BEJALAI KE ULIT

Nama Reti Pengawa Bejalai Ka Ulit

Reti pengawa bejalai ke ulit tu iya nya di kerja orang ke udah kena tinggang penusah pemati ti nyau ka ngereja pengawa ngetas ulit tauka muai ulit. Pengawa tu di kerja sebedau ulit nya di ketas. Kebuah pengawa tu di kerja iya nya kena benyamai ke isi tauka ati orang ti udah kena penusah nya tadi.

Kati Gaya Pengawa Bejalai Ka Ulit Tu Di Kerja

Nitih ke pengawa ti di kerja kelia menya, orang ke bejalai ka ulit tu iya nya nurun Kayau Anak, ngiga pala munsoh kena nyilih tubuh niang ti baru udah parai ninggal ke sida ti ka di buai ulit nya ila. Tang laban kitai kemaia hari tu nadai agi bemunsoh, nadai bebunoh nya alai pengawa bejalai ka ulit tu di kalih ka enggau penurun orang ti bejalai ka ulit nya begiga ka sumbok isang kena nyilih pala munsoh ngagai menua ke kala udah alai orang ngayau tauka orang betempoh serta bebunoh kelia menya.

Baum Bejalai Ka Ulit

Kira seminggu sebedau ulit nya ka di ketas dia orang ke beempu pemati nya ka nesau sida sekaban mai baum ka bejalai ka ulit. Leboh ti baum nya sida iya ka netap ka ngagai menua ni alai sida iya ka bejalai begiga ke sumbok isang leboh ti bejalai ka ulit nya ila. Sida iya mega ka bepilih ka bagi orang ti patut enggau ngereja pengawa bejalai ka ulit nya ila, laban enggai nyadi tak sebarang orang bai enti orang nya bedau tuai umur lalu mesti lelaki. Ba menua kami di Brayang, Roban bedau kala orang indu udah enggau ngereja pengawa bejalai ka ulit. Menua ke selalu di gagai kami semenua iya nya baka Bukit Sadok (alai Rentap betempoh ngelaban perintah Charles Brooke), Bukit Bangunan (selalu alai saldadu betempoh ngelaban komunis), serta enggau Bukit Kelingkang (selalu alai saldadu betempoh enggau komunis sereta kitai Iban kelia belaban bebunoh enggau orang ari menua Indonesia).

Nama Gaga Orang Leboh Ti Bejalai Ka Ulit

Orang ti bejalai ke ulit tu leboh ke nurun iya nya sama sereta angkat ari rumah orang ti kena tinggang pemati ti ka di ketas ulit nya ila. Datai sida iya ba alai orang ti kala ngayau kala mulau tauka kala betempoh kala bebunoh nya tadi, dia sida lalu ngaga pelasar alai sida tindok. Udah nya sida iya lalu enggau ni pengelantang ati diri nguan pelasar nya serta begiga ka sumbok isang semak endor nya. Udah meh sida iya bulih sumbok isang nya tadi dia sida iya lalu manjong ngelulu kediri baka orang kelia ke udah mumpong pala munsoh. Sida ke bejalai ka ulit tu pan lalu beguai guai mulai kediri ke menua laban ti kelia sida iya nangi kediri di titih ka munsoh tauka kaban belayan orang ke udah olih sida. Lalu pengawa ke baka tu kala udah nyadi leboh kami semenua bejalai ka ulit ngagai Bukit Kelingkang ti di titih ka orang ari menua Indonesia menya. Nyadi sumbok isang tu tadi lalu di selit ka sida ba sarong duku diri empu baka orang kelia ka engkah bulu pala munsoh.

Datai sida di menua tauka rumah sida ti ka beketas ulit nya, sida tu tadi enda tau sekali kali lalu terus niki ka rumah. Selalu iya sida tu diau ba sebelah langkau kebun tauka di tanah nganti maia dini hari tauka kira maia manang udah tembu belian sara bungai tang sebedau hari teberingkas tawas, tauka burong nyau di dinga bemunyi.

Iya meh leboh maia sida ti bejalai ka ulit nya patut niki dia orang ke beempu pemati nya lalu nyendia ka setawak siti di engkah ka ba tengah ruai sida, chapak besai sesingkap ti udah diisi enggau ai, labu rendam ti udah chukup rangkai serta udah tau kena nyauk, enggau manok siko, lalu di engkah ba ruai nya. Dia bala bukai lalu bebai niki ka sida ti bejalai ka ulit nya tadi. Sida ti mansang ka niki ka sida ti pulai bejalai ka ulit nya lalu mai senapang, tuak sebotol enggau telu manok sigi ke setiap iko bala orang ti pulai bejalai ka ulit nya.

Orang ke ngambat sida pan udah nganti ba pala tangga , dia sida ti pulai bejalai ka ulit pan lalu niki. Serta sida tu niki, dia orang ke nganti ba pala tangga lalu nimbak ka senapang. Sida ke pulai bejalai ka ulit nya pan lalu nimbal enggau panjong ke nyaris tiga kali baka orang ti gaga kediri pulai ngayau bulih pala munsoh. Sida lalu di genselan ngena telu manok lalu diasoh makai telu manok sigi siko serta di beri ngirup ai tuak. Benong senapang nya di timbak ka, serta orang ti bejalai ka ulit nya niki, dia bala bukai ke nganti ba ruai lalu nerantang ka setawak nimbal sida ke ba pala tangga nya tadi.

Sida ti niki ka orang ke pulai bejalai ka ulit serta enggau sida ti baru pulai bejalai ka ulit nya lalu bejalai betangkan niti ruai sampai ke sida iya nyau datai ba ruai orang ti ka ngetas ulit nya tadi. Datai sida ba ruai nya dia sida lalu manjong baru tiga kali, udah nya baru sida iya dudok ba ruai orang nya. Udah sida dudok dia orang ke beempu rumah lalu miau sida ke pulai bejalai ka ulit nya enggau manok. Udah sida iya tembu di biau dia siko ari sida ti enggau bejalai ka ulit nya, ti udah dipadu ka nyadi tuai lalu di asoh orang ngereja pengawa ngetas ulit lalu tama ke bilik ngambi kebok tauka baku ke di kena orang nanggam ulit. Lalu mai kebok tauka baku nya pansut ke ruai.

Datai di ruai iya lalu muka tungkus ulit nya, lalu pengawa ngetas ulit pan berengkah. Udah semua ulit nya di ketas dia utai ke nyadi ke ulit nya lalu di simpan iya dalam labu nya tadi. Udah nya baru orang ti ngetas ulit tu tadi nganjong labu nya ke alai engkah ulit ke udah diketas nya ngagai sunagi tauka pendai serta lalu ngerarat ke labu nya. Udah tembu pengawa tu iya lalu pulai ke rumah baru. Datai iya di rumah, dia iya lalu ngambi semua sumbok isang ke ulih di bai sida iya pulai bejalai nya lalu di engkah begulai enggau antu pala ke di kemisi ka orang ti ba rumah panjai nya tadi.

Nyadi pengawa belian sara bungai, orang ti pulai bejalai ka ulit, enggau pengawa orang ti ngetas ulit pan udah tembu. Orang maioh pan lalu diberi makai pagi. Udah tembu makai pagi nya baru orang berengkah ngereja pengawa muai tebalu serta di tangkan ka pengawa ngambi tebalu enti pengawa tu bisi di kerja. Tang enti orang ke mati nya sigi udah balu dia pengawa nadai agi kelimpah ari sida kaban belayan ti ngambu pangan diri nyadi kaban belayan ngena adat ba mua orang maioh.

PENGAWA BELIAN SARA BUNGAI

Nama Pengawa Belian Sara Bungai
Nyadi pengawa belian sara bungai tu iya nya pengawa ti di kena kitai ngupas tauka ngintu kitai ti agi idup ambi ke enda saum pendiau serta begulai semengat enggau orang ti udah mati. Lalu selalu iya pengawa tu di kerja kitai bansa Iban leboh maia malam orang ti nyau ka ngetas ulit tauka sebedau ulit di ketas. Lalu pengawa belian sara bungai tu di kerja orang ti kena tinggang penusah pemati nya, lalu di pelian ke olih manang ti endang udah di asoh sida empu nya tadi.

