah.

PENATAI DI RUMAH PANJAI

Datai di rumah panjai, semua sida ke pulai ari pendam lalu bedau tau diasoh niki dulu laban ka nanya semua sida nya enggai ka bisi ninga burong ti enda manah. Sida lalu diasoh mandi ka ai magang. Leboh sida datai di rumah semua sida lalu digelumu ka ba ruai orang ka empu pemati sereta lalu dibiau ngena manok dia. Lalu bisi mega sida ke pulai ari pendam tu dipechik ngena ai penchelap enti sema bala sida bisi ninga burong enda manah sekumbang ke mulai kadiri tadi. Sida ke mulai kadiri enti sema bisi ninga burong Jaloh, Kijang, Ketupong, Embuas enggau Beragai dia sida nya enda tau niki ari tangga rumah tang lalu diasoh niki ari baroh tempuan ruai.

MAKAI PANA

Nyadi tinggal orang ke udah nurun nganjong antu nya tadi dia bilik orang ke udah parai nya enda tau diasoh tampak dulu, enti asi pana apin diempa. Nyadi enti iya ke parai nya dibasa ngena pana tampak, tiga iti tumbok asi burak diempa orang ke diasoh makai asi pana nya. Nyadi enti iya asi pana bendar, asi nya chelum, tang leboh hari pana telenga asi burak baru diempa iya. Nyadi pengelama pana nya enda sebaka. Bisi orang dipana tiga hari, bisi nya lima hari enggau bisi mega nya tujoh hari, nitih ka gaya pangkat orang ke udah parai nya tadi dia di menoa menya.

NAMBIT ULIT

Nyadi ulit ditambit leboh hari pana nyau abis. Utai ditambit nyadi ka ulit, enti orang ke mati nya lelaki iya nya : rangki, pelaga, marik, enggau lungga pengeraut iya empu, nya tadi lalu disimpan orang dalam lengguai lalu dipakau ngena rotan. Ulit tu taroh orang ba endor ke likun ba bilik atas sida ka empu pemati enggai ka iya kena tegu orang. Nyadi utai ke disimpan nyadi ka ulit orang indu iya nya : rangki, rawai, tumpa, enggau gelang sagin. Nyadi endor nyimpan nya sebaka enggau ulit orang lelaki. Nyadi pengelama ulit nya tiga bulan. Iya diketas orang ngena antu pala munsoh ke ulih maia ngayau, tauka ngena isang ti ulih orang pulai bejalai ka ulit. Lalu orang ke tau ngetas ulit nya mesti orang ke kala udah basah jari, orang berani tauka orang ti baru pulai belelang, pulai pegi tauka ngayau

ADAT MELAH PINANG

Nyadi cherita ka ditulis sekali tu nusoi adat lama kitai Iban pasal jalai belaki bebini ke dikumbai Melah Pinang. Adat tu di tusoi beripih-ripih berengkah ari pun nyentuk ka ujong.nitih ka sekeda kenang ti kala ditulis niang Alli Majang bekaul enggau Adat Melah Pinang kena 23 March, 1962 lalu ditambah ka aku nitih ka gaya pendiau kitai Iban kemai tu hari kena 24 September, 2012.

Lalu julok ati ka nulis cherita tu awak ka bala anembaik rebak baru ka dudi agi ari  rambau ka diatu enggau ka jemah ila nemu bagi ripih adat asal bansa diri empu ba senentang pengawa Melah Pinang. Endang ari peda mata aku empu, pengerami belaki bebini ngena adat Melah Pinang kamaia hari tu nyau mupok berubah ari kalia, laban nitih ka singkang pemansang dunya, ke maioh agi ngena jako ngemuntang ka pengawa nya ari adat asal bansa kitai Iban nyau majak belinsur limping ari atur pengawa.

Nyadi bengkah ripih pengawa ke nyengala agi ba mata kitai maioh, baka pengerami ngajat enggau bepenchaa sigi endang main kitai Iban ari kalia, tang kemaia tu hari suah diganti enggau betanda, belagu, poco-poco, karaoke nunda main bansa bukai kemaia tu hari. Ukai kitai ngumbai nya salah, lalu enda mega kitai ulih nagang nya, laban nya nitih ka ni bagi iya ti dikerindu ka bala mensia maioh ka lebih agi tauka ni bagi ka muntang agi ba penemu siko-siko. Tang laban bansa kitai Iban endang bisi adat lama, adat asal ari aki ini kitai kalia, nya alai asai ti manah agi ga kitai ngingat ka nya, lalu nemu ni bagi sekeda ari adat nya.

Nyadi baka tu kenu ko asai dalam ati aku, enti cherita kitai udah ditulis dalam endor pengerembai penemu baka ba internet diatu, nya baru iya tegoh ditaruh, nadai tau lenyau agi, lalu sebarang orang deka nemu, deka belajar tauka macha iya dalam surat tauka pengerembai penemu ka bukai. Nambah ka nya mega, diatu nyau maioh mega bansa kitai nyau masuk megai pengarap bukai, lalu adat enggau pengerami melah pinang mansang enda dikena, lalu diganti enggau pengerami baru nitih ka gaya singkang pemansang kemaia hari tu. Nya alai dalam penemu aku siko, asai ka nadai tau pulai ka penyalah tauka penyai enti kitai mupok belajar ka adat lama bansa diri empu, laban nya endang pesaka bansa asal kitai Iban.

Semua cherita ka ditulis aku ditu nitih ka gaya pengerami Melah Pinang ti selalu dikena kitai Iban ba pelilih menoa Kalaka, dalam menua kena pegai Betong. Dalam pia jako kenang aku tu nyerangkong semoa menoa kena pegai ai Batang Krian tauka dalam menoa Saratok, ukai mega adat enggau ator dalam rumah panjai sebuah-sebuah di menoa nya bengat nadai besibil enggau pangan diri, laban atur enggau adat enda ulih digaga semua sama sebaka. Tang iya ka ditulis aku dalam ditu ka tebal agi dikena dalam menoa nya. Nya alai nyangka bisi sekeda utai ditulis aku ditu enda selubang enda senentang enggau penemu ka kala dikena di menoa kita tauka enggau pengingat kita, semua utai nya ukai ari ati aku deka ngelimpang ka adat nya, tang tu nitih ka utai ti dikingat ka aku empu sereta ari bacha aku ari bup bukai.

Semoa cherita ke ditulis aku ditu endang tebal agi pengingat aku empu didinga enggau dipeda aku leboh maia pengerami melah pinang. Nambah ka nya bisi ga nya ulih aku betanya ari orang tuai ti endang bepenemu bekaul enggau pasal adat nya, tang nama sida enda ulih dirintai ka aku ditu magang. Lalu apin aku ngelengka ka genteran pun jako tu, dulu aku enda tau enda ngenang niang Benedict Sandin seduai A. Alli Majang ke udah kala besaup berurus ka cherita adat tu lalu kala mega udah nulis cherita nya ba bup ka bukai ka sama bisi nyebut ripih adat Melah Pinang.

KETERUBAH KITAI IBAN DITEMU BEPENYALAH “JADI MALI”

Nyadi terubah Iban nemu mantang orang jadi salah serak ari ajar Sengalang Burong leboh Sera Gunting beleman enggau ibu iya, menydi iya empu ka benama Dayang Langit ke digelar Dara Chempaka Tempurong Alang.

Nyadi ko Sengalang Burong nganu Sera Gunting. “Nuan enda tau enda kena ukum bunoh lalu diukum pantang, laban nuan udah ditemu beleman enggau ibu nuan empu.”

Tang ko kaban menantu Sengalang Burong, “Nya amat aya, laban Sera Gunting sigi endang amat uchu nuan, tang iya ke diau ba nuan ditu tak naka semina datai nemuai aja. Nya alai enti iya lalu diukum bunoh, kesatu iya lalu nadai mai berita tu pulai ka menoa iya empu, enggau kedua enti iya dibunoh kitai ditu, apai indai iya din tentu enda nemu kini ka penunga iya nadai. Tang dalam pia kitai enda nyadi mantang seduai iya, adat bukai tau mega diadu ka kitai, awak ka seduai iya tau betimbang. Nyadi pemesai adat nya ni barang ko penemu nuan empu ngator.”

Nya alai ninga runding bala kaban menantu iya munyi nya, Sengalang Burong lalu bejako, ko iya. “Enti munyi tu bunoh ka babi lapan iko, ka ganti darah seduai. Nyabor lapan iti ka tungkat dunya ngambi ka enda beguyat. Nyadi pelasi menoa enggi lelaki nya sigi rusa, lalu enggi indu nya sigi alas ngerang, tang anak seduai dibunoh, enggai ka ngachau ngudi menoa.”

Udah nya Sengalang Burong lalu ngasoh Sera Gunting ngingat ka adat kena betimbang, kena ngadu ka menoa sida din enti sida bisi ditemu beleman ngemesai tu penyalah :

1. Enti beleman enggau anak (ukai jadi) kena pantang;
2. Enti jadi enggau mentua, indai bini tauka apai laki, kena pantang;
3. Enti beleman enggau anak diri empu, anak iru, anak tiri ke udah nyadi anak kitai, kena pantang;
4. Enti beleman enggau mentua, menyadi indai bini tauka apai laki kitai,  lelaki ka kena tunggu babi siko, lalu ka sangkar babi nya tujoh igi jabir. Seduai tau jadi salah serak. Lalu besapat mandi di ai,
5. Enti serak satu enggau serak dua, babi siko ari lelaki, lalu ka benda semilan igi jabir; enggi indu babi siko, lalu ka benda tujoh igi jabir. Seduai tau jadi lalu babi nya dibunoh ngena nyabor. Lalu besapat mandi di ai.
6. Nyadi enti serak dua enggau serak tiga, ari lelaki babi siko, lalu ka benda sigi alas ngerang; enggi indu babi siko, lalu ka benda sigi panding. Babi lalu dibunoh ngena nyabor. Lalu besapat mandi di ai.
7. Enti serak tiga enggau serak empat, lelaki babi siko, lalu ka benda sigi panding, tu ka dikumbai “besapat di darat” tauka “ bekalih di darat”. Babi dibunoh enggau duku tauka nyabor tang mesti bebutoh kunding ka beliong.

Nyadi adat tu dikena tujoh serak. Nya alai datai ba tuboh Beti ka digelar Bujang Berauh Ngumbang, dia lalu bisi baru orang ditemu sida beleman, seduai nya Abang enggau Dayang Tali Bunga. Nyadi Dayang Tali Bunga nya anak petunggal Abang empu. Seduai tu patut disapat, tang seduai ga bepenyuntok lalu enda ulih ngisi adat nya, nya alai lalu ka diukom dibunoh pantang ngena aur oleh Beti. Kejang leboh sida deka mantang seduai iya, dia sida meda antu ka benama Puntang Raga bejalai mansa sida, lalu ngangau nanya ka nama pengawa sida Beti dia. Beti lalu madah ka diri deka mantang Abang seduai Dayang Tali Bunga, laban seduai jadi salah serak satu nangga dua. Ninga munyi nya antu Puntang Raga lalu bejako.

“Enti baka tu jalai nuan ngator mensia Beti, tak abis semua mensia mati.” Ninga munyi nya dia Beti lalu nanya ngagai antu Puntang Raga nama adat ke patut dikena. “Adat,” ko antu Puntang Raga,  “Babi dua iko bunoh kita; siko bunoh di ai lalu siko agi dibunoh di darat kena kitai nasih ai enggau tanah, Nyadi benda enggi lelaki semilan igi jabir, lalu enggi indu iya nya benda tujoh igi jabir, laban Abang jadi enggau anak petunggal iya empu ka baru naka sekali petunggal enggau iya empu.”

Antu Puntang Raga lalu enda agi ngasoh ngena adat dibunoh bepantang ngena aur. Enti orang beleman enggau serak ari atas tu endang enda sekali-kali tau jadi. Kemaia tu enti pengawa ke baka tu nyadi lalu dipedakwa ka ngagai perintah dia orang ke ngereja pengawa nya ka kena ukom jil lalu enda sekali-kali tau diasoh jadi. Enti beleman ari serak tu ka baroh, dia seduai ka diasoh “besapat ka ai” magang baka adat ka udah disebut tu tadi.

GAYA UKOM PENYALAH JADI MALI

Nyadi jeman dulu kalia kitai Iban enti jadi mali baka anak jadi enggau apai tauka indai, tauka jadi enggau aya enggau ibu, tauka mentua jadi enggau menantu, tauka menantu jadi enggau mentua indu tuaka lelaki, dia seduai iya ka kena ukum bunoh kedua-dua iko seduai ti udah ditemu ngereja penyalah nya. Nyadi jalai orang ngukum bunoh seduai nya, iya nya ngena buloh aur ke udah dilancham orang tajam bendar ba putting ke lalu dipantang ka ba tuboh seduai ti begembar-gembar dalam lubang tanah, indu digalika ari baroh lalu lelaki nya ditingkap ka ari atas. Lalu dia mega seduai iya lalu ditumbak ka idup-idup, serta lalu buloh aur ke ditanam ba atas bangkai seduai nya lalu dikena orang ngingat ka alai bangkai seduai ke udah parai dipantang. Nya alai di sebelah menoa kitai bisi buloh ka dikumbai orang buloh aur pantang, lalu ulih dipeda turun menurun kitai Iban nyentuk ka kemaia hari tu datai ka belama-lama iya ila.

Kebuah alai kitai Iban badu agi ngena ukum bunoh dipantang ngena buloh aur, bepun ari jerita indu siko ka benama Simbah, ka dulu kalia nambah ka ajar Sengalang Burong ti baru di tusoi ba pun cherita dulu tu tadi. Laban cherita tu enda bepun ari tusut, nya alai kitai enda nemu ni pengamat tauka pemula cherita tu ke kala nyadi kalia.

Nyadi Simbah tu siko indu dara, tang nyau kelama dia iya bisi dipeda orang ngandong. Meda iya ngandong baka nya, dia iya lalu ditanya orang sapa bagi orang ke bisi datai ngayap ngagai iya ti tau ngasoh iya betuboh bisi baka nya. Tang laban Simbah ke digayap menyadi iya empu, nya alai iya enggai madah ka orang sapa bagi orang ka enggau iya beleman nya. Laban enggai ka diri di ukum bunoh dipantang orang ngena buloh aur. Dia kandong iya pan nyau chukup bulan, dia iya pan lalu beranak. Nyadi leboh iya ka beranak dia menoa lalu balat bendar kudi, hari nyau siang malam ujan belama sereta enggau kabut ke nadai nemu ngetu. Tanah mega balat bendar tusor di maioh bengkah endor, lalu mensia pan nadai ulih nurun gawa ka tanah laban hari semampai selalu jai.

Meda hari enda badu kudi, dia apai indai iya enggau orang maioh lalu minta iya enda tau enda madah ka sapa bagi lelaki ka udah enggau iya beleman nya. Lalu enti Simbah tu enggai madah dia orang maioh lalu besemaia deka munoh iya, meda hari kudi bengat enda nemu badu. Nyau hari siti apin orang deka munoh iya, dia Simbah lalu berua nimang anak iya di ruai, lalu didinga orang maioh munyi tu:

“Adu-adu anak aku ukai nadai apai,

Endang bisi orang ngayap,

Tang deka aku madah,

Takut ka adat berat,

Anang munoh aku,

Enti aku salah tau betimbang,

Besapat di ai besapat di darat,

Bunoh ka babi siko di darat,

Lalu siko di ai, babi emperingat,

Ambi ka duku siti dikena mantap urat lensat,

Beliong lajong kena mungga urat melabat,

Jalong jebong kena nundong,

Tekuyong baroh ungkap,

Pua kumbu muau kena kitai miau,

Moa hari balat betakat,

Sumpit tapang kena ngerejang lubang kilat,

Udah nya baru ukum benda rusa,

Kena besapat ngambi ka kena muai pemali.”

