NGERAPOH

Nama Reti Pengawa Ngerapoh

Pengawa Ngerapoh tu iya nya, pengawa kitai bansa Iban leboh ti di kerja kena ngintu tauka nyengai pemati kitai sekaban tauka kitai sebilik ti mati tauka parai ba menua orang ketegal ti ngiga belanja kena ngidup kediri, tauka bangkai iya ti mati tu enda olih di bai sida sebilik tauka kaban belayan iya pulai ke menua ambi ke di intu tauka di sengai baka bangkai kitai Iban bukai ti udah nadai di menua kitai ditu empu. Kebuah ti ngereja Pengawa Ngerapoh tu iya nya kitai nganjung baya iya ti udah mati di menua orang ke pendam ba menua asal iya ti mati nya empu, ngambi ke semengat iya ba menua orang din tau pulai ngagai menua asal iya empu. Nyadi bangkai iya ti parai tu di tumbak ke ba menua orang lalu Adat Ngerapoh ka di intu ba rumah panjai asal menua iya ti mati tu munyi ko kenang aku ke sekali tu.

Chara Bangkai Iya Ke Mati Di Tumbak Ke Ba Menua Orang

Nyadi chara enggau gaya kitai ngintu pemati kitai sebilik tauka kaban belayan tu ba menua orang nya endang nadai bida ti di banding ke enggau gaya kitai ngintu pemati ba menua asal kitai empu nitih ke Adat Sempekat menua siti siti ti endang asal usul kitai.

Chara Ngereja Pengawa Ngerapoh

Sepemulai kaban belayan iya ti mati nya tadi ari menua orang udah ti ngintu tau ka numbak ke bangkai iya nya tadi, dia kaban belayan tauka sida sebilik tu lalu mai rengka. Iya nya gari tauka utai bukai ti endang enggi niang ti baru udah mati tu ambi ke dibai pulai ngagai bilik penaik sida iya di menua asal iya empu.

Leboh sida sebilik ti udah datai ba rumah panjai sida ke mati tu tadi dia sida iya enda tau niki ngapa enti enda di genselan ngena darah babi. Sida ke niki tu mega mesti niki ari pala tangga muak ke ujung ramu. Udah babi nya di bunoh ba pala tangga dia baru sida iya tau niki mai barang tauka rengka iya ti mati nya tadi tama serta lalu ke dalam rumah panjai sida nya. Nyadi bangkai babi ke dibunoh nya tadi lalu di irit niti tempuan rumah sida iya laban ambi ke darah babi nya kena ngenselan rumah.

Sida sebilik ke mai rengka iya ti mati tu enda tau sekali kali ngetu ba ruai orang tauka ba bilik orang bukai tang lalu nuju tama bilik sida ti mati nya tadi. Udah meh sida ti mai rengka iya ti mati tu tama ba bilik sida iya empu, dia sida iya lalu nyendia ke tajau siti ti di kena nyilih bangkai iya ti udah mati nya tadi. Nyadi tajau tu nadai milih bansa tajau laban nya nitih ke penyiru tauka pengasih sida sebilik ke iya ti udah mati nya tadi.

Nyadi tajau ti udah di taga ke sida ka di kena ngereja pengawa ngerapoh tu tadi lalu di gali ka ba tengah bilik serta di beri mandi baka kitai ti meri bangkai kitai mensia mandi mega. Udah tajau tu di beri mandi , dia sida iya lalu ngunsut iya enggau minyak. Udah tajau tu di unsut enggau minyak, dia sida iya lalu ngambi gari iya ti udah mati nya tadi lalu di bap ke ba tajau nya nitih ke gaya gari ti di kena ba tubuh kitai mensia bukai.

Lalu ba ruai sida ti beempu pemati tu mega ka di gaga ke sapat alai engkah rapoh tu lagi. Nyadi sapat tu di gaga baka sapat pemati kitai maioh, iya nya besukut empat serta di belit enggau tali ngeliling empat sukut sapat nya tadi. Ba sapat tu mega ka di redai ke pua kumbu tauka sebarang pua ti di kira sida sebilik tau kena nyapat. Lalu nyengkar ba atas sapat ari adap tanju ngagai tempuan ka di gantung ka kayu, tauka buluh, tauka tali ti ka ngunjur sapat alai sida sebilik engkah baya pandang.

Udah meh semua utai tu di kerja, dia tajau ti udah di beri mandi , serta di unsut minyak serta di bap enggau gari ka di tanggung ke ruai. Dia deh tajau tu lalu di gali ke ba atas tikai baka bangkai. Iya lalu di tanggung baka kitai ke nanggung bangkai ngagai ruai lalu di gali serta di engkah dalam sapat ti udah di sedia ka nya tadi.