Kati Gaya Manang Belian Sara Bungai
Nyadi rengka ti di kena manang ngereja pengawa belian sara bungai nya nitih ke gaya pinta manang siko siko. Kira udah tembu manang enggau orang ti beempu pengawa nya tembu makai lemai dia manang lalu berengkah ngereja pengawa iya ti bemanang. Endang ke baka enti manang ka belian orang sigi maioh ngulu iya laban ke ka begama minta ubat iya ketegal ti maioh macham penyakit. Sebedau iya begama dia manang lalu nungkun ke api kelita lalu ngasoh orang madam ke api laban iya ka nenggau Batu Ilau meda gaya semengat orang serumah nya tadi. Udah nya baru api tau di pasang baru lalu manang pan ngirah ai enggau batu penchelap iya ti di bai iya ba lupong. Iya pan lalu ngama pemedis orang ke minta puchau iya.
Udah tembu begama nya baru manang ngasoh orang ngayan ke rengka piring enggau manok laban iya ka berengkah miring kena ngepun ke pengawa belian iya nya. Manang lalu miring di bilik orang ke beempu pengawa nya, lalu nerang ke reti enggau gaya pelian iya ngagai orang ke bisi ngulu iya malam nya. Leboh manang nya tadi ngereja pengawa miring di bilik dia orang ke ba ruai lalu niri ke pagar api ba ruai orang ti belian nya. Nyadi rengka ke di kena orang niri ke pagar api iya nya , sigi kebok, sebatang sangkoh, sebatang buluh, siti dan kayu temali serta enggau pua kumbu selambar.

Pagar api tu di diri ke baka tu:
( a ) Kebok di engkah ba tengah ruai orang ke belian nya;
( b ) Sangkoh enggau buluh nya lalu digembar ke betanchang enggau dan kayu temali lalu di simpan serta di diri ka dalam kebok nya tadi;
( c ) Udan nya baru kebok enggau utai tu tadi lalu di serayong enggau pua kumbu.

Udah meh pagar api tu di diri ka ba ruai dia manang lalu ngasoh, mesti orang indu siko nganjong denok ngagai pagar api ti udah ba ruai nya tadi. Nyadi pantang orang indu ti udah nganjong denok nya tadi ke ruai iya nya, leboh iya pulai baru tama ke bilik iya enda tau sekali kali malik ke ruai baru sampai ke iya nyau udah tama dalam bilik. Udah meh orang indu ke nganjong denok tu tama ke bilik nya baru manang pansut ke ruai lalu berengkah ngereja pengawa belian sara bungai.

Manang pan lalu berengkah nyebut leka pelian iya nungga pagar api nya tadi lalu orang maioh pan sama begelumu ngelingi iya dia. Nyau ke puas manang nya nyebut leka pelian nungga pagar api dia iya lalu angkat nyebut leka pelian bejalai ngelingi pagar api serta lalu beserayong enggau pua kumbu ke di kena nyerayong pagar api nya tadi. Udah meh leka pelian manang nya nyau sangkai ba maia semengat kitai ti idup enggau sida ke mati nya patut beserara dia manang lalu ngetas siti ari dan kayu temali ke di diri ka ba pagar api nya tadi. Lalu enti kitai bidik kitai bisi meda dan ke ka di ketas manang nya berupai layu agi ari dan bukai nanda ke dan nya udah di pilih sebayan bagi enggi sida.
Udah dan kayu temali nya di ketas dia manang lalu muai dan nya enggau utai bukai ke ka di ungkop orang ke beempu kaban ti udah mati nya tadi ke empu sebayan nanda ke sida iya udah beserara lalu enda begulai semengat agi. Udah utai tu di kerja dia manang lalu ngirah ai penchelap lalu ngusai rumah orang nya enggau ai penchelap ambi ke rumah orang nya tau chelap embap, gerai nyamai, nadai apa nama serta nadai di tinggang penusah ke tegal pemati agi baka ke udah. Ka pengabis pengawa manang lalu ngengkah ka pua kumbu ke di kena iya belian nya tadi ba atas mua pintu orang ti di pelian ke iya nya tadi nyadi ke pelepa nanda ke bilik orang nya udah badu belian sara bungai.
Nyadi nitih ka leka kelulu pelian manang ba pengawa belian sara bungai tu iya nya kitai ti agi idup minta manang mensiang bungai semengat kitai ti agi idup di sebayan awak ka sida ti udah mati nemu diri, udah mati , lalu enda agi ngachau tauka begulai enggau semengat kitai ti agi idup. Laban nitih ka kelulu manang iya nya leboh manang mensiang bungai nya tadi dia deh bungai enggi sebayan layu lalu mati tang enggi kitai mensia ti agi idup mansang galak nyau mesai puchok tapang.

CHARA NGEREJA PENGAWA BESAPAT DI DARAT

Pengawa besapat di darat tu di kerja leboh bejadi ke salah serak iya nya turun tusut tiga nangga empat. Reti nya pangkat tanah anak ka jadi enggau pangkat tanah aya tauka ibu iya empu (tauka ka jadi enggau menyadi ambu apai tauka indai iya, tauka menyadi tiri apai tauka indai ). Nyadi penyalah jadi salah serak ke di sapat di darat tu enda ngemesai penyalah jadi salah serak ke di sapat di ai. Nyadi chara seduai tu besapat iya nya nitih ke tampong serta kala udah dikerja ba menua kami empu di Rh. Undi, Brayang, Roban ba tahun 1991 iya nya bejadi ke Itut Ak Muyang seduai Ejah Ak Rajit (pangkat tanah aya jadi enggau pangkat tanah anak).

Tumu pagi dia semua kami serumah begempuru ba ruai sida ke ka di sapat di darat nya tadi. Nyadi udah semua terenah datai dia seduai iya lalu di asoh duduk ba tengah tuggong bala maioh. Udah nya baru tuai rumah lalu bejako madah ke kami ka ngintu seduai bejadi ngena jalai besapat di darat laban udah di temu salah serak ambi ke kena muai penti pemali.

Udah nya seduai tu lalu di iring kami serumah enggau kaban belayan ke bukai ke bisi datai berdiding ngena pua kumbu serta di iring ngena gendang berengkah ari rumah nyentok ke datai ba tengah laman rumah ke ka alai kami serumah mela pengawa seduai iya tu. Lalu orang ke lelaki ti dulu bejalai ke bala kami nya lalu nyan Sumpit Tapang sebatang, Sangkoh siti, nangkin Nyabor Chudur siti serta lalu mai Beliong Lajong siti. Utai bukai iya nya mai manok lelaki siko enggau tabak siti ti endang udah di sedia ke rengka ka kena miring. Lalu mega mai babi idup sesepa siko. Sida ke indu pan pia ga lalu mai tikai bebuah selambar, mai Jalong Jebong siti enggau Chapak Bebungai sesingkap.

Nyadi semua kami ke mansang ngiring seduai tu ngagai tengah laman rumah ke ka alai mela pengawa seduai endang nadai anembiak mit laban sida iya enda tau enggau ko jako sida ke tuai. Lalu kami ke tau enggau nya endang orang ke udah bisi ruang bilik maggang laban enggai ke utai ke di kerja nya tau ngerampit tauka sial nya di tampong bala anembiak ke bukai.

Datai kami ba tengah laman ke ka alai mela pengawa seduai iya, dia bala lalu beratur ngereja pengawa. Siko orang ke nemu ditaga ke ngereja pengawa miring lalu ngereja pengawa ba tengah laman nya lalu siko orang tuai nya ngelulu kediri nyadi petara lalu iya nya di asoh belalai ba babas enda jauh ari alai ke ka alai seduai tu di sapat. Pengawa miring pan lalu berengkah lalu leka biau bala lemambang lalu bisi madah ke munyi tu:

“Nyadi kami ke miau piring miau ading tu laban ngintu pengawa bejadi ke Itut seduai Ejah tu ke udah di temu ka jadi salah serak. Nya alai kami mai Sumpit Tapang sebatang tu kena kami nyebat ngerejang lubang kilat. Nyadi Chapak Bebungai sesingkap tu di kena kami nyekat tanah rarat. Nyadi Nyabor Chudur tu di bai kami kena mantap urat lensat. Nyadi Beliong Lajong tu di kena kami mungga urat melabat. Nyadi Pua Kumbu tu di kena kami miau moa hari ke udu balat betakat. Nyadi kami tu mai Jalong Jebong ambi ke bisi di kena kami map tekuyong ba baroh ungkap. Lalu babi sesepa siko tu di kena kami, ngenselan ai ambi ke tasik enda begelumbang enda belinggang, serta lalu di kena kami ngenselan darat (tanah) ambi ke menua enda berubah, tanah enda betingkah enda merekah”, nyadi nya meh siti ari bagi leka biau maia nya.

Nyadi piring ke di kena iya ngintu nya turun tiga, siti piring ke terubah nya di tumbak ke ba darat begulai enggau siko babi ke di bunoh lalu di tumbak ke segala ba darat udah ti ngenselan tapa kaki seduai nya. Siti piring ti kedua nya lalu di gantung ke ba mata sangkoh serta di ujak ke ba tengah laman ke alai ngereja pengawa. Siti piring ti ke tiga nya di anjong ngagai nanga jalai rumah kami empu.