Ninga leka timang iya munyi nya dia sida serumah lalu berunding tekala nya. Lalu sida madah ka sida enda nyadi munoh iya enti iya madah ka sapa bagi lelaki ka enggau iya ngereja penyalah beleman nya, tang sida ka ngukum iya nitih ka sebut iya dalam leka timang iya nya. Dia Simbah lalu madah ka lelaki ti enggau iya beleman nya benama Lamit, menyadi iya empu betampung pala, ti ngayap iya lalu ngasoh iya ngandong.

Udah nemu nya, orang maioh lalu ngereja nitih ka semua adat ti udah disebut Simbah nunda ba leka buah timang iya nya tadi. Sereta sida udah tembu ngereja nya, hari pan lalu manah baik baka ka dibuai empeleman. Simbah seduai Lamit enda jadi, laban seduai tak diri menyadi betampong pala. Nyadi pengudi hari nyau tedoh udah bekau penyalah seduai ka beleman udah diadu ka bala maioh ngena adat betimbang munyi ko leka timang Simbah ke berua nimang anak iya diruai.

Nyadi adat Simbah seduai Lamit tu lalu ditampong kitai Iban nyentuk ka kemaia tu hari . Enti orang bisi jadi belaki bebini salah serak tauka butang betumbang enggau pangkat anak tauka apai, tauka indai, tauka mentua enda tau enda diukum ngena adat lama kitai Iban tu, bunoh ka babi kena besapat ngambi ka enda ngudi menoa.

Ukum perintah nya siti ga jalai ke baru kemaia hari tu, lalu enda tau enda di tinggang. Enti orang ke salah nadai utai kena betimbang dia iya deka dijil perintah ba rumah tutup. Satu nangga dua nya anak salah tauka jadi enggau aya lalu disapat didarat enggau di ai. Enti nitih ka cherita tu anak tau jadi enggau aya, tauka ibu menyadi apai tauka menyadi indai.

Tang adat perintah diatu seduai enda tau jadi. Dua nangga tiga, reti nya anak jadi enggau petunggal apai tauka petunggal indai lalu besapat di darat aja ngena babi sesepa sereta ukum benda sigi alas. Adat perintah, lelaki ka kena ukum tiga puloh keti, lalu indu dua puloh keti pulai ka perintah tang seduai tu tau jadi.

Ari cherita tu alai kitai kemaia tu hari badu agi ngukum bunoh mantang orang ngena buloh aur ka ditemu jadi tauka beleman enggau pangan diri ntih ka salah serak. Agi mega iya ka bendar bepun ari ajar Sengalang Burong ngagai Sera Gunting leboh Sera Gunting enggau ibu iya empu, iya nya menyadi indai iya empu ke benama Dayang Langit ke digelar Dara Chempaka Tempurong Alang ti udah di kenang dulu ari tu tadi.

Agi mega ba tusut Sengalang Burong ke ka dikenang kitai dulu agi ari tu tadi, dia kitai ka ngena jerita antu ke benama Puntang Raga ka ngajar Beti enda ngasoh iya mantang Abang ka deka jadi salah serak enggau Dayang Tali Bunga laban ka tegal seduai ti suntok nadai utai ka dikena seduai betimbang.

Nyadi penyampau rega Benda Tunggu enti dipulai ka ngagai nyawa mata duit ka dikena dalam menoa Bagi Kedua kena pegai Saribas enggau Kalaka iya nya baka tu :

1. Benda Sigi Menukul pulai ngagai nyawa duit iya nya RM00.50 (Lima puloh sen)
2. Benda Sigi Jabir pulai ngagai nyawa duit iya nya RM01.00 (Satu Ringgit)
3. Benda Sigi Panding pulai ngagai nyawa duit iya nya RM02.00 (Dua Ringgit)
4. Benda Sigi Alas Muda pulai ngagai nyawa duit iya nya RM04.00 (Empat Ringgit)
5. Benda Sigi Alas Ngerang pulai ngagai nyawa duit iya nya RM05.00 (Lima Ringgit)
6. Benda Sigi Rusa pulai ngagai nyawa duit iya nya RM08.00 (Lapan Ringgit) 

Kabuah alai madah ka pemesai sekeda adat tunggu benda dipulai ka ngagai nyawa duit diatu laban cherita tu bisi mansa sekeda ari utai tu. Kenu ko cherita dulu kalia tunggu kitai Iban nadai disebut ngagai nyawa mata duit, laban nyangka rambau nya bedau bisi perintah megai menoa kitai tu tauka orang bedau bisi nemu bekena ka duit maia nya kalia. Nyadi rintai tunggu tu nya semina diteba ka ba tengah aja, bisi ka mit agi ari nya nyentuk ka ngagai sigi Mangkok Batu lalu bisi mega ka besai agi nyentuk ngagai Rusa Lelaki, tauka Menaga. Tang iya ka selalu dikena kemaia tu hari nya ka disebut ditu tadi.

Tunggu endang sigi nitih ka baka gaya enggau pemesai penyalah ti dikereja orang nya. Bisi penyalah baka tunggu pemalu, ka semina tunggu benda aja lalu nadai enggau manok enggau babi. Bisi mega enggau manok tauka babi aja enda bebenda lalu bisi mega tunggu enggau manok tauka babi seretaa enggau benda baka ka udah disebut tadi ka dikumbai sangkar. Ka tambah  nya nitih ka gaya penyalah bisi mega ditambah ka besi, lungga, duku tauka nyabor, nyadi ka kering samengat enggau benda mega nyadi ka kurong samengat. Disebut ngena jako pandak duit nya tauka ganti benda diatu nitih ka pemesai nyawa sida  ngagai mata duit baka ke udah diatur  di atas dia tadi. Taja diatu enggau duit, tang nama benda agi bisi disebut, enti enda nya nyau ukum perintah disebut baka keti tauka pikul. Tang nitih ka dalam tusun Adat Iban 1993 dia jako Tusun Tunggu nyau disebut kitai ngagai Mungkol.

ADAT BELAKI BEBINI

Nitih ka adat Iban ukai siti jalai orang tau jadi melaki bini, bisi rami lalu bisi ga enda nitih ka peneka ati, ni ti deka dikena. Tang baik ka rami tauka enda enti orang jadi enda tau enda beterang ngagai tuai rumah tauka enggau apai indai. Umor alai tau bebini, belaki enda tentu temu nitih ka peneka, amat ga nitih ka adat Perintah abis biak alai tau belaki bebini umor mesti limabelas taun. Tang nadai orang ke bebini belaki udah kena salah laban jadi apin chukop umur, agi mega maioh enda nemu umor diri ke betul. Kenu ko orang rebak ke tuai agi sida laun agi bebini belaki ari rebak ka diatu, tang aku enggai nusoi kebuah alai pia.

Semina ditu aku deka nusoi maioh macham orang ka tau jadi belaki bebini ;

( a ) Melah Pinang – Enti melah pinang orang ka jadi belaki bebini enda tau enda rami. Nyadi tu meh pengawa ka pemadu besai dalam adat kitai Iban belaki bebini.

( b ) Anjong Lelaki – Enti lelaki dianjong ngagai rumah indu, pengawa belaki bebini tu kurang agi ari pengerami melah pinang, lalu jalai chara ngitu pengerami nya pan bebida mega. Bisi mega nya bebala maioh, lalu mai orang ari rumah panjai bukai lalu suah mega sida tu semina betuboh empat lima iko aja orang ke nganjong lelaki, nitih ka gaya pengelantang pemisi sida ka empu pengawa enggau peneka ati diri.

( c ) Lelaki nama kadiri ngagai bilik indu sama ari ator apai indai – Pengawa baka tu nadai pengerami, semina sida iya beterang ngagai tuai rumah aja, lalu enti sida iya deka dia sida tau ngempuru ka sida serumah nya aja, lalu enti sida enggai pengawa tu tau ga enda iboh dikereja.

( d ) Lelaki nama kadiri ngagai bilik indu ari ator enggau pengeras ati iya empu, lalu nadai penerang ari apai indai iya. Nadai pengerami, tang semina beterang aja ngagai tuai rumah enti apai indai sama nadai nagang. Lalu enti apai indai bisi enda ngasoh dia pengawa nya tau pulai nyadi ka pengachau ka dudi hari ila.

( e ) Indu nama kadiri ngagai bilik lelaki betuboh puang. Enti lelaki enggau apai indai iya nerima, lalu apai indai indu mega nadai nagang, dia seduai iya semina beterang ngagai tuai rumah aja, seduai lalu jadi diri melaki bini. Enti apai indai seduai bisi nagang pengawa seduai nya, dia pengachau bisi ka nyadi ba kaul seduai tu.

( f ) Indu nuntong ka kandong. Enti kandong indu nya bedau dipansut sereta bedau kala dibunoh ka manok nyadi ka genselan kena mansut ka kandong, dia indu nya enda tau dianjong ngagai rumah lelaki. Enti manok udah mati kena ngenselan  kandong, nya baru tau nganjong indu nya ngagai lelaki ka diambu iya nya nyadi ka laki. Mansut ka butang pan sama sebaka jalai enggau atur baka tu. Mansut ka kandong enggau butang enda tau sekali-kali ba rumah orang bukai tang ba rumah seduai ke beempu tuboh nya empu.

Nyadi nya gaya semoa macham jalai bansa kitai Iban tau jadi diri melaki bini. Pengawa Melah Pinang nya endang siti ari pengawa ka pemadu manah ari semua atur dikena kitai bansa Iban belaki bebini, tang taja pia maioh ga orang ke ka jadi keran tauka jadi betaban, tau begulai melaki bini sepemanjai umor sida nguan menoa tu. Lalu orang ke Melah Pinang nya mega sama bisi sarak tauka beranak telesak. Diatu aku deka nusoi baka ni gaya ripih pengerami pengawa melah pinang bepun ari pengawa nanya indu nyentok ka ngagai pengawa seduai iya sarak sepengudah seduai ti begulai sejalai selepas pengawa melah pinang nya tadi.

NANYA BINI

Nyadi pengawa orang ke nanya bini tu bisi tiga bengkah penumboh iya.

( 1 ) Sabengkah nya, indu endang sigi deka jadi ka lelaki nya laban seduai udah kala bekelala tauka indu nya kala udah digayap lelaki tu tadi. Lalu apai indai indu nya pan endang sigi deka mega nerima lelaki nya nyadi ka menantu sida. Sekali ka udah ditinggal ka iya utai baka tinchin tauka tanda bukai, laban seduai iya sigi amat keran deka jadi diri melaki bini.

( 2 ) Nyadi sabengkah agi penumboh nya berengkah ari pun jako bungah enggau jako sabong apai indai indu enggau lelaki tauka kaban belayan seduai empu. Nyau mansau jako bungah apai indai lelaki nya tadi dia sida iya lalu nanya ka peneka ati anak bujang seduai iya bebini ka indu dara nya. Enti iya udah nyangup deka, dia sida apai indai iya lalu nurun betemu enggau apai indai indu nya tadi beribut ka jako tauka lalu  nganjong orang bukai nyadi ka seruan madah ka ni maia timpoh hari bala sida ka deka datai mansang nanya indu nya tadi.

( 3 ) Nyadi sabengkah agi chara nya dikumbai kitai ngerambang, laban indu enggau apai indai iya nya apin tentu temu deka tauka enggai, laban nadai kala beribut ka jako dulu agi ari nya, lalu anak lelaki nya pan nadai ga kala ditemu mansang ngayap indu nya tadi.

Apin nurun nanya bini, dia apai indai lelaki nya tadi dulu agi ngempuru ka bala kaban belayan ti di keberat ka seduai iya apai indai lelaki nya tadi. Lalu sama mega semoa sida serumah digempuru ka magang madah ka pengawa diri ti deka mansang nanya bini. Enti kaban belayan ka ditesau nya nadai nagang nya baru nimpoh maia hari sida nurun. Tang sebedau nurun dia sida dulu agi nganjung orang ka seruan ngagai apai indai indu nya awak ka sida ngadang nerima penaatai sida ila lalu enda mindah ka bukai maia hari ka ditimpoh nya. Nyadi penyampau pemaioh tuboh orang ka enggau nurun nanya indu nya, sigi nadai beletak, tang jarang kala kurang ari lima iko, lalu kemaia hari tu mega kala lebih ari dua puloh iko.

Dulu kalia nadai tentu beleman oraang ka nurun nanya bini, tang kemaia tu hari nyau nitih ka gaya pemisi sida ka empu pengawa. Bisi nya nyau bebai ka arak enggau kopi roti mega. Enti Tanya nya ukai ngerambang semoa utai ka dibai sida ka mansang nanya indu nya sigi dibai tama ngagai bilik indu leboh sida ka datai. Tang bisi mega sida ke datai ngerambang nanya indu nya, semoa utai ke dibai sida baka arak dilalai ka ba sebelah tanah tauka diengkah ba sebelaah bilik orang bukai dulu. Kabuah pia, enti jako sida nya enda diterima dia utai ka dibai sida nya lalu enda diserungkai tang ka dibai sida pulai. Bisi mega orang ka enda mujor nanya indu tak lalu mulai kadiri malam nya enti sema rumah sida enda tentu bengat tak jauh iga. Nya kebuah sida nya tak lalu pulai malam laban kelalu malu kadiri enda mujor nanya bini.

Leboh bala sida ke nanya bini tu tadi datai ba ruai indu ti deka ditanya sida, dia sida lalu dilalu ka baka ti enggau temuai maioh. Udah sida badu makai lemai nya, dia apai indai indu lalu nesau ngumbai sida serumah sama datai begempuru ba ruai sida. Sida ka indu pan lalu sama dipinta pansut ari bilik sama enggau dudok ba ruai nunga temuai. Udah semoa orang sampal dudok, nya baru apai indai indu bejako nanya ka pejalai ngagai bala sida ke datai. Enti sema apai indai indu nya enda tentu tak nemu bejako dia iya tau ngasoh orang bukai bejako ngari ka iya. Enti bisi penemu, lalu leboh maia tu dia sida selalu bekena ka jako karong panjai kena nimbal penemu pangan diri ari sepiak sepiak. Enti apai indai indu nya tadi udah putus nerima jako sida ke datai ba ruai lemai nya, nya baru sida iya ngasoh dua tiga iko bala indu ka bukai mansang nanya batang tuboh indu nya empu di bilik, laban deka pan apai indai enti indu ka empu batang tuboh madah kadiri enggai, dia pengawa nya tau enda ulih dipenyadi..