Chara Nyenggai Antu Leboh Ngerapoh

Chara kitai nyenggai antu maia ngereja pengawa ngerapoh tu endang nadai bida enggau kitai ti nyenggai antu pemati kitai Iban bukai nitih ke Adat Sempekat rumah panjai ba menua siti siti. Iya nya nitih ke penyiru sida sebilik enggau sida serumah empu ke tudah niang ti udah mati nya tadi ti udah di tumbak ke ba menua orang bukai.

Chara Nganjung Antu Leboh Ti Ngerapoh

Nyadi chara kitai ti nganjung antu leboh ti ngerapoh tu iya nya enda sebaka enggau kitai ti nganjong antu pemati kitai Iban maioh ke ngelama tu. Kebuah pia laban pemati kitai Iban maioh ke ngelama tu iya nya kitai nganjung batang tubuh iya ti udah mati nya ke pendam. Nyadi ba pengawa ngerapoh tu kitai nganjung tajau ti di kena kitai nyilih batang tubuh iya nya tadi, nyadi ke baya iya ti udah mati ke ka dianjung ngagai pendam ba menua asal iya ti mati nya empu.

Nya alai laban ti nganjung Tajau Rapoh ngagai pendam, lalu gaya penurun iya pan enda mega sama enggau kitai ti ngajung antu pemati kitai ke bukai. Nyadi Tajau Rapoh tu enggai nyadi di kaling tauka di san kitai baka ke ngaling tauka ngesan santubong tauka lungun leboh ti nganjung iya ke pendam. Tajau Rapoh tu mega enggai serta enda tau sekali kali di simpan kitai dalam santubong tauka lungun baka kitai ti nyimpan batang tubuh bangkai kitai Iban bukai.

Chara kitai ti nganjung Tajau Rapoh tu iya nya, iya mesti ka di ema kitai ngena selabit berengkah ari kitai ti angkat ninggal ke sapat sampai ke kitai nyau datai di pendam. Lalu chara kitai mai baya ke bukai nya nadai bida, iya nya di bai kitai bejalai niti rumah nengah tempuan ngagai ujong ramu. Sebedau Tajau Rapoh tu bekejang di ema ari sapat ruai sida ke mati nya tadi dia siko ari bala ke enggau nganjung antu nya ka bejalai dulu ari orang bukai mai sempun api.

Chara Numbak Ke Tajau Rapoh

Nyadi Tajau Rapoh ke di ema nya tadi enggai nyadi di tumbak ke baka kitai ti numbak ke bangkai kitai Iban bukai. Kebuah pia laban bangkai niang ti udah parai lalu di rapoh tu tadi endang udah di tumbak ke ba pendam di menua orang nya alai iya enggai nyadi di tumbak ke kedua kali. Nyadi Tajau Rapoh tu ka di dudok ke ba atas pendam ke udah di taga ke sida sebilik alai iya nya tadi, iya nya kena nanda ke iya ti di rapoh nya tadi udah mati lalu di tanda ke dia ba pendam ngena Tajau Rapoh. Tajau Rapoh tu mega enda tau di semin enti sema pendam iya ti mati di rapoh tu tadi udah di semin ba menua alai bangkai iya ti di tumbak ke nya tadi. Nya alai ba Pengawa Ngerapoh tu pengawa nyemin enggau numbak ke Tajau Rapoh tu enda tau di kerja sekali kali enti sema pengawa nya udah di kerja dulu ba menua orang ti alai bangkai nya udah di tumbak.

Chara Numbak Ka Bangkai Iya Ti Mati Nya Ba Menua Orang

Nyadi chara kitai numbak ke bangkai iya ti mati nya ba menua orang endang sebaka, baka kitai ti numbak ke bangkai kitai Iban bukai nitih ke Adat Sempekat ba menua siti siti.

Pengawa Nyemin Pendam Udah Bangkai Nya Di Tumbak Ka Ba Menua Orang

Maioh kaban belayan kitai Iban ti mati lalu bangkai iya ka udah di tumbak ka ba menua orang laban ti enda olih di bai pulai ngagai menua iya empu lalu di kemas ke sida enggau nyemin pendam. Kebuah pia laban ngambi ke pendam alai numbak ke iya nya tadi nyamai di temu kaban belayan iya ke datai ari menua iya empu ke dudi hari ila leboh maia sida iya datai ngabas pendam.