Udah tembu pengawa miring nya, seduai iya lalu di asoh dudok ba atas setawak lalu di sayat ke babi ba tapa kaki seduai ambi sama basah laban darah babi kena ngenselan seduai iya enggau menua. Udah nya seduai iya lalu di biau ngena manok baru. Lalu leka biau nya mega bisi munyi tu: “Laban semua penagawa seduai tu ti besapat di darat nya tadi udah di kerja kami maggang lalu semua utai udah chukup genap chukup serkap nya alai kami ngarap ke pengawa seduai tu nadai pulai ke penti pulai ke pemali, lalu tanah enda berenyang, tasik enda belinggang, buah nyadi manah, tangkai labu enda layu.”

Ninga munyi nya siko orang tuai ke udah di padu ke ngelulu kediri nyadi petara ti di asoh belalai ba babas enda jauh ari nyn pan lalu pansut serta nyapa, “Ooo…nama pengawa kita tu tak rami, bebunoh babi, bebai piring, bebai ading, begendang enggau setawak, betaboh ke dumbak, beiring ke sida endu tu ngena pua kumbu ?” pia ko iya.

Nyadi iya ke miau seduai ari seberai tu pan lalu nyaut, “Nya meh kami tu bejadi ke Itut seduai Ejah ke udah di temu kami jadi salah serak. Nya alai seduai iya di intu kami ngena chara besapat di darat,” pia ko iya.

Udah ninga saut nya dia iya ke belalai ba babas semak nya lalu nyumpah munyi tu, “Ooo ti baka nya manah meh berita ke di kerja kita, nyadi aku tu laban ke nyadi petara nya alai aku nyumpah kita nadai apa , nadai nama, gayu guru, gerai nyamai”…lalu ditampong enggau jako sumpah bukai ke manah di dinga bala maioh.

Nyadi babi ke udah di kena ngenselan seduai nya tadi lalu di tumbak ke segala ba tengah laman nya tadi. Manok lalu di bunoh kena ngenselan tapa kaki seduai iya lalu pala manok nya di gantung ba mata sangkoh begulai enggau piring, di engkah ka ba tengah laman nya tadi. Chapak lalu ditumbak ke dia.

Udah pengawa tu tembu bala maioh lalu mulai kediri ke rumah panjai lalu makai bebala maioh serta lalu ngereja pengawa bukai laban pengawa besapat di ai tu tadi udah kemas di kerja lalu nadai pulai ke pengirau bala maioh ke begulai pendiau enggau seduai ke jadi melaki bini salah serak nya tadi.

CHARA NGEREJA PENGAWA BESAPAT DI AI

Pengawa besapat di ai tu di kerja leboh bejadi ke salah serak iya nya turun tusut dua nangga tiga. Reti nya pangkat tanah anak ka jadi enggau pangkat tanah aya tauka ibu iya empu (tauka ka jadi enggau petunggal apai tauka indai iya). Nyadi chara seduai tu besapat iya nya nitih ke tampong serta kala udah dikerja ba menua kami empu di Rh. Undi, Brayang, Roban ba tahun 1992 iya nya bejadi ke Jatan Ak Randi seduai Aba Ak Dangan (pangkat tanah aya jadi enggau pangkat tanah anak).

Tumu pagi dia semua kami serumah begempuru ba ruai sida ke ka di sapat di ai nya tadi. Nyadi udah semua terenah datai dia seduai iya lalu di asoh duduk ba tengah tuggong bala maioh. Udah nya baru tuai rumah lalu bejako madah ke kami ka ngintu seduai bejadi ngena jalai besapat di ai laban udah di temu salah serak ambi ke kena muai penti pemali.

Udah nya seduai tu lalu di iring kami serumah enggau kaban belayan ke bukai ke bisi datai berdiding ngena pua kumbu serta di iring ngena gendang berengkah ari rumah nyentok ke datai di pendai. Lalu orang ke lelaki ti dulu bejalai ke bala kami nya lalu nyan Sumpit Tapang sebatang, Sangkoh siti, nangkin Nyabor Chudur siti serta lalu mai Beliong Lajong siti. Utai bukai iya nya mai manok lelaki siko enggau tabak siti ti endang udah di sedia ke rengka ka kena miring. Lalu mega mai babi idup sesepa dua iko. Sida ke indu pan pia ga lalu mai tikai bebuah selambar, mai Jalong Jebong siti enggau Chapak Bebungai sesingkap.

Nyadi semua kami ke mansang ngiring seduai tu ngagai pendai endang nadai anembiak mit laban sida iya enda tau enggau ko jako sida ke tuai. Lalu kami ke tau enggau nya endang orang ke udah bisi ruang bilik maggang laban enggai ke utai ke di kerja nya tau ngerampit tauka sial nya di tampong bala anembiak ke bukai.

Datai kami di pendai, dia bala lalu beratur ngereja pengawa. Siko orang ke nemu ditaga ke ngereja pengawa miring lalu ngereja pengawa ba pendai lalu siko orang tuai nya ngelulu kediri nyadi petara lalu iya nya di asoh belalai ba seberai pendai ke ka alai seduai tu di sapat. Pengawa miring pan lalu berengkah lalu leka biau bala lemambang lalu bisi madah ke munyi tu:

“Nyadi kami ke miau piring miau ading tu laban ngintu pengawa bejadi ke Jatan seduai Aba tu ke udah di temu ka jadi salah serak. Nya alai kami mai Sumpit Tapang sebatang tu kena kami nyebat ngerejang lubang kilat. Nyadi Chapak Bebungai sesingkap tu di kena kami nyekat tanah rarat. Nyadi Nyabor Chudur tu di bai kami kena mantap urat lensat. Nyadi Beliong Lajong tu di kena kami mungga urat melabat. Nyadi Pua Kumbu tu di kena kami miau moa hari ke udu balat betakat. Nyadi kami tu mai Jalong Jebong ambi ke bisi di kena kami map tekuyong ba baroh ungkap. Lalu babi sesepa dua iko tu di kena kami, siko di kena ngenselan ai ambi ke tasik enda begelumbang enda belinggang, lalu siko di kena kami ngenselan darat (tanah) ambi ke menua enda berubah, tanah enda betingkah enda merekah”, nyadi nya meh siti ari bagi leka biau maia nya.

Nyadi piring ke di kena iya ngintu nya turun lima, siti piring ke terubah nya di tumbak ke ba darat begulai enggau siko babi ke di bunoh lalu di tumbak ke segala ba darat. Siti piring ti kedua nya lalu di gantung ke ba mata sangkoh serta di ujak ke ba tebing pendai ke alai ngereja pengawa. Siti piring ti ketiga nya lalu di anjong ngagai tebing ai seberai nyin. Siti piring ti ke empat nya di anjong ngagai nanga jalai rumah kami empu. Lalu piring ke penudi nya ka di perarat ke nangkan seduai ti ka di sapat ba ai udah nya lagi.

Udah tembu pengawa miring nya, seduai iya lalu di asoh bediri ba dalam ai ba pendai nya lalu di biau ngena manok baru. Lalu leka biau nya mega bisi munyi tu: “Laban semua penagawa ba darat nya tadi udah di kerja kami maggang nya alai tu kami ngereja pengawa nyapat seduai di ai. Laban semua utai udah chukup genap chukup serkap nya alai kami ngarap ke pengawa seduai tu nadai pulai ke penti pulai ke pemali, lalu tanah enda berenyang, tasik enda belinggang, buah nyadi manah, tangkai labu enda layu.”

Ninga munyi nya siko orang tuai ke udah di padu ke ngelulu kediri nyadi petara ti di asoh belalai ba tebing pendai seberai nyin pan lalu pansut serta nyapa, “Ooo…nama pengawa kita tu tak rami, bebunoh babi, bebai piring, bebai ading, begendang enggau setawak, betaboh ke dumbak, beiring ke sida endu tu ngena pua kumbu ?” pia ko iya.

Nyadi iya ke miau seduai ari seberai tu pan lalu nyaut, “Nya meh kami tu bejadi ke Jatan seduai Aba ke udah di temu kami jadi salah serak. Nya alai seduai iya di intu kami ngena chara besapat di ai,” pia ko iya.

Udah ninga saut nya dia iya ke ba tanah seberai nyin lalu nyumpah munyi tu, “Ooo ti baka nya manah meh berita ke di kerja kita, nyadi aku tu laban ke nyadi petara nya alai aku nyumpah kita nadai apa , nadai nama, gayu guru, gerai nyamai”…lalu ditampong enggau jako sumpah bukai ke manah di dinga bala maioh.