Lalu enti indu nya empu udah nyaut madah kadiri deka, nya baru pengawa nya terus dipenyadi ka. Leboh maia nya mega dia sida lalu bejako mutus ka sapa bagi seduai ti deka dipenyadi nya nguai ka pangan diri. Kebuah enggai enda nyebut jako nguai laban enggai ka seduai ti udah diatur jadi melaki bini tu jemah ila tau nadai bilik alai datai nyadi ka pemulai ka penyangkai,. Leboh maia bisi pengawa lantang tuaka maia kena tuntung penusah lesi bebadi. Enggai ka kaban belayan tau berebut ka bangkai iya ti udah parai nya ila. Udah putus jako apai indai lelaki ka mansang nanya indu ka bini nya dia sida lalu bisi ninggal ka utai nyadi ka tanda baka tinchin, lampit tauka utai bukai ti nyadi ka pengamat sida bendar nitih ka semaia jako sida ka malam nya. Lalu berengkah ari malam nya dia indu ka udah ditanya ka bini nya enda tau digayap orang lelaki ka bukai agi..Udah nya baru sida iya nimpoh ni maia hari sida alai deka ngereja pengawa rami melah pinang. Enti sema ka sida lantang lalu utai ke ka dibela pan bisi udah disedia ka magang, dia sida lalu deka ngaga timpoh ka lebih serekat agi, kira ka chukup alai timpoh sida ngemansau ka tuak, itong ari kira ka dua tauka tiga minggu baka nya, tang selalu dikereja ngintai ka bulan mansang.

Udah tawas hari, lalu tembu sida iya makai pagi, bala sida ka datai nanya bini nya tadi pan lalu mulai kadiri magang enggau ati gaga laban pejalai sida udah mujor. Leboh sida udah datai ba rumah sida empu, dia bala sida serumah pan lalu datai ngulu sida ke pulai nya.laban deka nemu berita pejalai sida. Dia apai indai lelaki nya tadi lalu enggau naka pengaga ati nusoi semoa berita sida lalu pia mega iya lalu madah ka timpoh ngagai bala maioh ni maia timpoh sida ke deka nurun ngambi indu awak ka semoa sida ngadang ngering diri ka pengerami nya ila.

Lalu semoa kaban belayan ke diau ba rumah bukai ti diau ngejang jauh agi sereta dikeberat deka dipadah ka magang tauka lalu dikirum ka temuku tali semaia tauka surat padah. Semua penyampau buah rumah ti deka kena padah ka endang udah dipesetuju nitih ka aum leboh malam ka nanya bini nya. Rumah panjai ka semak enggau rumah indu nya deka dipadah ka apai indai indu , lalu sama enggau nganti penatai bala pengabang. Lalu semoa rumah panjai ka dipadah ka lelaki sama ka bela nyadi pengabang nambah ka semua orang ka empu rumah ke sigi endang pun alai ngereja pengawa. Dalam timpoh empat lima hari sebedau ka nurun dia orang ka indu lalu betutok ka tepung sereta begaga ka penganan jala ka dibai sida mansang ngabang. Ba rumah panjai indu nya anang disebut ka agi laban ka endang alai ngereja pengawa, ukai semina sida ka batang ngereja pengawa nya tang semua sida serumah-rumah nya ka sama rugi ka lebih agi enti pengawa besai lalu orang mega maioh dipadah ka datai ngulu pengerami nya.

MANSANG NGAMBI INDU

Sehari apin sida nurun mansang ngambi indu, dia semua kaban belayan lelaki ari rumah tauka menoa bukai pan lalu dulu datai ngagai rumah lelaki begempuru dia. Leboh semua sida nya udah datai, dia sida lalu nyua ka tulong ngagai apai indai lelaki baka arak tauka tuak sereta enggau utai bukai ke ka diberi sida. Lalu leboh malam nya sebedau sida ka nurun hari siti, dia apai indai lelaki lalu ngempuru ka bala maioh enggau sida serumah nya berunding ka  baka ni gaya atur pengawa sida ke ka nurun pagila nya dulu. Baka ngatur sapa ke patut dipadu ka ngari ka bala sida bejako enggau ngereja pengawa ka bukai mega. Udah meh tembu berandau nya tadi dia sida lalu nampong enggau pengerami bukai kena merindang malam, semalam-malam nya, baka ngirup ai bisa, ngajat, berenong enggau maioh macham main bukai ke nyadi ka uti sida nitih ka peneka ati diri..

Leboh hari nyau ka tebererak tawas tauka dini hari dia bala orang ka indu dara enggau sida ka bujang lalu nurun ka tanah belulun ka asi pulut, ngambi ka bisi ka bekal sida ti nurun mansang ngambi indu enggau dibai sida ngagai rumah indu nya mega. Leboh maia sida ka ngelulun asi nya dia sida ka bujang enggau dara tepantup bendar ati bungah enggau pangan diri. Sida ka indu nya besimpan ka beras ka dalam buloh ruas, lalu sida ka lelaki nya lalu menyadi ka api ba raran sereta lalu ngemata ka ruas asi ka dilulun sida nya.Udah meh tembu mansau semua asi lulun nya tadi, semua sida lalu mulai kadiri ka rumah magang laban beguai kadiri ka bekemas nurun mansang enggau orang ngambi indu. Lalu pengawa ka ngelulun asi tu tembu kira ka leboh hari nyau tampak tawas.

Udah semoa orang badu makai pagi, dia semoa orang ka enggau lalu beradu magang ngena ngepan gari ka pengabis manah kena sida nurun ngagai rumah indu. Lalu bala sida ka bukai pan lalu berengkah begendang, betaboh dikena ngumba ngelagu orang ka benung beradu dibilik. Nyadi semua orang ka biak, mit, besai tuai lalu semoa nyikap ngepan diri empu magang. Lalu ngepan ka naka iya pemanah, lalu duku ilang pan lalu ditangkin, lalu sapa ka bisi senapang lalu nurun nyan senapang diri empu. Enti sida iya nurun ngena perau dia bala orang ka indu ti bengepan Iban lalu begari di rumah. Tang enti sema sida ka nurun nya bedarat bejalai kaki dia sida iya ka begari leboh nyau ka datai semak rumah indu. Perau ka alai bala indu nya ka digaga ka kajang lalu ditutup ngena pua kumbu sereta dilagu ngena menira nyadi ka setunggol sereta enggau utai bukai. Lalu ba perau nya mega alai sida iya begendang sepemanjai jalai datai ka sida nyau sangkai ba pendaie rumah indu.

Lalu ditu aku ka ngelansa sekeda pengerami orang ka ngambi indu mansang bedarat ke naka pengumbas iya penyaoh. Leboh semoa orang udah sedia magang, nya baru tuai kayau begerah bebai nurun. Orang ke nyadi tuai kayau ba pengawa mansang ngambi indu tu iya nya apai indai lelaki ke empu bini ka deka diambi sida nya tadi. Laban pengawa ngambi indu tu disema ka enggau pengawa ngayau. Sida ka biak lalu begendang bejalai niti rumah kena ngansak orang ke beradu dibilik, lalu mega meransang barang bagi sapa sida ka lembau enggau nurun awak ka sama ka enggau sida.

Udah tuai kayau begerah ke setak-kasetak niti rumah dia iya lalu nurun dulu ngulu ka bala ti nyan menira tauka setunggol. Sereta sida ka nangkin pedang tauka ilang, tauka malat enggau ni bagi rengka ka bisi dibai sida. Udah nya lalu ditangkan ka orang bukai enggau sida ka begendang nya tadi. Orang ka begendang nya endang selalu ba tengah-tengah rintai tugong bala maioh ka bejalai nya tadi. Lalu barang bagi sida ka begendang nya nyau lelak dia sida lalu minta silih bala pangan sida ka bukai, lalu sida iya besilih-silih ba sepemanjai jalai nya tadi. Sida begendang tu bisi nya ngena gendang ajat tauka gendang gungong. Kebuah sida ka begendang nya tadi laban ukai semina ka pengerami aja, tang enggai ka sida ninga burong jai. Tambah mega, awak ka antu babas, antu keranggas mindah nyeliah ninga munyi sida nya tadi begendang.

Enti menoa numbas iya penyauh lalu kira ka pejalai dua tiga jam lalu datai kira ba tengan jalai ba endor ka bisi ai sereta manah nyadi ka alai sida ngetu dia tuai kayau lalu mai sida nya ngetu merarau. Utai kena sida merarau iya nya asi pulut ti endang udah dilulun sida dirumah tumu pagi nya tadi enggau lauk babi, manok enggau lauk ka bukai. Tang chapak mangkok endang nadai kala mai iya ke udah kala dipeda aku. Nya alai semina naka daun meh ka dikena sida nyadong pemakai ngagai pangan diri. Lalu enti menua nya jauh kira pejalai sehari, lalu suah agi bala sida nya ngetu belelak lalu merarau bechuan ka gaya mata hari kena sida ngelai hari nya udah tengah hari.Tuai kayau tau enda iboh meri bala merarau enti menoa nya kelalu semak lalu nadai alai nyebut gaya penyauh. Udah bala badu makai dia sida lalu mupok baru nampong pejalai sereta enggau munyi gendang nyentok ka bala sida nyau datai.

Leboh bala nyau datai semak rumah indu, maia ba pangkalan tauka ba batang ai tunga ka ngagai jalai muak ari penatai tauka pala tangga, sida lalu dulu ngetu mandi enggau belelak. Badu sida nya mandi dia sida lalu beradu masok ka semua ngepan manah, lalu sida ke bengepan Iban lama, ka lama agi ngemas diri enda baka bala sida ka ngena pakaian ngepan kemaia tu hari ke jampat agi tembu. Kalebih agi bala sida ka indu, laban maioh agi macham rengka dirasok nyadi ka ngepan sida. Ukai main pengerindu enggau pengeransing ati leboh maia tu laban gendang enggau pengerami orang ka dirumah nyau udah didinga, ka lebih agi bala sida ka bujang enggau dara ngemata ka gaya pangan diri ti beradu.

Leboh maia sida ka datai nya ngetu enggau beradu, dia pengari orang ka empu rumah lalu datai ngulu ngelalu ka sida ka pengabang ngagai endor alai sida ka beradu mai manok, piring, menira enggau gendang. Dia mega sida ngasoh sebarang bagi sida ka tuai miring kena ninggal ka burong enggau semoa utai ka jai awak ka enda datai ka rumah. Udah semoa orang tembu beradu , dia pengari orang ari rumah indu nya tadi lalu angkat bejalai dulu ngulu ka bala pengabang ti datai ditangkan ba tuai kayau, udah nya baru sida iya bejalai betangkan-tangkan nitih ka ripih, tuai agi umur dulu agi mupok nitih ka belakang tuai kayau. Lalu udah pupus tuboh bala ka lelaki dia lalu ditangkan ka tuboh bala sida ka indu. Lalu orang ka begendang nya mengkang bejalai ba tengah-tengah tugong rintai bala nya tadi. Sida nya nadai ngetu begendang betimbal-timbal enggau enggi orang ka begendang ari rumah. Gaya singkang pejalai sida pan belubah-lubah nitih ka gendang lalu orang ka bengepan indu enggau lelaki nyau dipeda ngelingut ka pejalai diri mandang ka pemanah gamal. Semoa ma tauka bag gari sida enggau utai bukai ke dibai sida ka datai nya tadi lalu diangkut orang ka empu rumah nya dibai ngagai bilik indu ke ka diambi sida nya tadi.

PENGABANG NIKI

Leboh bala pengabang nyau datai ba tengah laman, orang ka empu rumah lalu nimbak ka senapang, bedil tauka merchun ba pala tangga. Lalu pia mega bala ka nandang kadiri datai ngalah, semoa ka bisi mai senapang lalu ditimbak ka magang nuju ka langit nimbal enggi orang ka bempu rumah nya tadi. Enti bedil maioh, nyau berenyang munyi ke ka runtoh langit laban pengingar iya. Niang Benedict Sandin empu kala nyebut madah kadiri udah meda orang nyelup lebih dua puloh batang bedil besai enggau mit ditimbak ka, sereta enggau senapang ukai ka empaat lima puloh batang leboh maia ngambi indu nya. Nyadi iya enda mega nemu nama batang kebuah bukai alai orang tua tak ka betimbak ka bedil enggau senapang leboh maia rami melah pinang, tang nyangka nadai kebuah bukai kalebih agi ari semina naka ngerindu ka ati aja. Laban pengawa rami melah pinang tu nyau disema ka baka pengawa ngayau kalia.

Lalu ba kaki tangga peniki nya lalu dipelintang ka siko babi ti numbas iya pemesai. Nyadi babi nya tadi lalu digayang kena pengabang niki enggau bedil sebatang dipelintang ka sida ba pala tangga. Lalu ba pala tangga nya mega diengkah ka sida siti dulang ka dikena orang ngembun ke udah bisi ai enggau batu perunsut. Semoa pengabang ka niki lalu nyepoh ka kaki sida dia magang ka dalam dulang nya leboh sida ka nyingkang ari pala tangga. Ba penama nya dia orang ka empu rumah lalu miau pala pengabang enggau manok kena masa sida, tang enda mega tiap iko pengabang dibiau magang. Berengkah ari kaki tangga nyentok ka pala tangga, ari punggang setak nyetok ka punggang setak sepemanjai rumah lalu dikajang ngena pua kumbu magang. Lalu semoa pengabang ka bejalai niki lalu ngensurok nya sepemanjai ruai rumah nya. Baka nya mega pantar lalu diredai ka pua kumbu sapemanjai rumah enti pengabang chukup maioh. Lalu ba penyandih pan diredai ka pua kumbu ka alai pengabang nyandih. Enti enda chukup pua sepengapus rumah bulong ka semina naka pantar orang ka bempu pengawa aja enggau sepintu dua ka ngapit ruai sida nya.

Bala pengabang lalu diwong, dilanggar ngena arak tauka tuak leboh bala sida ka bejalai dibai orang ka bempu rumah niti ruai nyentok datai ka dua tiga iko indu dara enggau lelaki bujang ti nyua ka changkir arak tauka tuak ngagai setiap iko pengabang. Lalu ba sepemanjai-manjai rumha nya dua tiga iko orang ka ngipa ba sepintu bilik sigi udah nganti nyua ka changkir arak tauka tuak. Kadang-kadang mega bisi telaga di tengah rumah, reti nya pasu tauka tajau alai tuak enda tau enda di irup bala pengabang ka niki nya tadi sereta ditakar ngena mangkok ka besai baka jalong. Leboh diwong dia bala pengabang enda tentu ulih nyeliah ngirup arak datai ka sida nyau mutah, nya ka udu ngamah ka dinding enggau tempuan maia sida nya ka niki. Tang laban nya sigi endang udah adat dikerindu ka kitai Iban ti empu rumah.

Enti rumah orang nya panjai, nyau berasai ngelu pala ngirup baru rumah nya ulih diapus ka. Ukai main agi pengerichah enggau pengerami leboh maia pengabang nya baru niki, nyau nadai didinga utai kiba kanan baka munyi alun gelombang ba tasik besai, lalu diumba munyi ngepan bala sida ka indu. Udah apus ruai, nya baru badu nguwong ngelanggar pengabang. Tang agi ga bala pengabang dibai bejalai niti panggau rumah abis kurang tiga kali besundang lalu diulu ka bala orang ka begendang sereta bisi bala orang nya ngajat tauka bepencha kena ngelagu pejalai bala sida nya tadi.