Udah tembu pengawa tu seduai ti ka di sapat nya tadi lalu di asoh mansang ke ili pendai, udah nya babi siko lalu di bunoh ari ulu seduai nya tadi ambi ke tubuh seduai iya di telusor darah babi. Manok ke di kena bebiau nya pan lalu di bunoh mega ba ai nya baka ke enggau babi tadi. Piring siti pan lalu di perarat ka nangkan ke nya. Nyadi tubuh babi enggau manoh nya tadi lalu di perarat ke maggang enda di bai pulai. Gari ke udah di kena seduai nya mandi telusor darah babi nya pan lalu di buai. Pala manok ke kena miau seduai nya tadi lalu digantung ba mata sangkoh begulai enggau piring nya tadi ba tebing pendai ke alai seduai nya besapat.

Udah pengawa tu tembu bala maioh lalu mulai kediri ke rumah panjai lalu makai bebala maioh serta lalu ngereja pengawa bukai laban pengawa besapat di ai tu tadi udah kemas di kerja lalu nadai pulai ke pengirau bala maioh ke begulai pendiau enggau seduai ke jadi melaki bini salah serak nya tadi.

PENYALAH JADI MALI

Nyadi dulu kalia kitai Iban enti jadi mali baka anak jadi enggau apai tauka indai, tauka pangkat anak jadi enggau pangkat aya tauka pangkat ibu, tauka mentua jadi enggau menantu, tauka jadi salah serak nitih ke tusut, ukum iya kena bunoh kadua dua iko seduai ke ngaga penyalah nya, jalai munoh seduai ti jadi salah serak tauka jadi mali tu iya nya enggau buloh aur pantang ke udah di lancham tajam bendar lalu dipantang ka ba tubuh seduai ti di pegulai ka betangkup dalam siti lubang baka kitai ke numbak ke orang mati, tang nadai di simpan dalam lungun tauka santubong, indu ari baroh lalu lelaki ari atas. Lalu udah seduai iya nya ditumbak, dia buloh aur nya tadi lalu di pantang orang ke udah di padu ke ngereja pengawa mantang seduai nya tadi sampai ke seduai iya parai. Lalu udah seduai iya parai dia sepun buloh aur lalu di tanam atas apak bangkai seduai ke udah mati di aur nya tadi di tumbak kena ngingat ka alai pendam seduai iya. Nya alai di sebelah menoa kitai bisi buloh ke di kumbai orang buloh aur pantang, serta bisi di peda turun menurun kitai Iban nyentok ka kamaia hari tu baka ba Nanga Poi di Kanonit.

Kabuah alai kitai Iban badu agi ngena ukum pantang ngena buloh aur, bepun ari cherita indu siko benama Simbah dulu kelia nitih ka ajar Sengalang Burong. Laban cherita tu enda bepun ari tusut nya alai aku enda tentu nemu sekali ke cherita tu bendar tauka bula. Nyadi Simbah tu iya nya indu dara, tang nyau kalama dia iya di peda sida serumah tak lain pendiau baka ke udah betubuh bisi lalu di temu sida ngandong nadai bisi laki. Meda iya ngandong baka nya dia sida serumah lalu nanya iya sapa orang lelaki ke bisi buya udah enggau iya beleman. Nyau ke puas sida serumah ke nanya iya, tang Simbah tu lalu enggai madah ke sapa lelaki ti enggau iya beleman nya nyentok ka iya nyau di temu orang maioh ngandong nadai bisi laki.

Simbah pan agi enggai nusoi madah ke diri empu sigi digayap menyadi iya empu ti lalu enggau iya beleman sampai ke nyau betubuh bisi. Nya alai kebuah iya ke enggai madah ngagai orang maioh laban takut ka diri di pantang orang ngena buloh aur. Kandong iya pan nyau chukop sarat bulan, dia Simbah pan lalu beranak tang menoa sida iya balat bendar di pangka ka kudi, siang malam ujan enggau kabut nadai ngetu ngetu sepengudah anak Simbah tu ada. Tanah nyau tumpor laban tusor ti balat bendar di maioh bengkah endor, lalu mensia pan nadai meruan gawa laban hari ke selalu jai baka nya. Meda hari enda badu kudi, dia apai indai iya enggau sida serumah lalu minta Simbah enda tau enda madah ka sapa lelaki ke enggau iya beleman. Enti iya enda madah, orang maioh sigi udah besemaia deka munoh iya, meda kudi lalu enda nemu badu. Nyadi hari siti bedau ga orang maioh nya tadi munoh iya, dia tudah Simbah lalu di peda sida berua nimang anak iya di ruai, lalu tu munyi leka timang Simbah ngagai anak iya ti didinga orang.

Adu adu anak aku ukai nadai apai,
Endang aku tu bisi orang ngayap,
Tang enda kempang aku ka madah,
Takut ka kami duai di tinggang penusah,
Anang meh kita munoh aku ,
Enti aku tu salah tau betimbang,
Lalu tau di ukum nitih ke tusun tunggu,
Tau Besapat di ai, tau besapat di darat.
Bunoh ka babi siko di ai,
Lalu siko di darat,
Ke di kumbai babi emperingat,
Bai ka Nyabor chudur siti kena mantap urat lensat,
Beliong Lajong kena mungga urat melabat,
Jalong Jebong kena nudong tekuyong baroh ungkap,
Pua Kumbu kena kitai miau moa hari ke balat betakat,
Sumpit Tapang di kena ngerejang nyebat lubang kilat,
Chapak sesingkap di kena nekat tanah rarat,
Udah nya baru kami duai di ukum ngena benda rusa,
Kena besapat ngambi ka kena muai penti pemali.

Ninga leka timang Simbah munyi nya dia sida serumah lalu berunding ninga nya. Sida pan lalu madah ka enda nyadi ka munoh iya enti iya madah ka bagi lelaki ke enggau iya ngereja penyalah nya, tang sida ka ngereja pengawa ngenselan menua nitih ka leka timang Simbah nya. Simbah pan lalu madah ka sapa bagi lelaki ka enggau iya beleman nya. Iya nya menyadi iya empu ke benama Lamit. Menyadi iya empu ti ngayap iya ke lalu ngasoh iya ngandong. Udah nemu nya, orang maioh lalu ngereja pengawa nitih ka samoa utai ke dipadah ka Simbah nunda leka buah timang iya nya tadi. Sereta udah tembu sida ngereja pengawa ngenselan menua nya, hari pan lalu baik baka ka dibuai empeleman. Simbah seduai Lamit tadi enggai nyadi di pejadi ka sida serumah, laban seduai iya tak diri menyadi tampong pala. Nyadi hari ke balat kudi pan nyau tedoh udah bekau penyalah beleman Simbah seduai Lamit nya udah diadu ka ngena adat nitih ka munyi leka timang Simbah.

Adat tu pan lalu meruan di tampong kitai bansa Iban nyentok ka diatu. Enti orang bisi jadi belaki bebini salah serak tauka butang betumbang enggau pangkat anak tauka apai, tauka indai, tauka mentua enda tau enda diukum ngena adat lama tu, bunoh ka babi kena besapat awak ka menoa enda kudi.

Nyadi ukum Perintah nya siti ga jalai ke baru di kena kitai bansa Iban kamaia hari tu, lalu enda tau enda ninggang. Enti orang ke jadi salah nadai utai kena betimbang iya tau kena tinggang ukon jel nitih ka adat Perintah. Satu nangga dua, reti nya anak di temu salah jadi enggau aya lalu ka di sapat di darat enggau di ai. Enti nitih ka cherita tu anak tau jadi enggau aya tauka ibu menyadi apai tauka menyadi indai. Tang adat Perintah diatu seduai enda tau jadi. Dua nangga tiga, reti nya anak jadi enggau petunggal apai tauka petunggal indai lalu ka di intu besapat di darat aja enggau babi sekali sepa sereta ukum benda sigi alas. Adat Perintah, lelaki kena ukum tiga puloh kati, lalu indu dua puloh kati pulai ka Perintah tang seduai tau jadi melaki bini.

Bepun ari cherita tu alai kitai bansa Iban diatu badu agi mantang orang ke jadi salah serak, tauka beleman enggau pangan salah serak. Agi mega iya ke bendar bepun ari ajar Sengalang Burong ngagai Sera Gunting leboh Sera Gunting beleman enggau ibu iya empu, iya nya menyadi indai iya empu ke benama Dayang Langit ke digelar Dara Chempaka Tempurong Alang. Agi mega ba cherita tusut Sengalang Burong kitai tau macha ba lambar 30, dia kitai ka macha cherita pasal Puntang Raga ngajar Beti enda ngasoh iya mantang Abang ke deka jadi salah serak enggau Dayang Tali Bunga laban ketegal nadai kena betimbang.