Kabuah alai ngasoh bala pengabang nya tadi bejalai besundang niti rumah kena masa bala sida ka datai, agi mega enggai ka sida nya lebu ngena ngepan, ngena gari manah awak ka semoa orang meda pemanah gaya bala sida ke bisi enggau datai. Udah chukop sida nya tadi bejalai besundang niti rumah nya baru orang ka empu rumah lalu ngasoh semoa sida pengabang nya dudok berengkah ari pantar orang ka empu pengawa ngagai enggi orang bukai datai ka ba penyukop iya alai semoa pengabang nya terenah dudok nat kadiri.

Orang ka tuai enggau orang ka belambar agi lalu diasoh dudok ba pantar orang ka pun pengawa, lalu bala sida ka biak agi lalu diasoh dudok ngejang ka agi ari ruai nya, endang nitih ripih ba adat basa kitai Iban ba rumah panjai. Lalu semoa bala pengabang indu, lalu dibai tama ngagai bilik indu ka deka diambi sida nya. Dibilik din pan baka nya ga gaya, baka ba ruai tadi ga gaya atur sida ngeredai pua kumbu enggau macham utai bukai dikena ngerias bilik baka bungai kertas enggau utai bukai. Lalu leboh maia tu bala ti lelaki lalu ngintu peniki sida ka lelaki di ruai, lalu sida ka indu pan ngadu ka semoa pengabang indu di bilik. Tang semina indu  ke ka diambi ka bini nya nadai dibilik laban endang gaya adat iya udah dilalai ka orang ti empu rumah dulu agi ba sabelah bilik orang bukai ti ngejang ari nya leboh maia pengabang ke ngambi iya nya baru datai.

Udah semoa pengabang terenah dudok magang nya baru orang ka empu rumah ngasoh sida pengabang ka tuai agi bedara. Udah nya baru meri sida iya ai basu kaki tauka ai aus. Ai ka diberi tu ukai nya ai amat, tang ai arak tauka tuak. Udah pupus semoa pengabang diberi ngirup ai basu kaki tauka ai aus, nya baru orang ka empu rumah nya betanggong ka maioh macham utai empa ari bilik ka ruai. Semoa macham utai diempa maia begawai mega baka penganan, penyaran, pulut, letup enggau lauk babi, manok, chapi tauka utai bukai nitih ka gaya pemisi orang ka empu pengawa. Nyadi semua utai empa nya disedia ka dalam chapak, dalam mangkok, atas tabak tauka atas talam magang. Naka ulih meh orang ka empu rumah ngadu ka pemakai nya di moa pengabang kena masa penatai sida. Bisi nya nanggong ari bilik lalu bisi nya ngator di ruai engkah pemakai ba mua pengabang. Dia pengabang endang udah sedia dudok berintai nganti orang ka empu rumah tembu ngadu ka pemakai ba tengah ruai.

Benda rumbang tuak endang udah sedia ditanchang ngelingi tiang ruai lalu dikelingi enggau mangkok tauka jalong takar, bisi nya besai lalu bisi nya mit. Lalu dia bisi siti jalong ka pengabis besai bendar kira umbas tau dikena nangkup pala pemesai moa iya, lalu nya dikumbai orang indu jalong. Bisi mega empat lima iti jalong ka mit agi ngelingi iya, lalu nya dikumbai orang anak jalong. Orang ka tuai enggau orang ka belambar agi enda tau enda ngirup indu sereta enggau anak jalong nya nitih ka pematut  ungkop sida iya. Orang ka diasoh megai takar nya endang orang ka teleba sereta berekat laban tuak tau lubah abis dipegai iya, kenu ko orang. Udah nya baru orang ka empu rumah nyambut pengabang nanya ka burong sida ngena jako karong panjai tauka jako pandak.

Enti ngena jako panjai iya didinga kitai munyi tu :

Orang ke bejako nya lalu nyua ka jari nabi manok sabong pengabang enggau semoa orang katuai ti dudok ari atas,

“Ai buah tu aya / unggal apong beguyah ke bebuah selampor tuai,

Ai tangkai apong nyelelai ka ngererai tekusai bungai,

Nya alai perenchit ka aku mimit dalam chubit changkir bebungai,

Lalu disua ka aku enggau tapa jari megai,

Nya alai nyangka kita bisi ditanya Pungga aya kitai,

Bisi ditentang Puntang Medang ari pengerang rapi umai,

Nyangka Apai Sebalu Jantau bisi ngangau kita ari pulau rapi serarai,

Nyangka Ketupong bisi ensirong raup Beragai,

Batang bisi melintang tengah jalai,

Nya alai nyangka kita bisi betangga ka berayang ke dikumbai kitai mata gansai,”

Nyadi baka tu mega munyi leka jako ti dikena nanya ka burong ngena ai tuak, orang ke bejako lalu dulu nabi jari sida ka tuai dudok ari atas.

“Ai buah melanjan manjah ka bebuah selampor mansau,

Ai sempuli tanah nyadi diberi Sempeti Apai Raja Petara,

Dipie dara tinggi dalam pendi periok temaga,

Lalu disarap dara nelap enggau lipat kain kesumba,

Lalu dituang Endun Kumang dalam baling jebul segala,

Nya alai diatu lalu diperenchit ka aku mimit dalam chubit chawan bebunga,

Lalu disua ka aku ngagai kita enggau tapa jari dua,

Nya alai tu, nyangka kita bisi ditanya aya kitai Pungga,

Ari temuda rapi pulau, nyangka kita bisi ditentang Puntang Medang,

Lalu dikangau ka Apai Sebalu Jantau,

Nyangka Ketupong bisi ensirong raup ensirau,

Batang bisi melintang tuntun atau,

Nya alai tu nyangka kita ke betangga ka isau ganjau dikumbai kitai Nyabor Panjai.”

Tuak tauka arak nya tadi lalu di irup orang ke nyaut, iya nya endang orang ti udah dipadu ka tuai kayau ti datai enggau bala pengabang. Tang orang ke nyaut leboh tu suah agi ngena jako pandak, kabuah pia enggai ka laun makai utai tauka laun makai lemai. Enti bisi burong semoa dipadah ka iya dia, lalu ari nya orang ka empu rumah lalu berunding ka reti burong lalu ngiga berapa iko manok ti kena miau bala pengabang nitih ka baka burong. Enti bisi burong bias, pengabang lalu diasoh ngirup ai takar atas lesong dikena nabar ka burong. Udah manok sedia orang ke diasoh miau pengabang lalu bediri megai kaki manok lalu semoa orang maioh diau jenoh enda ragak mending ka leka biau iya nya tadi.

Tu munyi leka biau iya ;

Iya lalu bediri nunga ka moa ngagai orang ka tuai lalu dulu nyua ka jari nabi sida.

MANOK KUNCHIT

“Sa, dua, tiga, empat, lima, enam, tuuuu-joh !

Hoooha ! Hoooha ! Hooooha !

Nya alai aku ka bediri chegit-chegit,

Nyingkang ka kaki nginsit ka tumbit,

Mansa moa kita kemumok dudok bekempit,

Nengakh kelasah tikai lampit,

Ukai aku mai ati jai ati kudi,

Tang mai ati gaga rindu gagit,

Miau kita enggau selanjau manok kunchit,

Diasoh orang ka empu kerja pun pengawa,

Bebelah ka jeragang pinang sa-siet,

Nya alai aku miau yang, miau semang,

Ari belakang mulai ka tumbit,

Ngambi ka yang ganggam kita,

Enda mai ati tajam,

Baka balan mata benit,

Yang tinggi kita,

Enda mai ati jai ngeransi ngenyit,

Nya alai meda kita ka endang tuga tunggul bait,

Enda bumai enda kala nadai alai,

Ngisi mengkabai tibang sengepit,

Jari sepiak enggi kita teleba matak setawak,

Jari chawit kita lanchat bulih duit,

Enti berumah kita aya endang teleba,

Niri ka kah lamba bait,

Panggau kita enda kala pungkang,

Anchau tikai lampit,

Malam enda kala padam dian lampu pichit,

Nya alai tu aya, ukai biau ngapa biau pia aja,

Tu ga nunda biau Apai Sabit Bekait,

Aka Bujang Beruang Langit,

Dikumbai kitai sapit Raja Petra.”

Dia iya ke bebiau tu tadi lalu bejalai baru lalu bediri nungga ngagai orang katuai ti ngejang agi ari ka dulu tadi.

MANOK TAWAI

“Nya alai aku tu bediri giai-giai,

Nyingkang ka bulang kaki bejalai,

Mansa moa kita ti kemunchak dudok berintai,

Nengah kalasah anchau tikai,

Ukai aku mai ati,jai ati kudi,

Tang aku mai ati gaga rindu amai,

Diasoh orang ke empu kereja pun pengawa,

Miau kita enggau selanjau manok tawai,

Nya alai nasit tu bisi mimit,

Tuah mua pemesai,

Bulu nyeregu balat amai,

Dada bekaka iko kelabu panjai merundai,

Nya alai kena aku miau yang,

Miau semang ari belakang mulai ka gundai,

Ngambi ka yang ganggam kita,

Enda mai ati tajam baka balan mata bilai,

Yang tinggi kita enda mai,

Ati kudi ngeransi besai,

Nya alai laban meda kita,

Ka endang tuga tunggul tuai,

Enti berumah endang teleba,

Niri ka kah teras ragai,

Panggau enda pungkang anchau lambar tikai,

Malam kita enda kala padam dian lampu kedai,

Enti bumai enda kala alai enda berasai,

Ngisi tibang sapengindang penoh engkabai,

Meda jari sapiak kita endang teleba,

Matak setawak raban bebendai,

Jari chawit kita teleba nyerepit duit ringgit bebungai,

Lau bau kita teleba nyan kuntu bedil besai,

Nya alai tu ukai biau ngapa biau pia,

Tu ga nunda biau Sempandai

Pengaga semoa kitai,

Ka dikumbai kitai Allah Taala.”

Udah nya tadi orang ka bebiau lalu bediri nunga ngagai orang katuai dudok ngejang agi ari ka dulu tadi.

MANOK JELAYAN

“Aku ka bediri jendam-jendam,

 Nyingkang enggau bulang kaki kanan,

Mansa moa kita ti kemumok dudok betipan,

Nengah kelasah tikai rotan,

Ukai aku mai ati jai, ati kudi,

Tang mai ati gaga rindu ka pangan,

Laban diasoh orang ka empu kereja,

Bebelah ka jeragang pinang kejekan,

Aku miau kita enggau selanjau manok jelayan,

Nya alai nasit tu bisi mimit nyelit kaki kanan,

Bulu manah udu Jelayan Enseriban,

Tu kena aku miau yang,

Miau semang kita,

Ari belakang mulai ka pisan,

Ngambi ka yang tinggi kita,

Enda mai ati jai ngeransi kebawan

Yang ganggam kita enda mai ati tajam,

Laban meda kita,

Endang tuga tunggul tebelian,

Kepala bansa Dayak tuai bansa Iban,

Enti berumah kita endang teleba,

Niri ka kah lamba tebelian,

Panggau enda kala pungkang,

Anchau tikai pandan,

Api kita enda kala padam,

Enti bumai kita enda kala alai,

Enda berasai ngisi mengkabai,

Tibang remendam,

Jari chawit endang teleba,

Nyerepit duit ringgit kujam,

Bau kita teleba nyan,

Kuntu bedil meriam,

Nya alau tu ukai biau ngapa bia pia,

Tu ga nunda biau,

Inan Petara Jagia Biku Bunsu Petara.”

Orang ka bebiau nya lalu agi mengkang bediri nungga ngagai sida ka biak agi.

MANOK LIA

“Aku ka bediri duga-duga,

Bejalai mansa kita kemumok dudok betungga,

Nengah kelasah tikai anyam lima,

Ukai aku mai ati jai, ati kudi,

Tang aku mai ati gaga rindu ketawa,

Miau kita enggau selanjau manok lia,

Ari asoh orang ka tuai gawai empu pengawa,

Nya alai aku miau yang, Miau semang kita,

Ari belakang mulai ka pala,

Ngambi ka yang ganggam kita,

Enda mai ati tajam,

Baka balan mata lungga,

Yang tinggi kita,

Enda mai ati jai ngeransi nyida,

Nya alai meda kita,

Ka agi biak apin bisi pengawa,

Tang nyangka dudi hari ila,

Pagila lusa kita tau nyadi tuai raban bansa kitai,

Kepala bansa Dayak,

Sekeda kita ke besekula pandai tinggi tangga,

Lalu tau gawa ngintu kubu buku lima,

Sadepa delapan belas sirang,

Nya naka biau aku,

Nya alai sayat manok tu.’

Nyadi semoa manok ke udah dikena bebiau nya tadi lalu disayat sereta lalu dichabut empat lima lambar bulu sayap digelut enggau darah kena ngenselan semoa pengabang. Ba pengawa melah pinang genselan lalu diendal ka ba tapa jari.

Udah tembu begenselan dia lalu bengkeraroh munyi utai kiba kanan laban semoa pengabang lalu belaboh makai semua utai ke sigi udah lama diayan ka ba moa sida nya tadi. Nyau ba pengujong sida ka makai utai, nya baru sida iya belaboh ngirup ai takar. Orang ka empu rumah lalu matak pengabang, udah siko, siko ga nitih ka gaya penuai umor ngagai endor ke betakar. Indu takar jalong samoa ngirup, tang anak bisi kena tiga bisi kena lima nitih ka pematut enggau penuai umor. Orang ka anembiak bendar enda iboh ngirup ai anak takar lalu dudi mega sida ngirup diberi ngirup ai nya.

Ukai mudah pengerami leboh maia ngirup takar ti kena sida nya niki, tikai dikelanit ka awak ka bisi alai orang mutah. Orang ka tuai ditulong bala anak, bala menantu iya, ke bediri ari belakang iya, sedia deka nyaup iya ngirup. Enti orang maioh menantu enggau anak suah tak baru ditumpil ka mulut iya ngagai mangkok takar lalu dipesambut ka kaban sida menantu anak iya ke bediri ari belakang. Balat pengerami leboh ngirup ai takar kena niki. Nya alai disema ka kitai Iban enti orang inggar ragak , dia sida nya lalu dikumbai orang “Munyi ka betakar”.

Nama agi pengerichah munyi nyawa bala pengabang muak ka setak-setak rumah panjai nya laban sida ka ngirup ai bisa. Lalu bisi nya bala sida mabok lalu ngelu pala, bisi nya ngerijat mengkasak mabak pemanggai, sereta ngusok tikai mega bala sida nya. Lalu sida ke nakal agi enda mabok, lalu sida nya meh ka masong orang ke mengkasak nya tadi, lalu ngintu pangan sida enggai ka bulih pemedis sereta enggai ka utai orang ba rumah panjai nya jai laban sida. Maioh agi bala pengabang nya mabok, rindu agi ga ati orang ka empu rumah ke alai datai. Pemakai enda nemu enda abis, laban apin pemakai nya abis dia sida enda nemu badu makai semua utai ka dikemisi ti udah diayan ka maia nya.

Orang ka meri ngirup endang nadai betagang, lalu orang ke ngirup ai bisa sigi ka betapat nguji ka penakal pangan diri enda mabok. Nyadi orang ka tegar ngirup ka bendar muji diri, lalu orang bukai mega muji penakal iya enda mabok. Orang ka nyambut penatai pengabang sigi nadai betagang meri orang utai di empa enggau utai di irup datai ka semua utai nya nyau udah abis ba bilik sida, ka lebih agi baka ai bisa iya nya tuak enggau arak. Sida berasai malu enti ruai diri empu enda basah nadai pengerami laban bala pengabang ka datai. Nya alai jako ka kala didinga leboh maia pengabang pulai iya nya munyi tu, “Ngabis ka ai.’

Nya alai adat bansa Iban enda ulih disebaka ka enggau enggi orang bansa bukai di dunya tu ba makai enggau ngirup leboh maia gawai. Utai ke naka pemanah ko kitai Ibann tang dikumbai jai ko bansa bukai. Udah badu makai utai enggau ngirup ai takar ke kena niki, semoa teda utai enggau chapak mangkok lalu ditanggung orang ka empu bilik nya pulai ka bilik lalu dikena orang ka indu din magang. Baka nya mega bala pengabang indu ka diau di bilik pan udah tembu ditiki ka enggau naka pengerami oleh bala sida.

Lepas nya sida ka biak agi, barang ke manchal agi sereta ngelu pala lalu numboh ka bungah madah jari diri lekat laban badu makai bedau bebasu, nya alai sida iya minta diri dibasu orang ka indu tauka orang ka dara. Sereta ninga nya orange ka empu ruai lalu ngiga indu dara tauka bini orang lalu mai sida pansut minching sarang tuak tauka arak. Datai sida di ruai, bala sida ka ngumbai diri lekat jari lalu manjong nanda ka semoa sida nya tadi gaga ati. Lelaki ka empu rumah mai indu lalu megai sarang tuak tauka arak lalu nyalin ka ai nya ngagai gelas tauka changkir ti ba jari indu, lalu disua ka ngagai bala pengabang nya ba ruai. Enti sida madah kadiri enggai tauka lembau ngirup, dia jari lalu dibantil. Dia maioh macam jako bungah dikena sida bekelakar ngalah ka pangan diri awk ke ka ngirup ai bisa. Bisi nya mega ari penumboh dia sida lalu ulih berengkah bepantun, bejawang, besanggai enggau pangan diri. Lalu pia mega pengabang bukai muak ka setak-setak pan rami diri bebuti sambil ka nganti maia makai lemai.

Enda bengat lama udah nya, orang ka empu rumah lalu betanggung ka asi enggau utai empa bukai ka ruai lalu meri bala pengabang makai. Tang makai lemai leboh maia tu ka beguai mimit laban enggai ka suntok jam alai ngatur pengerami bukai. Sakeda pengabang maioh enda makai laban nyau ngelu pala, lalu agi mega nat kadiri kenyang laban ka baru udah makai leboh sida ka niki tadi. Badu makai dia semoa pemakai lalu ditanggung orang ka empu bilik nya pulai baru ngagai bilik sida empu.lalu disikap sida ka indu. Pengabang indu mega makai dibilik sereta enggau maia sida ka lelaki makai diruai, lalu dibela orang ka indu ti empu rumah.

MASA ORANG TI EMPU RUMAH

Enda lama udah badu makai, tembu nginsap enggau makai pinang dia bala pengabang lalu belaboh ngatur orang ka empu rumah dudok, laban deka bebalas ngintu tauka dikumbai niki ka sida ti empu rumah. Samoa utai baka tuak, arak enggau pemakai bukai dibai pengabang magang lalu digempuru ka sida sereta lalu disedia ka ba bilik orang ka empu pengawa. Udah utai sedia magang, nya baru bala sida betanggung ka pemakai nya ka ruai baka ator orang ka udah ngintu sida dulu tadi. Tang nitih ka peneleba dipeda ba rumah panjai, orang ka empu rumah nadai dibiau ngena manok baka ka niki ka pengabang. Enti hari nyau lemai dia orang ka ngereja pengawa tu ka berumban mimit enggai ka suntok jam alai ngator pengawa ke bukai. Enti menoa jauh lalu penatai sida nya nyau malam hari, dia pengawa ke baka tu tau enda iboh disebut laban maioh agi pengawa bukai ke patut dikereja lalu dikelaung kategal ti udah suntok jam enda ulih dirintai nitih ka ripih magang. Tang enti menoa lalu jarang ngereja pengawa rami besai baka tu laban orang enda tentu ka tauka enda rajin enggau nurun ngabang.

Udah pemakai disedia ka magang dia siko ari bala pengabang ti dikarap ka sida lalu bejako enggau orang ka empu rumah lalu ngasoh sida berengkah makai utai ke udah diayan ka dia. Udah nya baru iya ngasoh sida ngirup ai takar ti dikena niki ka sida mega nitih ka gaya ator niki ka pengabang. Tang selalu iya dikereja, iya nya pengawa tu kurang agi rami ari gaya pemaioh pemakai enggau pengerami enti dibanding ka enggau pengawa leboh ti niki ka pengabang ti datai, tang enda tau enda dikereja nitih ka ripih Adat Melah Pinang. Badu makai utai enggau ngirup ai takar, dia semua pemakai lalu ditanggung pulai ka bilik baru, alai iya lalu dikemas orang ka indu nganti maia sida mansut ka baru udah nya lagi nitih ka gaya ripih pengawa ti udah nya.

Udah tembu pengawa niki ka orang ti empu rumah sereta ditangkan ka enggau nyibur tauka dikumbai masu pengabang dia orang lalu ngereja pengawa ngiring orang ka indu. Reti pengawa tu iya nya bala orang ka indu kalebih agi bala sida ka dara ti bengepan asal kitai Iban lalu bejalai nitih rumah disempulang ka enggau gendang sereta sida tu lalu dilanggar orang diberi ngirup ai arak tauka tuak. Sida tu ke bejalai dikenulu ka orang ti ngajat tauka bepencha enggau orang ke begendang nadai nemu badu leboh pengawa tu, lalu dientudi ka bala indu dara enggau lelaki ti bengepan nya sereta bejalai belubah-lubah beselat-selat enggau pangan diri. Bala sida ka indu nya tadi diasoh minching gelas mit tauka changkir, lalu lelaki ka ngimbai iya nya diasoh minching botol arak tauka tuak, tauka kendi ti nyadi ka sarang ai tuak. Datai ba tiap-tiap iko orang, lelaki nya lalu nyalin ka ai tuak tauka arak ngagai gelas mit ti dipegai indu nya tadi, lalu indu nya pan nyua ka ai nya ngagai orang ti diberi iya tiap-tiap iko. Orang maioh lalu duduk berintai-rintai muak ari atas lalu enda tau enda ngirup datai ka sebarang naka ti ulih enti indu ke nyadong nya kelalu maioh. Barang ka lembau ngirup abis lalu dipanjah orang k indu nya datai ka sida ti lelaki nya nyau abis basah. Tang kemaia tu hari pengawa ke baka tu nadai agi dikereja laban bebasa ka pangan diri lalu nadai tentu tau mejal ngasoh orang ngirup ai bisa baka rambau nya kalia.

Terubah orang ka empu rumah masu pengabang, udah nya baru pengabang malas masu orang ka empu rumah enggau bala indu sida. Tang enti hari udah kelalu suntok tau ga sereta dipegulai ka sekali. Ukai main pengerami agi leboh tu, nyau nyeregu kenu ko asai bulu lalu idup asai isi ninga gendang sereta enggaau ngepan orang ka indu ti nyau bekasering dibai bejalai sereta enggau ketawa diumba enggau panjong orang maioh mega meransang lalu ngumba pangan diri.. Lalu umba pengerami nya ke ngasoh orang enda nemu lembau ngirup datai ka pala nyau ngelu diri. Ka lebih agi orang ka bujang leboh sida iya meda pemajik gamal enggau umba gaya ngepan sida ka dara leboh ke mansa sida.

Enti baka menoa jauh lalu lelaki enggau indu jarang tauka enda kala bepeda ka pangan diri, leboh pemulai pengerami tu dia lelaki ke bujang nya lalu selalu ngingat ka pemajik gamal indu tu, lalu enti iya udu keran enda ulih nat ka ati diri leboh maia pemulai pengerami nya dia iya lalu ngundang indu nya tadi nyadi ka ambai. Lalu ari pengerami ka baka nya tau numboh ka pengawa jadi melaki bini lalu nya meh pemanah iya adat kitai Iban ba pengawa ke baka tu. Udah serap samoa orang diberi ngirup, dia bala sida ka indu lalu mulai kadiri ka bilik ka alai ditapat ka sida dulu nya tadi diau.

Leboh sida nya tadi badu nyibur lalu hari pan nyau lemai, lalu api dalam rumah panjai nya pan udah dipasang magang. Leboh kalia rindu bendar meda ruai terang laban lampu gas ke digantong orang ba ruai tang diatu nyau terang laban rumah panjai kitai Iban nyau udah bisi karan lalu maioh agi macham bansa lampu ke manah dipeda dipsang orang dia. Leboh maia perang Jepun taun 1941 dia rumah panjai kitai Iban udah maioh bendar bisi ngena lampu gas, tang diatu nyau majak nadai agi dipeda tauka dijual ba pasar. Nyadi kalia leboh maia kitai Iban bedau nemu ngena lampu gas lalu tusah ka bulih minyak gas dia sida kalia ngena kelasau tauka dikumbai kitai dambar nya ditungkun ka sida iya ba bedilang baroh antu pala ka disalai ba tampun. Lalu ngena chara tu tusah bendar sida ka nyaga api enti sema bisi bala sida nya mengkasak mabuk maia bisi pengawa rami, lalu rumah sida pan mudah bendar chelum laban along asap api ke baka nya tadi.

MAKAI LEMAI

Sereta udah badu nyibur nya tadi, dua tiga iko orang ka empu rumah endang udah dipadu ka nyadi bulu balang jaga jam alai sida iya patut makai lemai lalu meresa pemansau enggau pengapin utai ka dipandok orang ka indu ba tiap-tiap pintu ba rumah panjai nya. Sida tu bejalai lalu ngerah orang ka indu ngasoh sida besungkit enti semoa utai empa udah mansau. Udah nya sida lalu begerah ngasoh ngator semoa orang duduk bedijir besedia ka berengkah makai. Udah samoa orang terenah dudok magang ba ruai nitih ka gaya bagi bala bulu balang, nya baru orang ka lelaki betanggung ka pemakai ari bilik lalu diatur naka pemanah ba mua bala pengabang ka bisi datai. Enti pemakai udah disedia ka magang, dia samoa orang lalu belabuh makai sereta sekali.

Apin makai samoa pengabang dipedua ka dulu awak ka tiap-tiap pintu bilik bela sama ampit pengabang ka diberi makai. Samoa lelaki diberi makai diruai lalu orang ka indu diberi makai dibilik. Bala indu ti empu rumah lalu ngiga bala indu pengabang ba sebelah bilik orang bukai laban ka mai sida begulai berumpu makai ba bilik sida empu. Udah badu makai dia semua teda pemakai enggau chapak mangkok lalu ditanggung orang pulai ka bilik magang lalu disikap bala sida ka indu.

JAKO LEBOH MAIA MELAH PINANG

Udah badu makai lalu hari pan nyau lama lemai dia orang ka empu rumah lalu begerah nesau ngasoh semoa orang ke datai betugong ngagai ruai orang ka empu pengawa melah pinang awak ka meda sereta ninga pengerami enggau jako orang ka melah pinang, laban nya endang pun pengawa ke sehari nya. Orang ke bungah ngirup ai bisa enti enggai badu lalu diasoh mindah ngagai ruai bukai ti ngejang agi ari ruai ke ka alai melah pinang.

Lalu pia mega enti bisi orang ke anembiak ka bepencha, ngajat tauka betanda sigi diasoh mindah ka punggang setak rumah enggai ka kelalu ragak semak sida nya. Tang enti rumah pandak dia pengawa rama ke baka nya tak diasoh orang ke bempu pengawa ngetu sekali bala sida ke begendang nya tadi. Udah semoa orang sampal magang dudok  ba ruai dia sida ka indu lalu pansut ari bilik lalu sama-sama dudok ba ruai magang. Lalu semua macam utai empa baka penganan, penyaram, tuak enggau arak enggau pemkai bukai lalu ditanggong ngena talam enggau tabak pansut ka ruai ngambi ka bisi ditungga enggau diempa orang ka dudok ba ruai sekumbang sida ka ninga ka orang bejako melah pinang.

Orang ke sigi udah dipadu ka bejako ngari ka bala lelaki lalu diasoh dudok muak ari atas lalu iya ti dipadu ka bejako ngari ka bala ari indu lalu dudok nunga ba sida nya ari baroh mangkang tuak enggau arak. Leboh maia udah chukop alai berengkah bejako ka pengawa melah pinang dia semoa orang lalu ngetu ka randau bukai. Iya ti ngari ka indu enggau orang ti empu rumah lalu dulu bejako nanya ka pejalai sida ka datai mai bala besai ngemaioh nya. Sebedau iya berengkah bejako dia orang siko lalu dulu ngansah iya ngena ai tuak tauka arak. Udah iya bejako nanya ka pejalai, tauka kabuah sida ti datai, iya ngiri ka tuak tauka arak dalam changkir kena ngansah awak ka iya ke bejako nya madah ka pejalai enda kakang mansut ka jako lalu enda mega malu. Ai tu dikumbai iya ai kena ngansah. Nya alai tu munyi sekeda ari leka ai ansah nya didinga kitai :

“Nya alai tu aya / unggal,

Ai telesai ti datai ari sungai,

Pandi indai Raja Petara,

Ai sempulia tanah nyadi,

Diberi Sempeti Api,

Dikumbai kitai Allah Taala,

Nya alai lalu dipie dara tinggi,

Dalam pendi periok temaga,

Lalu diserap dara nelap,

Enggau lipat kain kesumba,

Udah nya lalu dituang,

Sida Endun Kumang,

Dalam balang jebul segala,

Lalu diperenchit ka aku mimit,

Ke dalam chubit chawan bebunga,

Nya alai, dipeda tak lejah-lejah,

Nengah kelasah anchau sana,

Ngensara ka moa kita,

Ngensara ka tugong bala,

Nya alai tu ko aku,

Ai bungai mentapu bunga,

Ai kedua ayam raja,

Endang lumor satu pemadu bisa,

Teleba ngerebah ka gajah jelu singa,

Munyi ka ngekah leka buah bindang,

Nya alai tu ga endang teleba kena aku,

Ngansah terinting puting dabong saleka,

Enggi Keling seduai Laja,

Tang ke lemai tu kena aku,

Ngansah terinting puting dabong saleka,

Enggi nuan aya / unggal,

Ngambi ka nuan bejako,

Inggar didinga nusoi rita,

Awak ka munyi geruda,

Injin Selalang.

Irup ai tu aya / unggal.”

Iya lalu ngirup, orang maioh lalu chapoh nempap ka jari laban gaga ati: lalu meransang iya. Enda lama udah nya, iya ke baru udah ngirup ai ansah nya tadi lalu bejako ngari ka lelaki lalu nyaut. Tang ai tuak tauka arak lalu dulu disalin ka iya dalam changkir kena iya malas meri iya ke baru udah bejako nya tadi ba pengabis genteran jako saut iya lagi. Nya alai kira ka munyi tu ko gaya jako iya belaboh dulu :

(a) “Nya alai nyerumba buli,

     Ka cheli-cheli tumboh lemai,

     Kami ka bisi datai kitu,

     Nganjong telinsu langu buah binjai,

     Nya alai diengkah ka kami di kelsah,

     Anchau tikai enda sengapa alai,

      Lalu disua ka kami ngagai kita,

      Kemumok dudok berintai ditengah ruai,

      Lalu disambut kita enggau kukut,

      Terima kita enggau tapa jari pemegai,

      Nya alai lalu ditaroh kita tegoh-tegoh,

      Enda sengapa alai,

      Nya meh ka sengkeram jako tuai,

      Ka ngasoh kami datai,

      Mai bala datai nitih ka semaia.”