Benda tunggu pulai ngagai nyawa duit dikena dalam menoa Bagi Kadua kemaia hari baka tu:
Nama Benda = Penyampau ba mata duit.
Sigi Menukul pulai ngagai mata duit RM00.50 sen.
Sigi Jabir pulai ngagai mata duit RM1.00
Sigi Panding pulai ngagai mata duit RM2.00
Sigi Alas muda pulai ngagai mata duit RM4.00
Sigi Alas Ngerang pulai ngagai mata duit RM5.00
Sigi Rusa pulai ngagai mata duit RM8.00
Sigi Rusa lelaki pulai ngagai mata duit RM10.00

Kabuah alai madah ka pemesai sekeda adat tusun tunggu benda pulai ngagai mata duit diatu laban cherita tu bisi mansa sekeda sida. Kenu ko jerita dulu kelia tunggu kitai Iban nadai disebut ngagai mata duit nyangka laban apin bisi Perintah tauka nadai duit leboh maia nya kelia. Rintai tusun tunggu nya samina diteba ba tengah aja, bisi mit agi ari nya ngagai sesingkap mangkok batu lalu bisi mega besai agi. Tang tusun tunggu ke selalu dikena diatu samoa udah disebut dia tadi. Tusun tunggu endang sigi nitih ka baka gaya enggau pemesai penyalah orang ti ngereja penyalah nya tadi. Bisi penyalah baka pemalu samina tunggu benda aja nadai enggau manok enggau babi. Bisi mega enggau manok tauka babi aja enda bebenda lalu bisi mega tunggu enggau manok tauka babi sereta enggau benda baka ke disebut tadi dikumbai sangkar. Ka tambah nya nitih ka gaya penyalah, bisi mega tambah besi, lungga, duku tauka nyabur, ka keris samengat enggau benda mega ka kurong samengat. Disebut ngena jako pandak duit nya tauka ganti benda diatu nitih ka pemesai nyawa sida ngagai mata duit baka ke diator datas dia tadi, Taja diatu enggau duit, tang nama benda agi disebut, enti enda nya nyau ukum Perintah disebut kati tauka pikul. Tang diatu iya nyau disebut nitih ke atur ba Adat Istiadat Iban 1993 enggau jako Mungkol.

NGERAPOH

Nama Reti Pengawa Ngerapoh

Pengawa Ngerapoh tu iya nya, pengawa kitai bansa Iban leboh ti di kerja kena ngintu tauka nyengai pemati kitai sekaban tauka kitai sebilik ti mati tauka parai ba menua orang ketegal ti ngiga belanja kena ngidup kediri, tauka bangkai iya ti mati tu enda olih di bai sida sebilik tauka kaban belayan iya pulai ke menua ambi ke di intu tauka di sengai baka bangkai kitai Iban bukai ti udah nadai di menua kitai ditu empu. Kebuah ti ngereja Pengawa Ngerapoh tu iya nya kitai nganjung baya iya ti udah mati di menua orang ke pendam ba menua asal iya ti mati nya empu, ngambi ke semengat iya ba menua orang din tau pulai ngagai menua asal iya empu. Nyadi bangkai iya ti parai tu di tumbak ke ba menua orang lalu Adat Ngerapoh ka di intu ba rumah panjai asal menua iya ti mati tu munyi ko kenang aku ke sekali tu.

Chara Bangkai Iya Ke Mati Di Tumbak Ke Ba Menua Orang

Nyadi chara enggau gaya kitai ngintu pemati kitai sebilik tauka kaban belayan tu ba menua orang nya endang nadai bida ti di banding ke enggau gaya kitai ngintu pemati ba menua asal kitai empu nitih ke Adat Sempekat menua siti siti ti endang asal usul kitai.

Chara Ngereja Pengawa Ngerapoh

Sepemulai kaban belayan iya ti mati nya tadi ari menua orang udah ti ngintu tau ka numbak ke bangkai iya nya tadi, dia kaban belayan tauka sida sebilik tu lalu mai rengka. Iya nya gari tauka utai bukai ti endang enggi niang ti baru udah mati tu ambi ke dibai pulai ngagai bilik penaik sida iya di menua asal iya empu.

Leboh sida sebilik ti udah datai ba rumah panjai sida ke mati tu tadi dia sida iya enda tau niki ngapa enti enda di genselan ngena darah babi. Sida ke niki tu mega mesti niki ari pala tangga muak ke ujung ramu. Udah babi nya di bunoh ba pala tangga dia baru sida iya tau niki mai barang tauka rengka iya ti mati nya tadi tama serta lalu ke dalam rumah panjai sida nya. Nyadi bangkai babi ke dibunoh nya tadi lalu di irit niti tempuan rumah sida iya laban ambi ke darah babi nya kena ngenselan rumah.

Sida sebilik ke mai rengka iya ti mati tu enda tau sekali kali ngetu ba ruai orang tauka ba bilik orang bukai tang lalu nuju tama bilik sida ti mati nya tadi. Udah meh sida ti mai rengka iya ti mati tu tama ba bilik sida iya empu, dia sida iya lalu nyendia ke tajau siti ti di kena nyilih bangkai iya ti udah mati nya tadi. Nyadi tajau tu nadai milih bansa tajau laban nya nitih ke penyiru tauka pengasih sida sebilik ke iya ti udah mati nya tadi.

Nyadi tajau ti udah di taga ke sida ka di kena ngereja pengawa ngerapoh tu tadi lalu di gali ka ba tengah bilik serta di beri mandi baka kitai ti meri bangkai kitai mensia mandi mega. Udah tajau tu di beri mandi , dia sida iya lalu ngunsut iya enggau minyak. Udah tajau tu di unsut enggau minyak, dia sida iya lalu ngambi gari iya ti udah mati nya tadi lalu di bap ke ba tajau nya nitih ke gaya gari ti di kena ba tubuh kitai mensia bukai.

Lalu ba ruai sida ti beempu pemati tu mega ka di gaga ke sapat alai engkah rapoh tu lagi. Nyadi sapat tu di gaga baka sapat pemati kitai maioh, iya nya besukut empat serta di belit enggau tali ngeliling empat sukut sapat nya tadi. Ba sapat tu mega ka di redai ke pua kumbu tauka sebarang pua ti di kira sida sebilik tau kena nyapat. Lalu nyengkar ba atas sapat ari adap tanju ngagai tempuan ka di gantung ka kayu, tauka buluh, tauka tali ti ka ngunjur sapat alai sida sebilik engkah baya pandang.

Udah meh semua utai tu di kerja, dia tajau ti udah di beri mandi , serta di unsut minyak serta di bap enggau gari ka di tanggung ke ruai. Dia deh tajau tu lalu di gali ke ba atas tikai baka bangkai. Iya lalu di tanggung baka kitai ke nanggung bangkai ngagai ruai lalu di gali serta di engkah dalam sapat ti udah di sedia ka nya tadi.

Chara Nyenggai Antu Leboh Ngerapoh

Chara kitai nyenggai antu maia ngereja pengawa ngerapoh tu endang nadai bida enggau kitai ti nyenggai antu pemati kitai Iban bukai nitih ke Adat Sempekat rumah panjai ba menua siti siti. Iya nya nitih ke penyiru sida sebilik enggau sida serumah empu ke tudah niang ti udah mati nya tadi ti udah di tumbak ke ba menua orang bukai.

Chara Nganjung Antu Leboh Ti Ngerapoh

Nyadi chara kitai ti nganjung antu leboh ti ngerapoh tu iya nya enda sebaka enggau kitai ti nganjong antu pemati kitai Iban maioh ke ngelama tu. Kebuah pia laban pemati kitai Iban maioh ke ngelama tu iya nya kitai nganjung batang tubuh iya ti udah mati nya ke pendam. Nyadi ba pengawa ngerapoh tu kitai nganjung tajau ti di kena kitai nyilih batang tubuh iya nya tadi, nyadi ke baya iya ti udah mati ke ka dianjung ngagai pendam ba menua asal iya ti mati nya empu.

Nya alai laban ti nganjung Tajau Rapoh ngagai pendam, lalu gaya penurun iya pan enda mega sama enggau kitai ti ngajung antu pemati kitai ke bukai. Nyadi Tajau Rapoh tu enggai nyadi di kaling tauka di san kitai baka ke ngaling tauka ngesan santubong tauka lungun leboh ti nganjung iya ke pendam. Tajau Rapoh tu mega enggai serta enda tau sekali kali di simpan kitai dalam santubong tauka lungun baka kitai ti nyimpan batang tubuh bangkai kitai Iban bukai.

Chara kitai ti nganjung Tajau Rapoh tu iya nya, iya mesti ka di ema kitai ngena selabit berengkah ari kitai ti angkat ninggal ke sapat sampai ke kitai nyau datai di pendam. Lalu chara kitai mai baya ke bukai nya nadai bida, iya nya di bai kitai bejalai niti rumah nengah tempuan ngagai ujong ramu. Sebedau Tajau Rapoh tu bekejang di ema ari sapat ruai sida ke mati nya tadi dia siko ari bala ke enggau nganjung antu nya ka bejalai dulu ari orang bukai mai sempun api.