(b) “ Nya alai nyerumba buli ka cheli-cheli,

      Tumboh engkeleman,

      Bisi kami datai ditu suba,

      Nganjong telinsu langgu buah kemantan,

      Dibai kami ari batang Sebelak tebing kanan,

      Datai kami ditu lalu disua ka ngagai kita,

      Ka kemumok dudok betipan,

      Penuh ruai datai di tempuan,

      Udah nya, lalu disambut kita,

      Enggau kukut jari kanan,

      Lalu ditaroh tegoh-tegoh,

      Disimpan dalam tempayan,

      Nya alai nya meh ka sengkeram jako tuai,

      Alai kami ke datai sehari tu,

      Mai bala sampal enggau anak,

      Nebah setawak nerantang ka gendang.”

( c ) “ Deka besulu ka resu garu melitan,

          Deka begulai ka peratai bungai bungai tanam,

          Nyemaka ka lunda jayau Kedayan,

          Nya alai pagila deka dibai kami pulai,

          Ka batang Sebelak tebing kanan,

          Datai din ila lalu dibiau kami

          Enggau selanjau manok jelayan,

          Digayang ka kami belalang babi dupan.”

( d ) “ Deka begulai ka peratai bungai beta,

          Deka nyemaka ka lunda minyak lala,

          Deka besulu ka resu garu baga,

          Nya alai pagila dibai kami pulai,

          Ka batang Sabelak tebing kiba,

          Datai din ila digayang ka kami,

          Babi belalang babi mesai pala,

          Lalu dibiau enggau selanjau manok lia.”

Udah nya baru iya ka ngari ka orang empu rumah bejako baru, lalu disaut siko, udah siko lalu siko mega seduai iya betimbal-timbal belaban ngena jako karong panjai. Orang maioh tak jenuh mending ka pengelandik seduai tu bejako. Enti pangan bukai bisi nemu tau mega nyaup pangan bejako. Enti lelaki nguai lain agi mega jalai jako dikena, lalu lain mega enti iya nya ka matak indu nguai. Nya alai, nyau ka pengujong jako seduai nya baru iya ke ngari ka lelaki bejako ngiring adat belaki bebini ari kalia menya ti ditampong kitai turun menurun datai ka kemaia hari tu. Ditu aku semina nusoi pun jako kena ngiring adat, ngujong ka iya penau diri empu ngerintai nitih ka aki ini diri empu. Dalam jako ngiring adat samoa pengudi orang katuai dulu kalia ti dikingat ka kitai diatu lalu disebut magang.

Kebuah alai sida kalia bisi pengudi kenu ko cherita tuai laban sida apin nemu reti adat belaki bebini. Nya alai tu munyi pun jako iya ti ngiring adat :

“Deka nyimpong semambu ngandong,

Tumboh di perabong rumah raya,

Sengkilong tedong ular naga,

Nya alai pala tak kunda-kunda,

Nyua ka jangka tampok adat,

Nya alai nampong kenang burong achang,

Bungkok belakang ngeruang dada,

Nampong jako burong apu,

Ka dulu meda menoa,

Nampong telah burung idah,

Siti dilah tiga lubang nyawa,

Nya alai nampong adat aki kitai,

Rekaya Lengidi ka buyan,

Takut mati parai betu,

Berani berumah,

Mangkang tisi antara menoa,

Nampong adat aki kitai,

Kumbang Marau,

Pengirau danau lepong Majang,

Penebang batang alu penguji,

Entak ka tanah dalam tujoh,

Sagu ka langit tinggi sepuloh,

Nya alai nampong adat aki kitai,

Ke benama Rekaya Limping,

Berumah di tuchong,

Menyuang Bukit Banting.”

Udah nya lalu beripih-ripih nyentok ka datai ba tuai menoa ti alai melah pinang.

BETUSUT

Abis jako panjai nya baru tampong pengawa betusut. Betusut enda tau enda awak ka nemu penyauh enggau penyemak kaul seduai ka deka jadi melaki bini, sekali ka bisi bebelit tauka nadai. Enti sema bisi bebelit dia orang katuai ngadu ka enggau adat kena muai pemali. Enti seduai ka jadi nya endang ditemu ukai orang bukai enggau paangan, lalu enda bebelit nadai tentu guna betusut kelalu dalam, tang semina nusut ari ni iya serara awak ka orang maioh nemu penyauh enggau penyemak seduai. Enti sema orang jadi enggau petunggal diri menyadi orang nadai nyebut betusut. Tusut dalam maioh penatai, tang semoa pun ari antu magang, baka ari Sengalang Burong, ari Kumpang Bedarah, ari Beji enggau ari maioh pun bukai. Tang ditu aku deka nusoi tusut ari Sengalang Burong ari pun ngagai tuboh Beti. Ari Beti ngujong ka ngagai aki ini kitai empu.

BATANG TUSUT

Abu datai ari munggu tinggang guntur beranak ka Nising datai ari perenching pandang lambor. Nising beranak ka Bedali bejulok tiang balang besegi sarat muat balang belabong bebini ngambi Antok Nyinok Langgong Tibilong, Dayang Kumang gasing merengong beranak ka Beda’am ngembuan perugan danan gelong ka bengkong bebini ngambi Jawai Mupong bepadong tujoh ringkat, Mau ka tinjau bekabelap beranak ka Beda’ang bejulok api mandang sundang surong, bebini ngambi Dara Saut pengukor mata isau pengundor bala nyerang beranak ka Aki Lang Sengalang Burong, Aki Jagu Menaul Tuntong bebini ngambi Indai Kechendai bepantak jerak, Dara Entaba balun kupak. Tang iya tabin birin enda pengerai, sakit lengit enda nyamai, pedera renga nadai asai. Dipesaut ka Manang Likup, dipelian ka Jaban, dipetawai ka Gendai, mindah ka nama disebut orang Endu  Sudan Berinjan Bungkong, Endu Diu Tiong Menyelong beranak ka Dara Tinchin Temaga, Endu Cherebok Mangkok China belaki diambi Menggin beranak ka Sera Gunting bebini ngambi Ranjau beranak ka Riboh datai ari buloh bauh rejang belambang belaki di ambi Bada beranak ka Gupi anak umbong, belaki diambi Belang Pinggang Antu Gerasi, beranak ka Geraman bebini ngambi Tebari beranak ka Chundau bebini ngambi Beragai beranak ka Beti digelar Bujang Berauh Ngumbang bebini ngambi Duri. Beti tujoh kali bebini, tujoh kali balu.

Lalu Beti ke diajar Puntang Raga enda agi ngasoh mantang orang ke beleman salah serak. Ari ajar Puntang Raga tu nya kebuah Beti enda nyadi mantang Abang ke deka jadi salah serak enggau Dayang Tali Bunga.

AJAR

Naka tu tusoi aku lalu ari tu iya mechah kia-kia nabor sebelah menoa. Tusut beserara laban orang kalia baka kitai ka diatu maioh diri menyadi. Nya alai orang ti nemu tusut nyamai bendar nemu kaban diri. Asai sepi aku, patut semoa kitai ngajar anak uchu kitai betusut, enda iboh tusut daalam, amat ga nemu nusun aki ini diri empu ngagai empat lima serak. Enti oraang ke biak enda diajar nama aki enggau ini ti ngada ka apai enggau indai pan enda ga sida nemu. Lebih agi anak kitai ti diau di nengri lalu begulai enggau bansa bukai, indah jako diri empu deh enda tentu terus agi sekeda ti udah dipeda aku empu. Umbas aku ngenang pemanah betusut, nya alai diatu kitai pulai baru ngagai pengerami melah pinang.

PINANG DIBELAH

Udah orang tembu betusut, lalu enti bisi salah ripih, bisi bebelit lalu terus diaduka enggau adat awak ka nadai agi pemali. Enti sema ukum penyalah nya bisi pulai ka ngagai ukum ngena mata duit lalu dipedua ka semoa bala orang katuai ti bisi enggau dia ti ngatur adat nya, tang enti pemali nya tak mimit aja bebelit dia adat iya tak semina naka lungga bebelit aja dipinta ngagai iya ti melit. Udah nya baru apai indai indu tauka orang ti dikarap ka iya bejako madah ka gaya adat diri empu baka derian enggau bunga pinang. Enti apai indai lelaki nya udah besetuju nerima adat nitih ka dipinta apai indai indu, dia sida lalu besua ka semoa utai nya tekala nya. Udah nya baru ari lelaki malas madah ka gaya pemesai adat ti dipinta sida ari lelaki nitih ka pemesai adat aki ini diri, baka penudok, penyandih enggau utai bukai enti bisi. lalu apai indai indu mega nyau ka semoa adat ti dipinta tekala nya enti sida udah setuju nerima nya.

Enti adat indu enggau lelaki nya enda dipadah ka dulu dia pengawa melah pinang apin tau dipenyadi ka. Enggai ka iya tau numboh ka pengachau enggau laya ka dudi hari ila. Udah nya baru ngator pengawa melah pinang. Keterubah sida lalu milih indu siko enggau lelaki siko ti endang orang ka pemulih utai, chukop iya penuai umor, maioh anak telesak, sereta ripih seduai pan ngena, reti nya  enti ulih tak kena pangkat unggal. Udah mutus ka berapa sirap pinang enggi lelaki enggau enggi indu, nya baru seduai dibai tama ka bilik lalu miring din.

Piring nya tadi disimpan begulai dalam selok tauka sintong bebuah ti dibelit ngena lampit enggau sengkiling laban endang asal bansa Iban keran ka anak tuai iya nya indu. Nya kebuah ngelagu selok nya nitih ka gaya pakayan orang ka indu. Udah chukup nya diadu ka dipeda nunda pendiau anak mit, selok tauka sintong nya lalu disandik indu ti udah dipilih nya tadi ngena pua kumbu tauka belantan lalu begadai –gadai mansut kadiri ka ruai. Nyadi lelaki ke tangkup iya nya tadi sigi udah nganti dudok ba ruai nganti diri ti deka nyambut anak nya. Nyadi leboh indu nya ka nyandik selok tauka sintong bebuah udah pansut ka ruai, dia iya lalu ngelulu ka diri nyabak munyi anak mit ti baru ada, lalu ditimang iya mega ngambi ka badu nyabak. Bala indu ka bukai mega lalu besaup nulong iya ngaga diri nyabak munyi anak mit. Lalu semoa orang maioh leboh maia pengawa tu dikereja endang  chapoh begau ketawa geli ati ka iya ti dipeda tak ngena bendar gaya. Udah datai di ruai anak nya lalu disambut apai iya, iya nya lelaki ti udah dipilih nya tadi. Apai iya lalu naka penau ulih iya ngelulu kadiri ngaum lalu betimang ka anak mit nya ngambi ka bala orang maioh ketawa. Udah nya, anak nya tadi lalu di kujok orang ngena pua kumbu di tengah ruai.

Ripih pengawa udah nya, orang lalu ngiga orang ka landik nimang diasoh nindok enggau ngerak anak nya tadi. Udah bulih orang ti diasoh nimang, semoa pengabang maioh lalu diau jenoh enda inggar mending ka pemanah nyawa enggau leka timang lemambang nya tadi. Iya ke nimang nya tadi lalu diasoh duduk ba wa nunga kujok anak nya.

Nyadi munyi tu leka timang iya :

NINDOK KA ANAK

“Wo-o-o-o-ho-o-owai----iii.,

Nyerumba linda sabong malam,

Nyerumba petang penyarang,

Rumah nyeruran,

Pasang gitang lampu dian,

Naka pengelembau aku ngangau,

Ka tempalau dabong lancham,

      Naka pemalu tudah aku,

      Di lempedu kandang dalam,

      Laban penemu enggi aku,

Nadai temu tuku kiba kanan,

Agi ga nyawa aku nadai didinga,

Enda nyaris nekis inggar daderam,

Tang semadi tu ukai lambu aku,

Ngelulu ka sida sanu ibu uman,

      Ukai jawang aku nimang,

      Sulu tunang ambai dalam,

      Tang semadi gumi aku,

Diasoh sida ke empu pengerami,

Bebelah ka jeragang pinang kejekan,

Diasoh jayok nindok ka selok,

Ka bebuah ngambi gambar miga dudok,

Ka belingkok ngelong besimpan,

Semadi lumbi aku diasoh kita,

Nindok ka selok ka bebuah manah nyelai,

      Nadai ngelui,

Ngambi gambar reni baya ngereman,

Nya alai ditindok ka aku,

      Nunda orang nindok,

Ka Endu Kumang Subang Betandok,

Endu Achin Cheremin Burit Mangkok,

Ambai Beragai Bini Tuchok,

Datai ari puchok raba narok,

      Jalai Laja nampok,

Bulih tandok Telanjing burok,

Ka belingkok ngelong besimpan,

Nya alai ditindok ka aku,

      Nunda orang nindok,

Ka Endu Buku Kandong,

Semambu Buntat Gemala,

Endu Kumang Kajang Menoa,

Bini Bujang Sempulang Gana,

Antu kelalu raja ke enda,

Balat jedian kejekan,

Nya alai gali galai,

Nuan selantang anak tuai,

Di tikai janit anyam,

Dikujok enggau pelepok,

Ampang belantan,

Bebungkor ka jadam,

Bepanggal ka intan,

Dikumbai uman lambu gasan,

Bula limpan tekang la-gempanang wai------,

O-wo-o-o-o-oh—wai-----ii,

Tekang la-gempanang.”

NGERAK ANAK (Lebu Nangi)

“O-wo-o-wai--------

Dani nuan sendia anak seridi,

Ka gali galai di tikai anyam diri,

Bebungkor enggau menyetor,

Ampang menyeti,

Serayong indai Mendong,

Enggau tajong batik betawi,

Sengkidang Kumang,

Enggau punggang bali menyeti,

Kemilai sida indai di kerigai rusok tisi,

Nya alai digela sida mengua karong beridi,

Ngagai anak kunchit kemali,

       Begamal lanji-lanji,

Mandi pentali panchor ulak bebuli,

Tang enti tinda nun deh endun dara,

Nyau udah jementa  dra mereti,

Pandai di chunggai ujong jari,

Gaya nadai saga enda betanya,

Ngagai sida mengua karong beridi,

Panau belakang nuan Endun Kumang,

       Nyau udah terang,

Mandang bujang anak lelaki,

Nya alai nuan digela sida,

    

  Mengua karong beridi,

Ngagai sumbu lampu api,

Ke pegari tampak terang.”

NGERAK ANAK (Lebu Ngambat)

“Nya alai enti tinda nuan,

Nyau udah jementa dara memetat,

Panau isi beranti pati pusat,

Panau bangi sejari nadai rarat,

Pandai nuan di chunggai tunjok empat,

Gawa enda saga nadai betanya,

Ngagai sida mengua karong Menyimat,

Nya alai digela sida mengua karong menyimat,

Ngagai jerumat jarum kawat,

Tak rejat-rejat nancham lipat ara tajong.”

NGERAK ANAK (Lebu Nyangkong)

“Nya alai enti tinda nuan,

Deh kau lantang anak sendia,

Nyau udah jementa dara lempong,

Pandai dichunggai ujong kudong,

Bisa di penyura nyawa ujong dabong,

Gawa pan nuan nadai saga,

      Enda betanya ngagai sida,

      Mengua karong kerubong,

Nya alai nuan disebaka ka orang,

Enggau bini Linggir benama Anong,

Bini Bayang Indai Tiong,

Pandai di chunggai jari ujong,

      Landik ngama ai lia,

      Di pala dulang midong,

Landik nyagam ai garam,

Bengaran ka delapan buloh laung,

Nya alai semoa kita digela ka orang,

Ngagai jenuar kapal lambong,

Benyawa rengong-rengong,

      Munyi sayap burong,

      Emperegam kampong,

Nya alai agi ga kita disema ka orang,

Ngagai menyanggit Bukit Santubong,

      Begamal renjong-renjong,

Kaki alun gigi gumbang besabong,

Ari sepiak gulu karak batu anggong,

Punggang setak tumboh kara jemera riong,

Punggang setak tumboh bunga ketula raung,

Dinang Kumang seduai Lulong,

Indu sida di Liu Nyatu Padi,

Diambi ka dujong,

Ko aku----lah---sanggo lintang-----wai,

O-o-wai.”

TIMANG ANAK

“O-o-o-wai----ahhh,

Naka penyuma aku nelenga,

Ka rasa dabong gigi,

Nyerumba linda lemai hari,

Nyerumba petang penyarang,

Rumah menchegi,

Tang ukai jawing aku,

Ka nimang sulu tunang ambai ati,

Ukai lambu aku ngelulu,

Ka sida sanu ibu kedi,

Tang semadi tinda aku,

Udah alah asoh sida ke empu kereja,

      Pun pengerami,

Bebelah ka jeragang pinang penguji,

Nya alai sit pinang kunchit,

      Alit di burit lega di ati,

Leka pinang segala dibelah dara Juata,

Di baroh singka miga ngeledi,

Kumang ka tebilang tambun puji,

      Pandai di chunggai ujong jari,

      Indu sida di Liu Nyatu Padi,

      Lalu disimpan sida ibu uman,

Dalam jelanan tanggam demam resam ransi,

Udah nya baru tembai bejalai pansut ka ruai,

      Ngiga apai tangkai mengadi,

Lalu besangin indai mempulu lilin,

Munyi Baketan palin ngua lilin madu rari,

Lalu muchau indai burong bangau,

Munyi Melananu nimbau tukau Tanjong Keladi,

Oh ! Ni kita deh Sempungga, Sapuntang Medang,

Ke udah ngundang aku disimbang papan paji,

Enda ninga kita anak tua endun dara,

      Nebah nyawa nyabak berari,

Oh ! Nama kebuah enda ninga deh indai dara,

Uji surong kitu deh indai endu bini kami,

Tak lalu disua ka indai puna bangka,

Lantang anak randa enggau tapa jari beresi,

Lalu sambut apai sempidan bangkut,

      Enggau kukut ujong jari,

      Lalu betimang apai Kumang,

Bedindang badi-adi,

Adu-adu kemah ko iya,

Anak aku tak lalendu,

Baka lamba batang kayu peru,

Tumboh di Ulu Sebelak menchegi,

Linga-linga kera lantang anak randa,

Baka lamba batang kayu ara,

Ke tumboh di ulu dia,

Pumpong sadepa rarah jelenga,

Pangka ka bua pusin bebuli,

Melam melan salantang anak pinan,

Baka lamba batang kayu tekam,

Tundan delapan semilan begulor tali,

Lengi-lengi anak diri indah enda baka,

      Lamba batang kayu tuwi,

Ke tumboh menoa ili ngerapi madang papi,

Kemah ko timang sida menimang karong beridi,

Nya alai diatu deh Endun Dara,

Ke agi meraya nebah nyawa nyabak beraie,

      Tang enti tinda iya,

Nyau udah jementa dara mereti,

Nyau udah tinggi di lepi sanggul diri,

Pandai di chunggai ujong jari,

Ukai enda iya digela kitai,

Kaban mengua karong beridi,

      Ngagai anak pekaban,

      Ikan enseriban padi,

      Ke begamal lanji-lanji,

      Betanjak di kaki ko aku,

      Kerangan nunggang,

      Wai----iii,”

BERISAN ENGGAU BUNGAH

Sereta udah badu nimang anak semoa orang lalu richah laban berisan, ngirup ai bisa enggau bepakai ka semua utai ke endang udah lama bisi ayan dia. Semoa sida ke kena pangkat apai indai, pangkat aya enggau ibu seduai ke dibelah pinang lalu begempuru duduk berintai betungga enggau pangan diri laban deka belaban berisan. Bebalas-balas sida iya tu tadi meri pangan diri ngirup, beripih semoa kaban ari lelaki ngelaban kaban ari indu. Balat bendar munyi pengerami, nambah ka sida ke berisan nya tadi dia bala orang maioh lalu numboh ka bungah bukai kelimpah ari ngirup ai bisa baka ngajat, bepencha enggau betanda.

Sekeda pengabang barang ke bisi mai ai tuak tauka arak lalu beguai ngambi ai nya ka dikena sida iya bebalas meri orang ka empu rumah. Laban pengerami tak naka pemalat dia pengawa nya ngasoh orang enda berasai ngelu pala lalu mabok. Enti pala udah ngelu, barang ke bisi mantai ka ubat enda mabok, lalu meri pangan diri ke nadai. Barang orang ti gali diangkat ka baru lalu diberi ngirup. Sekeda bala ke mabok lalu di intu kaban iya empu enggai ka iya bulih pemedis.

Barang ka minta indu enggau minta bungai lalu diasoh enggau diperansang orang ka empu rumah. Enti leboh orang balat bungah sereta begagai, suah mega dipeda kitai kalia orang ka empu rumah, empu ruai lalu ngulu ka pengabang mabak pemanggai enggau dinding iya empu ukai kategal ati ti pedis, tang labaan empa pemalat pengerindu ati bunggah enggau pangan diri enggai ka alah uti. Tang nyau kemaia tu hari, pengawa bunggah kasar baka tu nadai agi dikereja laban rumah nyau udah kukoh, udah tegoh, rumah papan, rumah tebelian, rumah batu, rumah menuku lalu nadai agi kitai meda bisi pemanggai ba sebelah ruai ka ulih dibabak. Nya alai orang rebak baru diatu, laban enda teleba tauka enda kala meda bunggah bansa nya lalu ka jampat pedis ati ti ngujong ka tau belaya laban sida enggai meda bunggah ke baka kera ti nadai pulai ka pemanah ulah bansa kitai Iban.

Siti ari pemaioh macham pemunggah ti enda agi dikena bansa kita Iban kemaia tu hari iya nya ngetas pintu. Bala orang bejalai niti rumah lalu beketas ka pintu. Udah sida iya ngetas pintu, sida lalu dudok ba tempuan nganti orang ka empu bilik nya meri sida arak tauka tuak enggau penganan. Lalu siti agi pengawa ke nadai dikereja kitai Iban leboh melah pinang iya nya manjok, Pengabang nan ka panjok ba moa pintu lalu orang ke empu bilik meri sida nya ai tuak tauka arak enggau manok nya ke ulih sintak panjok sida. Barang ka enda nakal ngirup sigi lembau bendar ka enggau orang bunggah maioh macham laban enggai kadiri mabok.

NGIRUP KOPI ENGGAU MAKAI ASI

Udah jam chukop maia alai ngirup kopi, orang ti nyadi bulu balang jaga jam maia makai utai lalu betesau begerah niti rumah ngasoh orang ka empu rumah betanggong enti utai udah di sedia. Semoa pengabang lalu diatur sida duduk lalu orang ke bunggah ngirup ai bisa diasoh ngetu dulu. Tang bisi mega sekeda ti enda ulih diasoh ngetu majak kadiri bebuti ngena ai bisa laban pala nyau udah ngelu. Kitai sama nemu enti pala nyau udah ngelu tentu enggai tentu ngasi ka jako rara orang.

Udah utai ditaanggong ka ruai dia semoa orang lalu sama-sama ngirup kopi magang. Bala orang ke indu ngirup kopi enggau makai roti di bilik sebaka enggau orang ka lelaki di ruai.

Udah orang badu ngirup kopi dia semua rengka nya lalu ditanggong pulai baru ka bilik magang. Enda lama takah udah nya orang lalu belaboh baru bunggah enggau pangan diri, ngirup arak enggau tuak lalu baka nya mega orang ke ngajat, bepencha enggau betanda sereta bepantun, lalu bisi mega nya nimang tauka berenong.

Orang ti nyadi bulu balang jaga jam maia makai lalu bejalai tama bilik tiap-tiap pintu begerah ngasoh orang ka indu berapi di dapor. Kira ka pengumbas iya  pengelama udah nya sida lalu bejalai baru meresa pemansau semoa utai ti dipandok. Enti semoa utai udah mansau magang, nya baru sida begerah ngasoh orang ka indu besungkit. Udah nya baru orang ka lelaki betanggong ka utai dempa nya ka ruai, lalu hari maia rambau nya pan nyau ka tekerebak tawas.

Semoa orang ka ngirup enggau main bukai lalu diasoh ngetu magang ngambi ka limpang sama-sama enggau makai enggai ka pulai lapar. Udah semoa pengabang diatur duduk magang baka ke udah sereta pemakai pan udah mega dienah dia sida lalu diasoh berengkah makai belubah-lubah. Udah tembu makai dia semoa pemakai nya lalu ditanggong baru pulai ka bilik. Nyadi semua pengabang ke makai pan tak naka iya pengeyang laban nangi enggai ka diri lapar ba rantu jalai leboh ka pulai siang lagi.

Badu makai dia sida ke agi ka ngirup ai bisa lalu belaboh baru laban ka ngabis ka semua ai ke agi bisi ayan. Maioh bendar ruai alai orang ka nudok ka takar, bisi nya mit lalu bisi meh nya ka besai takar, pia mega gaya asai ai ke bisi nya nyamai lalu asai pan enda mega sebaka enggau ba ruai siti-siti. Ukai main agi pengerami leboh orang ke betakar ka ngabis ka ai tuak.

(Nya alai kitai Iban bisi jako munyi tu : “Munyi ke ngabis ka ai” tauka “Ngalah ka takar” enti orang nya kelalu ragak.)

Orang ke empu rumah pan naka ulih meransang pengabang ngirup awak ka sida mabok lalu enda ulih mulai kadiri agi. Enti orang nya mabok, tak naka iya pengaga ati orang ka empu rumah. Tang pengabang mega naka ulih nguji ka ubat enda mabuk barang sapa ka bisi ngembuan nya. Enti hari nyau udah tawas lalu ai pan agi mega maioh, suah lalu dipelintang ka orang ti empu rumah alu ba pala tangga laban enggai ngasoh pengabang pulai.

PENGABANG PULAI

Nyau tawas hari, semoa pengabang pan besikap enggau ati gaga laban ka mulai kadiri mai indu ti udah di tikah nya. Sida ke biak pan lalu begendang niti rumah ari setak ka setak ngerah semoa pengabang bebai pulai lalu ngansak sida ka indu beradu masuk ka ngepan. Sepagi-pagi nya indu ke diambi enggau bala indu pengabang bukai ke bengepan lalu beradu magang. Udah semua sida tembu beradu, dia sida lalu dibai bejalai niti rumah dua kali besundang disereta ka enggau gendang awak ka semoa orang meda pemanah gamal sida enggau pemanah ngepan. Badu bejalai niti rumah sida pan lalu nurun ka tanah  begadai-gadai nitih ka munyi pangkong gendang. Semoa pengabang pulai magang enggau ati rindu mai indu enggau panjong enggau ketawa. Barang pangan ti agi mabok di ma pangan iya lalu sebarang ke ngelu pala lalu pulai ngirit diri di iring bala pangan iya nama nya rebah lalu nama meh nya iya tetrap. Nya ti ngerami bala sida ba sebelah rantu jalai.

Enda jauh udah ngejang ka rumah panjai indu nya tadi dia bala sida lalu ngetu, awak ka bala indu ke bengepan lalu ngetu muka ngepan sida enggai ka jai lalu begari ngena gari kena bejalai baka orang maioh. Tang enti leboh sida nya merau nengah ai dia bala sida ke indu ti bengepan nya tau enda iboh bebuka ka ngepan nyentok ka pemulai sida nyau datai ba pengkalan rumah lelaki. Udah kemas sida tembu bebuka ka ngepan dia bala sida lalu ,upok bejalai baru begadai-gadai datai ka pengumbas iya alai bala sida iya ngetu belelak tauka ngetu merarau.

Bala sida ke begendang nadai ngetu betaboh sepemanjai jalai, udah siko-siko ga sida besilih-silih nebah gendang nya tadi. Nyau datai ba semak rumah lelaki tauka nyau ka sangkai ba pendaie pemandi tangka pangkaalan perau sida, dia bala sida dulu ngetu magang limping mandi enggau begari ngena gari manah. Orang ke enda enggau sida ngambi indu tauka orang ke endang mengkang tinggal di rumah endang udah sedia nganti penatai bala sida. Nyadi rumah sekumbang ke ditinggal ka orang ngambi indu sigi udah disikap kenyaau ari tumu pagi hari nya.

Tempuan, ruai, pantar enggau bilik endang udah selampur dianchau ka tikai magang lalu tempuan semua dikajang pua kumbu magang sepemanjai rumah. Pia mega bilik, endang udah dipadu ka alai indu tama dulu enggau bilik laki iya udah mega dilagu sereta dianchau pua kumbu naka pemanah. Dulang enggau batu pengunsut udah disedia ka ba pala tangga enggau babi ke kaa digayang nyadi ka babi panjap ba kaki tangga kena niki ka bala ti datai endang udah garing-garing ba kaki tangga.

Udah tembu mandi, semoa orang lalu beradu nyendia kadiri deka niki. Semoa ngepan lalu dipasok ka baru. Orang ke beradu pan nyau besak ati laban gendang bala sida pan nyau betimbal-timbal enggau munyi gendang bala ke nganti di rumah. Tembu beradu bala sida lalu bejalai belubah-lubah nitih ka munyi gendang, dikenulu ka orang ka tuai udah nya lalu ditangkan orang bukai nitih ka penuai umor enggau pangkat ba menua nya. Leboh datai ba kaki tangga, dia apai indai indu tauka orang bukai ti dipadu ka patut sama enggau datai ari rumah indu lalu diasoh ngayang babi panjap ke lama udah garing-garing dia.

Udah babi panjap mati, nya baru semua bala sida niki magang tang enda diwong tauka dilanggar baka atur orang ke lelaki niki ba rumah indu maia ti mansang melah pinang. Sida iya semina dibai bejalai besundang niti rumah awak ka orang maioh sama meda pemanah gamal indu ti diambi enggau pemanah gamal bala indu bukai ti sama sampal bisi enggau datai mega bengepan kia. Udah meh chukup sundang dua tiga kali dia semua bala indu lalu dibai tama ka bilik orang bukai dulu ti endang udah disedia ka orang alai sida tama.