Chara Numbak Ke Tajau Rapoh

Nyadi Tajau Rapoh ke di ema nya tadi enggai nyadi di tumbak ke baka kitai ti numbak ke bangkai kitai Iban bukai. Kebuah pia laban bangkai niang ti udah parai lalu di rapoh tu tadi endang udah di tumbak ke ba pendam di menua orang nya alai iya enggai nyadi di tumbak ke kedua kali. Nyadi Tajau Rapoh tu ka di dudok ke ba atas pendam ke udah di taga ke sida sebilik alai iya nya tadi, iya nya kena nanda ke iya ti di rapoh nya tadi udah mati lalu di tanda ke dia ba pendam ngena Tajau Rapoh. Tajau Rapoh tu mega enda tau di semin enti sema pendam iya ti mati di rapoh tu tadi udah di semin ba menua alai bangkai iya ti di tumbak ke nya tadi. Nya alai ba Pengawa Ngerapoh tu pengawa nyemin enggau numbak ke Tajau Rapoh tu enda tau di kerja sekali kali enti sema pengawa nya udah di kerja dulu ba menua orang ti alai bangkai nya udah di tumbak.

Chara Numbak Ka Bangkai Iya Ti Mati Nya Ba Menua Orang

Nyadi chara kitai numbak ke bangkai iya ti mati nya ba menua orang endang sebaka, baka kitai ti numbak ke bangkai kitai Iban bukai nitih ke Adat Sempekat ba menua siti siti.

Pengawa Nyemin Pendam Udah Bangkai Nya Di Tumbak Ka Ba Menua Orang

Maioh kaban belayan kitai Iban ti mati lalu bangkai iya ka udah di tumbak ka ba menua orang laban ti enda olih di bai pulai ngagai menua iya empu lalu di kemas ke sida enggau nyemin pendam. Kebuah pia laban ngambi ke pendam alai numbak ke iya nya tadi nyamai di temu kaban belayan iya ke datai ari menua iya empu ke dudi hari ila leboh maia sida iya datai ngabas pendam.

TUSUN GAWAI ANTU

Gambar Beliang (siko bala ari Saratok ti tebilang selalu enggau ngirup jalong) Benong Ka Ngirup Jalong


Gambar John Unjang (siko bala ari Saratok ti tebilang selalu enggau ngirup jalong) Benong Ngirit Buloh Lalu Nuntong Ka Buloh Ngagai Orang Ti Ngirup Buloh


Gambar Bini Aku (Indairosa / Mingat Anak Bundak Bebaris No.3) Ti Benong Ka Niki Maia Gawai Antu Ba Rumah Ramping, Sungai Engakabang, Roban Ba Tahun 1984

Nyadi tusun Gawai Antu ti dibai aku kenang kitai ditu iya nya diambi aku ari tusun Gawai Antu ti udah dikena ba Rumah Belabot, Tembawai Pok, Sebetan, Saratok, Daerah Kalaka, Pegai menua Bagi Kedua kena 31.10.1992 ti ditulis serta dirintai ke oleh Cikgu Mathew Demang Anak Sadar

A. Tiap tiap pengawa ti besangkut paut enggau Gawai Antu, Tuai Gawai mesti mai manok kena ngemun ka ka pengawa nengah tempuan, belaboh ari Pun Ramu.

B. Tiap tiap pengawa mesti Begendang Rayah kena madah ka pengawa ti deka dikerja. (Gendang Rayah iya nya tiga rengat, lalu ditangkan enggau ti kedua iya nya lima rengat serta iya ke penudi iya nya tujuh rengat).

C. Beranchau tikai mesti ninggang tikai orang ti Pun Ramu, tang tikai senggang enda tau dikena sekali kali leboh maia Gawai Antu.

D. Tiap tiap ngaga piring mesti nyendia ka piring ka diri empu serta di anjong ngagai Tuai Antu. Tiap mansang miring mesti nengah tempuan belama. Endor alai miring iya nya ba Ruai Tuai Antu.

E. Tiap tiap pengawa, pemindah Tuai Antu mesti dulu lalu ditangkan ka Lumur Dua Tuai Antu.

Pengawa Gawai Antu Belaboh :

Sebedau Gawai Antu ka dikerja semua sida serumah ka niri ke aum besai bekaul enggau pengawa Gawai Antu lalu sida serumah ka milih sapa ti patut dipadu ka megai pengawa ambi ke pengawa maia sida ti begawai nya mujor serta nadai pulai ke penti pulai ke pemali.

Orang ti dipilih mangku pengawa iya nya baka rintai dibaroh tu :
(a) Tuai Gawai - Mathew Demang Anak Sadar
(b) Sapit Tuai Gawai - Siri Anak Umba
(c) Tukang Tulis _ Dunggat Anak Enteri
(d) Tukang Wang _ John Bungkan Anak Jaya
(e) Sapit Tukang Wang – Mathew Demang Anak Sadar
(f) Kaban Komiti - Semua Tuai Tuai Bilik ba Rumah Belabot.

(1) Tuai Antu _ Kelanang Anak Digat
(2) Lumur Dua Tuai Antu - Ajong Anak Belabot
(3) Kaban Komiti - Semua Tuai Tuai Bilik

(a) Komiti Nganyam Garong – Mdm. Nalon Anak Mancha
(b) Sapit Komiti Nganyam Garong _ Mdm. Meni Anak Utau
(c) Kaban Komiti - Brayan Anak Entaria
- Luyah Anak Pom
- Tuai Rumah Belabot Anak Gerejih
- Mdm. Kumang Anak Gerejih

(1) Tuai Sabong _ Tuai Rumah Belabot anak Gerijih
(2) Sapit Tuai Sabong - Dunggat Anak Enteri
(3) Kaban Komiti _ Mathew Demang Anak Sadar
- Ajong Anak Belabot

Komiti Orang Ngirup Jalong Enggau Buloh

(a) Tuai Komiti _ John Unjang
(b) Sapit Tuai Komiti - Daniel Anak Digat
(c) Kaban Komiti - Morgan Anak Demang
- Ajong Anak Belabot

Komiti Pengerai

(a) Tuai Komiti - Mdm. Labek Anak Digat
(b) Sapit Tuai Komiti - Mdm. Linggoh Anak Paul

Komiti Pemeresi Rumah Enggau Ngias Rumah

(a) Tuai Komiti - Mdm. Labek Anak Digat
(b) Sapit Tuai Komiti - Mdm. Santa Anak Paul
(c) Kaban Komiti - Imang Anak Pang
- Lawi
- Semua Tuai Tuai Bilik

Komiti Pemadah (Announcer)

(a) Tuai Komiti - Daniel Anak Digat
(b) Sapit Tuai Komiti - Morgan Anak Demang
(c) Kaban Komiti - Randi Anak Enteri
Komiti Gendang

(a) Tuai Komiti - Tuai Rumah Belabot Anak Gerejih
(b) Sapit Tuai Komiti - Dunggat Anak Enteri
(c) Kaban - Engkenin
- Jaya Anak Mancha
- Ajong Anak Belabot

Komiti Ngaga Bunga Panggang Enggau Bunga Tuai Rumah

(a) Tuai Komiti - Mit Anak Aji
(b) Sapit Tuai Komiti - Nancy Anak Paul
(c) Kaban Komiti - Semua Tuai Tuai Bilik

Komiti Orang Ngelalu/Niki Ka Petara

(a) Tuai Komiti - Chaong Samuel
(b) Sapit Tuai Komiti - Mathew Demang Anak Sadar
(c) Kaban Komiti - Semua Tuai Tuai Bilik

Komiti Ngiga Buah Ke Tua Lalu Diengkah Ka Ba Taba

(a) Tuai Komiti - Engkenin
(b) Sapit Tuai Komiti - Ajong Anak Belabot
(c) Kaban Komiti - Semua Tuai Tuai Bilik

Komiti Ngaga Raran Alai Belulun

(a) Tuai Komiti - Empeni Anak Engkenin
(b) Sapit Tuai Komiti - Ajong Anak Belabot
(c) Kaban Komiti - Semua Tuai Tuai Bilik

Komiti Ngelalu Petara Enggau Nuntong Ke Jalong

(a) Mai Bendera - Mathew Demang Anak Sadar
(b) Mai Manok - John Unjang
(c) Mai Piring - Mdm. Nalun Anak Mancha
(d) Kaban - Semua Tuai Tuai Bilik

Komiti Ngaga Taba Enggau Palan Sungkop

(a) Tuai Komiti - Mathew Demang Anak Sadar
(b) Sapit Tuai Komiti - Kalanang Anak Digat
(c) Kaban Komiti - Semua Tuai Tuai Bilik

Komiti Tukang Gerah

(a) Tuai Komiti - Randi Anak Enteri
(b) Sapit Tuai Komiti - Robin Anak Siri
(c) Kaban Komiti - John Bungkan Anak Jaya

Komiti Nguong Orang Leboh Pengabang Niki Ba Rumah Panjai

(a) Tuai Komiti - Ayum Anak Siri
(b) Sapit Tuai Komiti - Morgan Anak Demang
(c) Kaban Komiti - Semua Tuai Tuai Bilik

F. Terubah Pengawa Dikerja Leboh Maia Gawai Antu

1.1 Piring Tolak Bala

Disedia ka tiap tiap pintu, alai miring ba Ruai Tuai Antu.
Penyampau piring empat iti aja.
Alai engkah piring iya nya dua iti ba langkau ampun, dua iti ba
Putting rumah setak setak.
Maia ngaga piring iya nya 26.09.1992

1.2 Miring Meri Rumah Makai

Disedia ka tiap tiap pintu, lalu dipiring ka ba Ruai Tuai Antu,
Piring tu iya nya dua iti sepintu.
Alai engkah piring iya nya ba empayan ruai enggau empayan bilik.
Maia ngereja pengawa tu kena 03.10.1992.
Serta ngaga Taba Pengabang (Langkau Piring), (bermacham macham bansa buah ti olih ka diengkah ba Taba tu, buah ti olih ngiga tu enda tau dibai ke rumah panjai sekali kali). (Dua igi telu mata diengkah ba Taba tu).

1.3 Ngaga Tuak Indai Bilai

Disedia ka tiap tiap pintu, lalu ditutok ba Tanju Tuai Antu, serta dilulun ba tanah. Tembu lulun lalu alai miring ba Ruai Tuai Antu.
Udah disedia ka semua macham piring, tambah enggau maioh macham leka utai, baka leka ensabi, jawa, nyeli, jagong, entimun, enggau maioh macham leka utai bukai, tang beras chelum enda tau enda dikena.
Maia ngere pengawa tu kena 04.10.1992.

1.4 Piring kena nutuk Tuak Indai Bilai disedia ka Tuai Antu dulu apin
Ti nutuk Tuak Indai Bilai ba Tanju Tuai Antu. (Piring tu siti engkah ba atas seregang ba Tanju Tuai Antu.

1.5 Ruas asi Tuak Indai Bilai tu diperarat ka ba ai Sebetan, enda tau di
buai ba sebarang alai. Orang ti muai ruas tu iya nya Tuai Antu enggau Lumur Dua Tuai Antu.

1.6 Tuak Indai Bilai tu mesti di engkah ba Kebuk Pregam lalu diengkah dalam sintong enda jauh ari moa pintu bilik diri empu.

2.1 Ngambi Sungkop Tauka Beban Sungkop

Pengawa tu ka dikerja kena 10.10.1992.

Pengawa ti keterubah dikerja iya nya ngaga pelasar alai langkau sungkop berengkah ari tumu tumu pagi sebedau bala maioh ti ngambi sungkop ti udah tembu tauka diban nya ari alai iya diban (Brayang). (Dua iti piring sepintu, siti ditumbak, siti di engkah ba seregang. (Gaya pelasar nya digaga iya nya 5.7.9 mesti timpang).

2.2 Sungkop Tuai Antu dulu datai lalu dibiau enggau manok, siko
manok setiap pintu. Sungkop tau belaboh digaga diatu ba palan sungkop diri empu. (utai ti dipangkang orang ngaga sungkop iya nya kurong semengat enggau kering semengat – reti nya kebok sigi enggau lungga).

3.1 Ngambi Buloh

Alai ngambi buloh tu iya nya ba tanah Cr. Mujang di Sungai Pudun, Sebelak, Roban. Orang ke ngambi buloh nya mesti mai piring, lalu miring ba pun buloh di babas din. Terubah buloh ti di pantap iya mesti di biau enggau manok olih Tuai Antu. Udah nya baru orang bukai tau mantap buloh Kediri empu. Manok ti kena ngambi buloh tu tau di empa ba pun buloh (dibabas din).
Maia ngambi buloh tu iya nya 17.10.1992

4.1 Ngaga Raran Gawai Antu

Kena 23.10.1992
Ngaga Raran Tuai Antu dulu, Piring dua iti sepintu, siti diengkah
ba seregang, siti ditumbak semak raran diri empu.

Kena 24.10.1992
Ngayan ka manok kena beranchau tikai nanda ke hari orang
mutong babi enggau jelu idup ti bukai, serta ditangkan ke enggau
Gendang Rayah lima rengat. Maia beranchau tikai nya pukul 6:00
pagi.

Kena 24.10.1992
Ngelulun asi serta enggau mutong babi enggau jelu idup ti bukai maia Orang Nganyam, Tuai Antu mesti ka dulu. Lalu asi ti dilulun
Tuai Antu mesti ka dulu datai ari enggi orang bukai sepengudah semua sida iya tembu ngelulun.

Kena 24.10.1992
Leboh orang ti belaboh Nganyam ti diserta ka enggau Gendang Rayah tujuh rengat nya, lalu enti utai ke dianyam sida ke nganyam nya lalu bisi salah anyam, dia sida ke lelaki ka disabong ka manok enda betaji ba ruai Tuai Antu

Kena 25.10.1992
Beranchau tikai ke dikena Orang Nganyam nya ka di serta ka enggau Gendang Rayah tujuh rengat, lalu jam pengawa tu dikerja iya nya pukul 4:00 dini hari / pagi.

Kena 25.10.1992
Ngambi buloh enggau sungkop jam pukul 5:30 dini hari / pagi.
Sungkop nya ka di tiki kia ngena babi tauka manok, lalu sungkop tu enda tau dibai nengah ruai orang, lalu semina iya tau nengah tempuan enggau ruai orang ti beempu sungkop nya aja, lalu iya ka dibai pansut ngagai tanju diri empu. (Enti sungkop tu bisi ditemu dibai nengah ruai orang ti ukai beempu sungkop nya, orang ti mai sungkop nya ka ditunggu enggau ukum adat sigi alas tauka mata duit RM4.00 )

Kena 25.10.1992
Rugan mesti ka di diri ka orang ti tau ngirup buloh tauka jalong nya empu sehari tu mega / sehari nya.

Kena 25.10.1992
Piring ka di engkah ka ba sungkop belaboh sehari tu mega / sehari nya lalu pia mega api ka mesti bisi ditungkun ka ba sungkop selalu sampai ka nyau abis Gawai Antu tauka nyentok
ka sungkop nya dianjong ngagai pendam. (Selalu iya api tu ditungkun ka ngena kelita kurung, lalu enti iya padam iya tau ditungkun ka baru).

Berengkah ari 25.10.1992 Nyentok ka 31.10.1992
Gendang Ngelalu Sebayan ka belaboh ari orang ke pun ramu kira ka jam pukul 6:00 lemai tauak maia tumbuh nyang. Pengawa tu ka dikerja tiap tiap lemai sama baka nya jam belama sampai ke nyadi Gawai Antu.

5.1 Mutong Babi enggau jelu tupi bukai ke dikena ngintu Gawai Antu

Kena 30.10.1992
Mutong babi enggau jelu tupi bukai serta lalu ngelulun asi,
semua sigi lalu napat ke endor diri enpu. Piring enggau atur bukai
nya sabaka enggau atur maia nganyam suba,
Jam ngelulun asi nya pukul 7:00 pagi.

Kena 30.10.1992
Beranchau ka mutong babi enggau jelu tupi maia nyadi Gawai,
Gendang Rayah iya nya lima rengat.

Kena 30.10.1992
Ngaga Pantar jam pukul 4:00 lemai, Orang ti tau ngaga pantar tu iya nya orang ti tau ngirup buloh tauka jalong.

Kena 31.10.1992
Beranchau ka tikai kena niki ka Pengabang, serta diserta enggau Gendang Rayah tujuh rengat.


Programme Gawai Antu Di Rumah Belabot Tembawai Pok, Sebetan, Saratok kena 30.10.1992 enggau 31.10.1992

Kena 30.10.1992
Jam pukul 7:00 malam – Makai lemai enggau diri sebilik ti mantu
Pengawa Gawai Antu tu.

Jam pukul 8:00 malam - Baum enggau diri sebilik, ngatur chara
ngambat Pengabang Pagila (Gawai Antu)

Jam pukul 9:00 malam – Niki ka bala Lemambang enggau Orang ti
Ngirup Jalong enggau Ngirup Buloh.

Jam pukul 10:30 malam – Niki ka kaban belayan serta enggau
panggang babi / manok enda dibungkus,
tang diberi bunga basa kaban belayan
suku juru.