Nyau kelama bala sida nya udah ngirup indah ba bilik ke alai sida tama nya, dia bala indu bukai lalu mai indu ke di ambi nya mansang tama ngagai bilik laki iya. Indu ti di ambi endang selalu di peda malu moa iya, tang ati iya di dalam nyin enda meh kitai nemu. Udah meh sida iya duduk indah, nya baru iya diasoh muka ngepan iya sereta lalu begari ngena kain enggau baju ke manah baka indu bukai.

Endang sigi adat leboh indu baru datai ba rumah laki iya, iya lalu dulu dibai tama ngagai bilik orang bukai. Baka nya mega endang sigi udah adat lelaki ti empu bini ke di ambi enda tau di rumah leboh bini iya niki, tang iya diasoh orang belalai ba sebelah babas tauka diau ba langkau ti semak ari rumah panjai sida nya. Kebuah alai pia, orang ka tuai nadai madah ka kabuah enggau pemali sida ngereja pengawa ke baka tu.

Nyau udah malam hari nya baru lelaki nya datai niki ka rumah ngena gari ke naka pemanah ti dikemisi ka iya. Udah hari nyau petang, orang ke indu di bilik lalu nyerungkai sarang gari indu ke di ambi lalu ngeredai semoa gari iya dalam bilik awak ka semoa orang meda laban tu endang sigi adat.       

Lemai nya semoa orang ke lelaki makai di ruai lalu indu makai di bilik. Nya tanggong orang ti bempu pengawa. Udah babi panjap ti di kena orang niki tadi tembu dibela lalu asi pan udah mega mansau, orang pan lalu betesau bekumbai bebai makai. Semoa orang ti dudok di ruai lalu asi enggau lauk ditanggong ka ruai, lalu chapak mangkok disadong nyelinting tuboh. Diatu semoa orang makai majak kadiri. Badu makai enti agi bisi ai tuak enggau arak, dia orang lalu belaboh ngirup. Pengerami orang ka pulai ngambi indu nitih ka gaya pemisi utai enggau peneka orang ti bempu pengawa.

BEBIAU

Udah sida tembu makai lemai kira ka jam nyau pukul sembilan tauka pukul sepuloh malam, indu ti diambi enggau dua tiga iko indu orang ka empu rumah lalu beradu masok ka ngepan lalu nyendiaa ka deka bebiau. Pia mega lelaki ti empu bini enggau dua tiga iko lelaki bujang bukai lalu beradu ngias diri. Udah sida semua udah tembu magang dia orang lalu ngumbai lelaki nya tama ka bilik. Leboh iya tama ka enggau sida ti ngulu ka iya lalu semua sida enggau indu mega lalu diasoh dudok ba atas setawak ti dibap ngena pua kumbu nitih ka genap tuboh semua sida.

Tau mega dudok ba atas kerusi ti dibungkor ngena pua kumbu enti bisi kerusi chukop nitih ka genap tuboh sida. Dia sida dudok betunga moa tauka berimbai-rimbai nitih ka ator orang ti ngator sida. Malu bendar moa indu dipeda kitai, ama mirah, ama puchat gamal moa iya dipeda, lalu lelaki nya pan sama baka nya mega. Orang maioh bendar nyau dedat ngemenuh ka bilik, lalu bisi sekeda nya nilik ari sadau, lalu bisi sekeda nya bediri ari ruai enggau nyengok ari lubang penyengok ti ngimbai bilik nya laban berebut deka meda. Enti rumah nya enda tegap, tentu enda pan tan laban pemaioh orang ke begelumu dia. Dia orang rami bendar, barang ke bungah, bungah, barang ke ketawa, ketawa, sama mai ati gaga.

Enda lama udah nya orang ke udah dipadu asoh miau seduai lalu datai. Orang lalu nyua ka manok ti ka dikena bebiau nya ngagai iya lalu degerempong ka iya kaki manok nya tadi. Udah nya iya lalu bediri nyebut leka biau, orang maioh semua diau magang jenoh enda ragak agi laban deka mending ka munyi leka biau iya nya tadi. Nya alai pun biau iya munyi pun biau bukai mega :

“Sa, dua, tiga, empat, lima, enam, tu-u-u-joh !

Aku ngangau ka petara aki, petara ini,

Petara apai, petara indai,

Sempandai ka ngaga kitai,

Minta tulong minta sukong,

Minta tela, minta peda,

Minta iching, minta perening   

Awak ka bekebong baka langkit,

Betuchong baka bukit,

Bepunchak baka jala,

Betuchong baka Lingga,

Bulih mudah, bulih gerah,

Beranak, betelesak,

Baka tebu lulong tambak,

Baka pisang lulong anak,

Gerai nyamai, gayu guru,

Nadai apa ko petara.”

Pengabis leka biau dia manok nya tadi lalu disayat, orang pan lalu begau nempap ka jari laban gaga ati. Udah nya darah manok nya tadi lalu dikena ngenselan seduai ti jadi melaki bini. Lepas nya orang lalu belaboh baru ngirup ai bisa, bungah enggau makai utai naka pemisi utai ke bisi diayan ka dia. Lelaki ti dibiau tadi lalu pansut ka ruai, lalu indu nya bedau meruan mengkang diau di bilik nya mega. Nyau jauh malam dia orang serumah nya pan nyau pulai tindok ngagai bilik diri empu magang laban nat ka pengelelak diri ti udah dua tiga hari udah. Tang lelaki ke bebini nya apin patut tau begulai tindok enggau bini iya malam nya.

NYUNDANG PINANG

Genap tiga malam ka empat hari indu nya udah datai ba rumah lelaki ke alai seduai melaki bini pan nyau ka nurun nyundang pinang ngagai rumah indu. Bisi siko dua orang ke bujang sama enggau ngulu ka seduai lalu nulong seduai mai gari, penganan tauka utai bukai ngambi ka bisi ditemu orang leboh ti ngulu penatai seduai ba rumah indu. Taja pan timpoh endang genap tiga malam alai nyundang pinang, tang enti sema ka sida bisi enda lantang tauka jai mimpi, bisi ninga burong jai tauka ninga orang bisi parai, apin ga sida nyadi sehari nya, tang nganti leboh maia hari bukai ke lantang agi. 

Enti bisi orang parai di dinga rita sekumbang seduai ka apin nemuai, nya enda manah. Tang udah nya seduai tau belega enda begulai sebulan dua. Pia mega enti bisi mimpi enggau burong jai dalam kandang pemali, seduai diasoh belega dulu tauka diasoh empa orang ke sigi ditemu tau makai burong, makai mimpi awak ka tabar nadai pulai ke apa nama. Lalu pia mega enti sema ka burong tauka mimpi nya tak balat jai diabas enggau atau babi kena nyenaga iya. Enti atau babi nya jai seduai enda tau jadi melaki bini. Tang utai ke baka tu jarang bendar nyadi laban enti burong balat jai datai ka dua tiga iko orang diasoh makai awak ka iya tabar lalu enda pulai ka penusah.

Tang tau mega nyadi enti lelaki tauka indu nya madah kadiri bisi mimpi jai ditempa ka iya ngapa kategal laban enggai agi jadi tang takut ka betimbang mai sarak. Tang utai baka nya mar bendar kitai ka nyagam. Nyangka laban endang enda tentu deka bebendar jadi enggau pangan diri, tang laban ke alah dipejal ari ator apai indai tauka oaring bukai.

Lalu limping pulai baru ngagai penurun seduai ti ka mansang nyundang pinang nya tadi. Leboh ba serantu jalai sida iya sama-sama mending lalu berati ka gaya munyi burong. Enti lelaki nya endang orang ka nemu burong sida manah, iya enggai nusoi ngagai orang bukai laban ending ditemu iya manah tang enggai ka kabau. Leboh datai di rumah dia sida lalu niki baka temuai ke bukai mega. Udah begari udah dudok indah dia orang serumah nya lalu datai ngulu penatai sida. Orang ke indu begulu dibilik lalu orang ke lelaki begulu di ruai.

Semoa utai di empa ti di bai sida lalu diserungkai ngambi ka bisi di empa orang ka ngulu sida. Sarang gari lelaki lalu diserungkai, lalu semoa gari iya lalu diredai orang di ruai awak ka orang maioh meda gaya pemanah laban nya endang gaya adat. Maioh pan gari lelaki nya iya sigi enda taau nginjau selambar dua gari ari orang bukai enti nitih ka adat orang kalia. Tiga hari, tiga malam semoa gari nya ari meruan mengkang diredai di ruai.

Sekumbang tiga malam nya, lelaki nya patut tindok di ruai. Enti iya nemu reti adat orang ke belaki bebini, iya sepatut iya anang guai tindok dulu ari orang ka empu rumah tang naka ulih tiga lemai nya nat kadiri bejaga leboh orang ke datai nungga iya. Kabuah pia, laban enti semoa orang udah tindok magang, iya bisi ninga rusa, kijang, pelandok, punggu laboh tauka burong bukai enti orang bukai serumah nya nadai ninga, tang semina iya aja ke nemu. Nya manah bendar burong ngasoh kitai tau kaya, ngasoh kitai tau raja, tauk ngasoh kitai panjai umor tauka berani nyadi tuai orang maioh. Tang enti orang bukai serumah nya bisi ninga lalu bisi nyebut pagi siti, burong nya enda dikumbai manah lalu enda tau enda diasoh iya empa orang, tauka seduai iya belega dulu enda lama.

Enti lantang udah lepas tiga malam seduai iya pan lalu mulai kadiri ngagai rumah lelaki. Seduai ke enggau nganjong iya nyundang sigi endang udah pulai dulu laban naka semina semalam aja. Udah seduai angkat, semanjai jalai seduai bejalai enggau lantang mending ka munyi burong engka seduai iya bidik bisi ninga burong manah nyentok ka seduai iya datai ba rumah sida empu. Enti semua ka seduai bisi ninga burong enda manah tauka jai dia seduai iya lalu ngasoh orang makai burong nya awak ka tabar nadai pulai ke apa nama dudi hari ila.

Udah seduai datai dirumah pulai ke nyundang pinang, lalu naka nya meh ka pengaabis adat kitai Iban ba pengawa Melah Pinang lalu seduai iya tau begulai sejalai melaki bini nadai penti pemali agi lalu nadai betimpoh alai tau nemuai. Udah nya seduai iya tau nemuai lantang ati, nitih ka pengelantang enggau peneka ati seduai melaki bini. Enti baka lelaki nguai ka indu, udah lepas nyundang pinang nya baru seduai tau mulai ka diri nitih ka pengelantang ngagai rumah indu. Ator ka manah setaun nya seduai datai gawa kia-kia ngagai rumah apai indai lelaki, enggau rumah apai indai indu. Reti nya sama ngelama nya ba bilik lelaki , lalu ngelama nya mega ba bilik indu sekumbang seduai iyaa ke gai rumpas bedau bisi anak enti sema ka menua nya bengat tak enda jauh. Pisit agi seduai datai nemuai lalu manah agi ga setaun nya tang ukai belama iya. Siti kebuah manah enti pisit nemuai sekumbang taun baru jadi melaki bini laban semoa diri sebilik ti ditinggal ka seduai belaki tauka bebini endang enda lantang ati, lalu enti seduai iya bejarit nemuai enda tentu balat berasai ati sunyi sereta lelenggau kaa pangan diri. Leboh menantu enggau anak baru datai nemuai dia bala mentua sigi naka iya pengaga ati nyambut penatai seduai, ukai ba siko aja tang ba semua kaban belayan ke ngelala seduai ke udah begulai jadi melaki bini sigi endang ngembuan ati baka nya magang.

SARAK

Enti orang nya lalu sarak baru udah melah pinang, sekali ka lelaki tauka indu nya enggai agi ka pangan enggau nadai tentu meruan tegal ti tau ngasoh sarak. Dia barang sapa bagi seduai ti ditemu dulu muai pangan ka kena tinggang penyalah nitih ka pemesai ukum ba menoa nya. Enti sema lelaki muai indu, penyalah nya besai agi ari enggi indu. Nambah ka ukum Perintah iya mega di pinta mayar pemalu ngagai orang ti dibuai, nitih ka gaya pemesai adat ti selalu di kena ba menoa nya. Bisi mega sekeda lalu apin sempat begulai melaki bini takua enda tanti ka nyundang pinang alai seduai iya lalu muai pangan diri, tang pengawa ke baka tu jarang bendar kala nyadi.

Utai ke baka tu selalu nyadi enti barang sapa ari seduai ka jadi nya ending sigi enggai ka pangan, sekali ka enggai kategal gamal tauka endang udah bisi orang bukai ti udah di kedeka ka ati, tauka maioh tegal bukai, tang kebuah alai ke enggai enda nyadi melah pinang laban ari jako pejal apai indai. Kebuah alai enggai enda minta adat pemalu ngagai iya ke muai nya, laban tu meh pengawa ke dikumbai orang semina ngabas ruang bilik orang, nya kebuah ke ngasoh apai indai malu. Pengawa ka bansa nya endang naka penyai ba adat kitai Iban ke belaki bebini, semina beduan, ngayah, ngasa, ngemalu lalu ngerugi orang ba menoa nya. Suah mega apai indai iya ti dibuai nya lalu minta bayar ganti pengerugi belanja ti udah dikena sida iya ngerami pengawa melah pinang.

Enti sema ka seduai iya nya nyau sarak udah antara bulan tauka antara taun, taja pan nyau nadai tentu tegal lempong agi ga penyalah lalu pemalu nya nadai dipinta apai indai seduai ke di buai. Tang enti sema ka seduai iya nya sarak leboh seduai iya nyau udah bisi anak, dia iya ka lain agi ga gaya adat di pinta. Iya ke di temu kitai jarang bendar orang ti udah bisi anak ka sarak enti nadai kebuah tegal ti besai, laban leboh maia nya kitai nyau nemu berunding, laban ati nyau lebih agi ngerunding anak. Iya ke diatu adat Iban muai pangan kelalu balat lempong, nya alai orang mudah bendar ngelengka muai pangan.

Bisi mega kitai kala ninga runding orang ti endang rindu ka diri dikumbai orang maioh rambang, laban pengawa baka nya manah ko ati sida. Kebuah alai pengawa nya manah ba ati sida laban maioh orang ke deka jadi enggau sida, lalu sida ngemenang ka diri di dinga orang tampak rita suah bebini suah belaki sereta maioh anak telesak kin kitu. Pelaba ka aku maioh kitai ditu enda tentu setuju enggau aku ti nyebut, ngumbai ati enggau runding ti baka nya sigi salah bendar sereta enda tau enda diketu tauka diubah.

Jangka aku orang ke jadi melaki bini ngena atur Adat Melah Pinang deka lubah agi ngereja pengawa sarak enti leboh sida ngereja pengawa ke ngatur nya chukop jako, chukop aum bala apai indai enggau seduai ke jadi melaki bini nya tadi. Laban sida iya bisi ngenang baka ni ko gaya pengerugi enggau pengiroh sida empu enggau kaban belayan kulu kili ti sama udah enggau besaup ngereja pengawa leboh ti rami nya. Nya alai enti ulih anang meh ngudah kadiri bebini belaki laban enda lebu ko asai kitai jadi enggau pangan diri bisi pengiroh enggau pengerugi.