Kena 31.10.1992
Ngambat Pengabang ti diambi ngabang nitih ka maia pengabang ti ditiki ka diri empu datai ngagai rumah orang ti begawai nya.

Pengabang ti diambi ngabang diberi merarau dulu sebedau iya di tiki.

Niki ke pengabang ti diambi ngabang serta nambun bungai / bunga enggau muka panggang. (Bebuti Nan Ke Kujok)

Jam pukul 6:15 malam - Merandang Jalai Orang Ti Ngirup Jalong
enggau Orang Ti Ngirup Buloh serta
enggau Bala Raban Lemambang.
Gendang Rayah sekumbang orang tu
berayah niti rumah nya bejalai.

Jam pukul 7:15 malam - Semua pengabang diberi makai lemai.

Jam pukul 7:30 malam - Lemambang ti nimang Jalong nya pansut
nimang jalong ke ruai.

Jam pukul 10:30 malam – Ngelalu ka petara, maia tu mega semua
bala indu enggau semua orang ti
bengepan asal kitai Iban lalu diiring
bala raban lemambang. Badu pengawa
tu baru niki ka petara. Orang ti beempu
bilik maia tu lalu mantai ke utai di empa
ka pengabang ba ruai diri empu.

Jam pukul 12:30 malam – Semua pengabang diberi ngirup kopi.

Jam pukul 2:00 pagi - Bala Pengiring Indu lalu besedia ka
nuntong ka Jalong .

Jam pukul 4:30 pagi - Lemambang enggau bala Pengiring Indu
Nuntong ka Jalong ngagai orang ti Bujang
Berani.

Jam pukul 5:00 pagi – Bebungkar Ruang / Makai Pagi / Makai
Jamu.

Jam pukul 5:40 pagi – Muai rugan enggau muai leit ngagai alai
endor ngaga sunkop.

Jam pukul 7:00 pagi - Nganjong Buloh enggau Sungkop ka
Pendam. Tuai Antu dulu, udah nya baru
Lumor Dua Tuai Antu, udah nya baru di
tangkan ke orang ti ari pun ramu.

Abis pengawa tu baru Beranggap (meri orang duit)

Jam pukul 4:00 lemai – Niki ka Bujang Gelau.

Surat Ngambi Ngabang Serta Enggau Atur Pengawa Leboh Ngabang Gawai Antu Ngagai Rumah Belabot, Tembawai Pok, Sebetan, Saratok

Di baruh tu bagi rumah panjai ti d iambi ngabang :

Orang Ti Niki Ka Rumah Diambi Ngabang Jam Niki
Kelanang Ak Digat Rumah Nanggar, Semurin 08:30 Pagi
Ajong Anak Belabot Rumah Sanggat Anak Lutik 09:00 Pagi
Jaya Anak Mancha Rumah Mamut Anak Tugang 09:30 Pagi
Batu 3, Jalai Roban Lama.
Mathew Demang Rumah Gelungan Anak Apau 10:00 Pagi
Kerupok, Saratok
Siri Anak Umbo Rumah Maling Anak Gidun 10:30 Pagi
Sungai Berangan, Saratok
Engkenin Rumah Nicholas Iggai Megat 11:00 Pagi
Lengain, Saratok
Nancy Anak Paul Rumah Cr. Isa Anak Ging 11:30 Pagi
Engkudu, Saratok

Kami enggau basa ti besai nerima penatai kaban belayan, suku juru
enggau bala pengabang maioh ngagai Gawai Antu di Rumah Belabot,
Tembawai Pok, Sebetan, Saratok.
1. Minta tiap tiap buah rumah ti d iambi ngabang madah ka dulu Bulu Manok peniki rumah diri empu.
2. Minta kerja sama ngagai kaban belayan enggau bala pengabang maioh sama ngintu pengelikun leboh maia Gawai Antu tu, anang mai utai ke tau ngerusak nyawa enggau ngemedis ka mensia.
3. Semua pengabang ka diambi nitih ka basa Gawai Antu.
4. Orang ti nguong pengabang mesti bisi diberi tanda bunga ba baju ari tuai bilik lalu iya enda tau majak ka sapa sapa orang enti sema ka orang nya enggai ngirup ai ti di sadong iya.
5. Pengabang tau nginsap tang papong insap mesti ka diengkah ka ba alai muai papong insap ti udah disedia ka orang ti beempu ruai alai sida iya ngabang nya.
6. Ai Takar ka diadu ka Tuai Rumah orang ti ngabang enggau orang ti beempu bilik ti niki ka orang ngabang nya, laban takut ke salah adu nitih ke penepan enggau pangkat diri empu.
7. Enda tau sekali kali nikau orang indu ngena asi pulut serta ngachau tauka ngelesey ka sida iya leboh sida ti bejalai maia ngalu petara enggau nuntong ka jalong.
8. Orang ti engkasak enda tau dipasong orang ari rumah bukai, enti pulai ka laya iya ti masong nya deka diukum nitih ka adapt ti patut.
9. Sapa orang ti bisi ditemu belaya serta lalu ngachau Gawai deka diukum sepuluh ringgit siko siko, lalu Tuai Rumah sida iya ti belaya nya empu dipinta muru iya ti belaya tu pulai tekala nya, ganti rugi deka diperunding ka ngagai perintah tauka polis udah nya.
10. Enda tau bira ba sebarang alai laban rumah jamban tauka agu sigi udah disedia ka lalu patut bira ba lubang jamban nya.

Buah Enggau Upa Ti Diguna Kena Ka Untong Tuaa

Pemulai kita ari babas tau ka endor bukai lalu utai ulih kita seraktu enda tau lalu di bai pulai ka rumah, tang mesti di engkah ba Taba.

Maia ngiga utai tu iya nya 26.09.1992
Tiap tiap pintu mesti ka ngiga buah enggau upa ti bisi ditulis dibaroh tu:
1. Buah senggang enggau upa iya
2. Buah timau enggau upa iya
3. Buah kechala enggau upa iya
4. Enggau sebarang macham buah ti ditemu kitai tau diempa maioh macham jelu.
Buah ti ditanam mensia
1. Buah pisang
2. Buah limau
3. Buah nanas
4. enggau maioh macham buah bukai

Utai disedia ka kena ngaga Tuai Indai Bilai
1. Beras Chelum / Pulut Chelum
2. leka padi amat enggau leka padi pulut
3. Nyeli
4. Jagong
5. Jawa
6. Ensabi
7. Janggat
8. Entimun
9. Jejebong
10. Chekor
11. Sebarang utai bukai ti ditanam ba umai ti nadai ditulis ditu.

Ikan – Ikan belau tu pemadu beguna lalu enti olih kitai tau nyalai iya tumu.

Nyadi semua Tusun Gawai Antu tu ditulis oleh Mathew Demang Anak Sadar ti diambi iya ari Cikgu Enggek ari Rumah Maling, Sungai Berangan, Saratok laban meda sida di Sungai Berangan udah bekau Gawai Antu ba tahun 1991 tak gerai nyamai serta chelap embap nadai apa nama. Lalu enti sema Tusun Gawai Antu ke ditulis aku ditu bisi kurang serta timpang aku minta kita bukai meri comment ambi ke bisi dikunsi kitai maioh ke pesaka Bansa Kitai Iban.

Jako Pengelalu

Aku enggau ati ti gaga ngelalu ke penatai kita ti olih ngelimpang kediri macha blog aku tu lalu ba blog ke siti tu aku mai kitai ti sama bansa Iban sama berati ke gaya Adat Bansa Iban laban kitai Iban bisi maioh macham atur enggau adat ti nyadi ke chara kitai begulai sejalai begempung perabong enggau pangan diri ke nyadi ke chuan serta teladan bansa bukai ti nadai milih bansa enggau penatai menua ngidup kediri kemaia tu hari nadai enggau laya serta dengki enggau pangan diri ti nyadi ke pemujor kitai Iban ngidup kediri begulai kelia.

My Profile

Nama aku John Adam Ak Gilbert Anyai, udah bebini lalu bisi anak dua iko. Siko indu lalu siko lelaki. Anak aku ke tuai benama Elizabeth Rosaliliaw lalu ke biak nama Crispian Elvyn Rangga. Aku bebini ngambi Mingat Ak Bundak. Aku kerja nyadi Polis di Balai Polis Pusat, Miri. Aku di kumbai kami semenua Apairosa, berasal ari Serudit, Paku, Spaoh, Betong tang diau netap di Brayang, Roban. Rumah panjai aku iya nya bilik no.7, Rumah Undi, Sungai Kemuntang, Brayang, Roban. Aku mega bisi blog ke bukai iya nya ApairosaHelpline, ApairosaOnline enggau Adat Bansa Iban. Lalu arap ke kita tau ngabas meda semua blog aku nya ke dikunsi aku enggau kitai maioh.

Terima kasih.